ދައުލަތަށް 21.6 މިލިއަން ރުފިޔާ ގެއްލުން ވާގޮތަށް ތިން މަޝްރޫޢެއް އެވޯޑު ކުރި މައްސަލައެއް ސިވިލް ކޯޓަށް ހުށަހަޅައިފިއެވެ.

އެސްޖޭ ކޮންސްޓްރަކްޝަންގެ ގާނޫނީ ޓީމް، އެޑްވޮކެސީ ޗެމްބާރސް އިން އާދީއްތަ ދުވަހު އާންމުކުރި ބަޔާނެއްގައި ބުނެފައިވަނީ މި އަހަރުގެ ތެރޭގައި ފިނޭންސް މިނިސްޓްރީން ދައުލަތުގެ މާލިއްޔަތު ގާނޫނާއި ހިލާފަށް އަދި ދައުލަތަށް 21.6 މިލިއަން ރުފިޔާގެ ގެއްލުންވާ ގޮތަށް ތިން މަޝްރޫޢެއް އެވޯޑްކޮށްފައިވާ ކަމަށެވެ. އެއީ ހދ. ހަނިމާދޫގައި އިމާރާތްކުރަން ފަށާފައިވާ ހައުސިން ޔުނިޓް ނިންމުމުގެ މަސައްކަތުގެ މަޝްރޫޢު އާއި ތ. ވިލުފުށީގައި އިމާރާތްކުރާ ހައުސިން ޔުނިޓްގެ މަޝްރޫއު އަދި ހދ. ނޮޅިވަރަންފަރުގައި އިމާރާތްކުރާ ހައުސިން ޔުނިޓްގެ މަޝްރޫއެވެ.

މި ބަޔާނުގައި ބުނެފައިވަނީ، މިނިސްޓްރީ އޮފް ފިނޭންސްއިން އިޢުލާންކުރި މި 3 މަޝްރޫޢަކީ 27 ޖެނުއަރީ 2021 ގައި ބީލަމަށް ހުޅުވާލި ހދ. ހަނިމާދޫގައި އިމާރާތްކުރަން ފަށާފައިވާ ހައުސިންގ ޔުނިޓް ނިންމުމުގެ މަޝްރޫޢު އާއި، 02 ފެބްރުއަރީ 2021 ގައި ބީލަމަށް ހުޅުވާލި ތ. ވިލުފުށީގައި އިމާރާތްކުރާ ހައުސިންގ ޔުނިޓްގެ މަޝްރޫޢުއާއި، 15 ފެބްރުއަރީ 2021 ގައި ބީލަމަށް ހުޅުވާލި ހދ. ނޮޅިވަރަންފަރުގައި އިމާރާތްކުރާ ހައުސިންގ ޔުނިޓުގެ މަޝްރޫޢު ކަމަށެވެ.

އެސްޖޭއިން ބުނީ ތ. ވިލުފުށީ މަޝްރޫޢުއާ ގުޅިގެން ޕްރޮކިއުމަންޓް އޮފިސަރ ނިންމާފައިވަނީ އެސް.ޖޭގެ ފަރާތުން ހުށަހެޅި ބިޑް އިވެލުއޭޓްކޮށް އެވޯޑްކޮށްފައިނުވަނީ ހުށަހަޅާފައިވާ ބިޑްގައި އެމްޕްލޯޔަރސް ރިކުއަރމަންޓް އަދި ފައިނޭންޝަލް ރިކުއަރމަންޓް ފުރިހަމަ ނުވާތީ ކަމަށެވެ. އަދި  ހދ. ހަނިމާދޫ ޕްރޮޖެކްޓާއި ހދ. ނޮޅިވަރަންފަރު މަޝްރޫޢުއާ ގުޅޭގޮތުން މިނިސްޓްރީ އޮފް ފިނޭންސްގެ ޕްރޮކިއުމަންޓް އޮފިސަރަށް ހުށަހެޅި މައްސަލަތަކަށް މިހާތަނަށް ޖަވާބު ދީފައެއް ނުވާކަމަށެވެ. 

