މާލެ ސަރަހައްދުގައި ވެހިކަލް ރަޖިސްޓްރީކުރުމަށް ބޭނުންވާ ގަރާޖު ހުއްދަ ސިޓީ، މާލޭ ސިޓީ ކައުންސިލުން ދޫކުރާ ގޮތަށް ހަމަޖައްސައިފިއެވެ.
މާލޭ ސިޓީ ކައުންސިލުން ބުނީ ގްރޭޓާ މާލޭ ސަރަހައްދުގައި ރަޖިސްޓަރީ ކުރާ އުޅަނދުތައް ރަޖިސްޓަރީކުރުމުގެ ކަންކަންތައްތައް ދެން ބަލަމުން ގެންދާނީ އެ ކައުންސިލުން ކަމަށެވެ. ޚިދުމަތަށް އެދޭ ފަރާތްތަކުން އެކަމާ ގުޅޭ ފޯމު މާލެ ސިޓީ ކައުންސިލްގެ ލޭންޑް އެންޑް ބިލްޑިންގް ސެކްޝަނަށް ހުށަހެޅޭނެއެވެ. އަދި ސިޓީ ކައުންސިލްގެ ހުޅުމާލޭ ސެކްޝަން އެޗްޑީސީ ބިލްޑިންގެ އެއްވަނަ ފަންގިފިލާއިން ފޯމު ބަލައިގަންނާނެއެވެ.
މީގެ އިތުރުން ޚިދުމަތަށް އެދޭ ފޯމު މާލެ ސިޓީ ކައުންސިލްގެ ލޭންޑް އެންޑް ބިލްޑިންގް ސެކްޝަނުންނާއި ހުޅުމާލޭ ސެކްޝަނުން ލިބޭނެ ހުންނާނެ ކަމަށާއި މާލެ ސިޓީ ކައުންސިލްގެ ވެބްސައިޓުން ވެސް ފޯމު ލިބެން ހުންނާނެކަމަށް ކައުންސިލުން މައުލޫމާތުދެއެވެ.
ވެހިކަލް ރަޖިސްޓަރީކުރުމަށް ބޭނުންވާ ގަރާޖު ހުއްދަ ސިޓީ، މާލޭ ސިޓީ ކައުންސިލުން ދޫކުރާ ގޮތަށް ނިންމާފައިވާ ކަމަށް ޓްރާންސްޕޯޓް އޮތޯރިޓީން ވަނީ މީގެ ކުރިން ބުނެފައެވެ. އިންޖީނުލީ އެއްގަމު އުޅަނދު ރަޖިސްޓަރީ ކުރަން ހުށަހަޅާއިރު ގަރާޖެއްގައި އެ އުޅަނދު ބާއްވާނެ ކަމުގެ ލިޔުން ހުށަހަޅަން ޖެހެއެވެ. މިކަންކަން ބެލުމާއި ގަރާޖުގެ ވެރިފަރާތާއި އުޅަނދުގެ ވެރިފަރާތާ ދެމެދު ވެވޭ އެއްބަސްވުމުގެ ޞައްޙަކަން ކަށަވަރުކުރުމުގެ މަސައްކަތް ކުރަމުން އަންނަނީ ޓްރާންސްޕޯޓް އޮތޯރިޓީންނެވެ.
ގަރާޖު ހުއްދަ ސިޓީ، މާލޭ ސިޓީ ކައުންސިލުން ދޫކުރާ ގޮތަށް ނިންމާފައިވާ ކަމަށް ބުނެ އެ އޮތީރިޓީން ބުނީ ގްރޭޓަރ މާލޭ ސަރަހައްދުގައި ރަޖިސްޓަރީކުރާ އުޅަނދުތައް ރަޖިސްޓަރީކުރުމަށްޓަކައި ގަވާއިދުގައި ބަޔާންކޮށްފައިވާ އުޅަނދު ބާއްވާނެ ގަރާޖު ޗެކްކުރުމާއި ގަރާޖުގެ ވެރިފަރާތާއި އުޅަނދުގެ ވެރިފަރާތާ ދެމެދު ވެވޭ އެއްބަސްވުމުގެ ޞައްޙަކަން ކަށަވަރުކުރުމުގެ މަސައްކަތް 01 އޯގަސްޓް 2021 ވާ އާދީއްތަ ދުވަހުން ފެށިގެން ދެން ކުރިޔަށް ގެންދާނީ މާލެ ސިޓީ ކައުންސިލުން ކަމަށެވެ.
