ފުވައްމުލަކު ނަރުދަމާ ނިޒާމުގެ މައްސަލައަށް ވަރަށް އަވަހަށް ދާއިމީ ހައްލެއް ލިބިގެންދާނެ- އެމްޑީ ސައީދު
2 އޯގަސްޓު 2021 | ހޯމަ 07:19އެކަމުގެ އަމަލީ މަސައްކަތް ވަރަށް ބާރަށް ކުރިއަށް ދާ ކަމަށް ވިދާޅުވި
ފެނަކަ ކޯޕަރޭޝަންގެ މެނޭޖިންގ ޑިރެކްޓަރ އަހުމަދު ސައީދު
ފުވައްމުލައް ސިޓީއަށް ދިމާވެފައިވާ ނަރުދަމާ ނިޒާމުގެ މައްސަލައަށް ވަރަށް އަވަހަށް ދާއިމީ ހައްލެއް ލިބިގެންދާނެ ކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވިދާޅުވެއްޖެއެވެ.
ރާއްޖެޓީވީގެ 'ފަލަސުރުޚީ' ޕްރޮގްރާމްގައި ވާހަކަ ދައްކަވަމުން ސައީދު ވިދާޅުވީ ފެނަކައިގެ މެނޭޖްމަންޓަށް، ނަރުދަމާ ނިޒާމަކުން ދިމާވާނެ އެންމެ ބޮޑު ތަކުލީފެއް ކުރިމަތިވަމުން މިދަނީ ފުވައްމުލަކު ނަރުދަމާ ނިޒާމުގެ މައްސަލައިގައި ކަމަށެވެ. އަދި އެ ސިޓީގެ ނަރުދަމާގެ ނިޒާމަށް ދާއިމީ ހައްލެއް ހޯއްދަވައި ދެއްވުމަށް މިހާރު މަސައްކަތް ކުރައްވަމުން ގެންދަވާ ކަމަށާއި އެކަމުގެ އަމަލީ މަސައްކަތް ވަރަށް ބާރަށް ކުރިއަށް ދާ ކަމަށެވެ.
އެ މަސައްކަތް ނިމުމާއެކު އެރަށުގެ ރައްޔިތުންނަށް ވެސް ހިތްހަމަޖެހުމެއް ލިބިގެންދާނެ ކަމަށް ގަބޫލު ކުރައްވާ ކަމަށް ސައީދު ވިދާޅުވިއެވެ.
ސައީދު ވިދާޅުވީ ފުވައްމުލަކަށް ދިމާވެފައިވާ ނަޖިސް ބޭރުވުމުގެ މައްސަލައަށް ހައްލެއް ގެނައުމަށްޓަކައި އަމަލީ މަސައްކަތް ފަށާފައިވަނީ މީގެ ދެ މަހެއްހާ ދުވަސް ކުރިން ކަމަށެވެ. އަދި މި އިންވެސްޓްމަންޓަކީ 43 މިލިއަން ރުފިޔާއަށްވުރެ ބޮޑު އިންވެސްޓްމަންޓެއް ކަމަށާއި އެއީ ގާތްގަނޑަކަށް 200 މިލިއަން ރުފިޔާ ޚަރަދު ކޮށްފައިވާ ނަރުދަމާގެ ނިޒާމެއް ކަމަށެވެ.
ސައީދު ވިދާޅުވީ ނަރުދަމާ ނިޒާމު ގާއިމުކުރުމަކީ ވަރަށް އުނދަގޫ ކަމެއް ކަމަށާއި، ސަބަބަކީ ބައެއް ނަރުދަމާ ނިޒާމުތައް ބައްޓަން ކުރެވިފައިވާ ގޮތުން ރާއްޖޭގެ ރަށްރަށުގައި ކޮންމެ ހުޅަނގު މޫސުމެއްގައި ކޮންމެވެސް ރަށެއްގެ އައުޓްފޯލް ހޮޅި އެއްގަމަށް ލައްގާތީ ކަމަށެވެ. އެއީ ފަޅުމައްޗަށް ނުވަތަ ކަނޑަށް ނަޖިސް ބޭރު ކުރަން އޮންނަ ހޮޅި ކަމަށާއި، އެ މަރާމާތުކޮށް ބެލެހެއްޓުމަކީ ވެސް ވަރަށް ބޮޑު ގޮންޖެހުމެއް ކަމަށް ސައީދު ފާހަގަކުރެއްވިއެވެ.
މީގެ އިތުރުން ސައީދު ވިދާޅުވީ ކުދި ރަށްރަށުގައި ވެސް ދިމާވާ އެންމެ ބޮޑު މައްސަލައަކީ އައުޓްފޯލް ހޮޅި އެއްގަމަށް ލައްގާ މައްސަލަ ކަމަށެވެ. އަދި އެ ނިޒާމުގައި ބޭނުންކުރާ ޕަންޕުތަކަކީ ވެސް ވަރަށް އަގުބޮޑު ޕަންޕުތަކެއް ކަމަށާއި، އެއީ ވެސް ދިމާވާ ވަރަށް ބޮޑު ތަކުލީފެއް ކަމަށެވެ.
އެހެންނަމަވެސް ފެނަކައިން އެ ކަންވެސް ވަރަށް ރަނގަޅަށް ޕްލޭން ކޮށްގެން ބަލަހައްޓަމުން ދާ ކަމަށް ސައީދު ވިދާޅުވިއެވެ. ސައީދު ވިދާޅުވީ ރާއްޖޭގެ ގިނަ ރަށްރަށުގެ ނަރުދަމާގެ ނިޒާމު ބައްޓަން ކުރެވިފައިވާ ގޮތުން އެ ނިޒާމުގެ ކަންކަން ބެލެހެއްޓުމަށް ބޮޑެތި ގޮންޖެހުންތަކެއް އެބަހުރި ކަމަށެވެ.