އިންޖީނުލީ އެއްގަމު އުޅަނދު ރަޖިސްޓަރީކުރަން ހުށަހަޅާއިރު ގަރާޖެއްގައި އެ އުޅަނދު ބާއްވާނެ ކަމުގެ ލިޔުން ހުށަހެޅުން ލާޒިމު ނުވާ ގޮތަށް އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ ބިލެއް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ދަނީ ދިރާސާ ކުރަމުންނެވެ.
އެއްގަމު ދަތުރުފަތުރުގެ ގާނޫނަށް މި އިސްލާހު ހުށަހެޅުއްވީ ނޮޅިވަރަމް ދާއިރާގެ މެންބަރު މުހައްމަދު ނަޝީދެވެ. އިސްލާހު ހުށަހަޅުއްވަމުން މެންބަރު ނަޝީދު ވިދާޅުވެފައިވަނީ މި ބިލަކީ އެއްގަމު ދަތުރުފަތުރުގެ ގާނޫނުގެ ދަށުން ހަދާފައިވާ ގަވާއިދުގައި އެއްގަމުގައި ދުއްވާ އިންޖީނުލީ އުޅަނދުފަހަރު ރަޖިސްޓަރީކުރާއިރު ދެ ފުރޮޅަށްވުރެ ގިނަ ފުރޮޅުލީ އުޅަނދު ގަރާޖެއްގައި ރަޖިސްޓަރީ ކުރާ ގޮތަށް މިހާރު އޮންނާތީ އެކަމުގެ ނާޖާއިޒް ފައިދާ ބަޔަކު ނަގަމުންދާތީ ހުށަހަޅާ ބިލެއް ކަމަަށެވެ.
މީގެ އިތުރުން ޓްރާންސްޕޯޓު އޮތޯރިޓީން ކުރަމުން އައި މި މަސައްކަތް ކައުންސިލްގެ ބެލުމުގެ ދަށަށް ބަދަލު ކުރަން ނިންމާފައިވާއިރު ޓްރާންސްޕޯޓް އޮތޯރިޓީ އުވާލުމަށް ހުށަހަޅާފައިވާ ބިލެއްް ވެސް ރައްޔިތުންގެ މަޖިލީހުން ދަނީ ދިރާސާ ކުރަމުންނެވެ. މިކަމާ ގުޅިގެން ޓްރާންސްޕޯޓް މިނިސްޓްރީގެ ޑެޕިއުޓީ މިނިސްޓަރ ހަމަދު އަބްދުލްޣަނީ ވިދާޅުވެފައިވަނީ ޓްރާންސްޕޯޓް އޮތޯރިޓީ އުވާލުމަކީ ފަހަތަށް އެޅޭ ފިޔަވަޅެއް ކަމަށެވެ.
ހަމަދު އަބްދުލްޣަނީ ވިދާޅުވީ ޓްރާންސްޕޯޓް އޮތޯރިޓީ އުވާލުމުގެ ވިސްނުމަކަށް އެންމެ ފުރަތަމަ ދިޔައީ އޮތޯރިޓީ އާއި މިނިސްޓްރީގެ މެންޑޭޓްގެ ތެރޭގައި ފުށުއަރާ ކަންތައްތަކެއް ހުރުމުން ކަމަށެވެ. ޓްރާންސްޕޯޓް އޮތޯރިޓީއަކީ ކުރީގެ ރައީސް އަބްދުﷲ ޔާމީން ޓްރާންސްޕޯޓް މިނިސްޓްރީ އުވާލުމަށްފަހު އުފެއްދެވި ތަނެކެވެ.
ޓްރާންސްޕޯޓް އޮތޯރިޓީގެ ބޯޑަށް މެމްބަރުން އައްޔަންކޮށް ވަކިކުރުމުގެ ބާރު އެ ގާނޫނުން ލިބިދެނީ ރައީސުލްޖުމްހޫރިއްޔާއަށެވެ. އަދި ބޯޑު ހިނގަމުންދާންވާނީ މިނިސްޓަރުގެ ބެލުމުގެ ދަށުންކަމަށް ގާނޫނުގައި ބުނެފައިވެއެވެ.