ދައުލަތުގެ މާލިއްޔަތު ގަވާއިދުގެ 17.10 ވަނަ މާއްދާގައި ބަޔާންކޮށްފައިވާގޮތުން ޕްރޮކިއުމަންޓް އޮފިސަރަށް ހުށަހެޅި މައްސަލަ، ހުށަހެޅުނު ތާރީޚުން ފެށިގެން 14 ދުވަހުގެ ތެރޭގައި، އެ މައްސަލައާ މެދު ވަކިގޮތެއް ނިންމާފައި ނުވާނަމަ ނުވަތަ ޕްރޮކިއުމަންޓް އޮފިސަރުގެ ނިންމުމާމެދު ހިތްހަމަ ނުޖެހޭނަމަ މައްސަލަ އަލުން ބެލުމަށް މިނިސްޓްރީ އޮފް ފިނޭންސްއަށް ހުށަހެޅުމުގެ ހައްގު މައްސަލަ ހުށަހެޅި ފަރާތަށް ލިބިގެންވާއިރު، ތ. ވިލުފުށީ މަޝްރޫޢުއާ ގުޅިގެން ޕްރޮކިއުމަންޓް އޮފިސަރު ނިންމާފައިވާ ނިންމުމާމެދު ހިތްހަމަނުޖެހޭތީ މާލިއްޔަތު ގަވާއިދުގެ 17.10 ގެ ދަށުން އެ މައްސަލަ ބަލައިދިނުމަށް އެދި 28 މާރިޗް 2021 ގައި މުސްތަގިއްލު ރިވިއު ކޮމިޓީއަށް އެސްޖޭގެ ފަރާތުން މައްސަލަ ހުށަހަޅާފައިވާ ކަމަށް ބަޔާނުގައި ވެއެވެ.

ހދ. ނޮޅިވަރަންފަރު މަޝްރޫޢުއާ ގުޅޭގޮތުން ނިންމި ނިންމުން ބަޔާންކޮށް މިނިސްޓްރީ އޮފް ފިނޭންސްގެ ފަރާތުން އެސް.ޖޭއަށް 01 ޖޫން 2021 ގައި ފޮނުވި ސިޓީގައި ބީލަން އަލުން އިވެލުއޭޓްކޮށްގެން ކުރިއަށް ގެންދިއުމަށް ނޭޝަނަލް ޓެންޑާރއަށް އެންގުމަށް އެ ކޮމިޓީގެ 2021 ވަނަ އަހަރުގެ 48 ވަނަ ބައްދަލުވުމުގައި ނިންމަވާފައިވާކަމަށް ބަޔާނުގައި ވެއެވެ.

ހދ. ހަނިމާދޫ މަޝްރޫޢުއާ ގުޅޭގޮތުން ނިންމިނިންމުން ބަޔާންކޮށް މިނިސްޓްރީ އޮފް ފިނޭންސްގެ ފަރާތުން އެސް.ޖޭއަށް 27 ޖޫން 2021 ގައި ފޮނުވި ސިޓީގައި، ބީލަން އަލުން އިވެލުއޭޓްކޮށްގެން ކުރިއަށް ގެންދިއުމަށް ނޭޝަނަލް ޓެންޑާރއަށް އެންގުމަށް އެ ކޮމިޓީގެ 2021 ވަނަ އަހަރުގެ 51 ވަނަ ބައްދަލުވުމުގައި ނިންމަވާފައިވާކަމަށް ވެއެވެ. އެސްޖޭއިން ބުނެފައިވަނީ، މުސްތަގިއްލު ރިވިއު ކޮމިޓީން ނިންމާފައިވާ ނިންމުންތަކަށް ބަލާއިރު ހަވާލާ ދެވުނު 3 ޕްރޮޖެކްޓަށް އެސްޖޭއިން ހުށަހަޅާފައިވާ ބިޑްތަކަކީ ބީލަން ކަރުދާހުގައި ބުނާ ޝަރުތުތައް ފުރިހަމަވާ ބީލަންތަކެއް ކަމާއި ބިޑްތަކުގައި އެމްޕްލޯޔަރސް ރިކުއަރމަންޓް އަދި ފައިނޭންޝަލް ރިކުއަރމަންޓް ފުރިހަމަވާކަން އެނގެން އޮތްކަމަށެވެ. 

އެހެންނަމަވެސް މުސްތަގިއްލު ރިވިއު ކޮމިޓީގެ ނިންމުންތަކަށް އަމަލުނުކުރުމަށް ނެޝަނަލް ޓެންޑާ ބޯޑުން 16 ޖުލައި 2021 ގައި ނިންމާފައިވާކަމަށް އެސްޖޭއަށް މައުލޫމާތު ލިބިފައިވާ ކަމަށް ބަޔާނުގައިވެއެވެ.

އެސްޖޭއިން ބުނީ އެ ކުންފުނީގެ ފަރާތުން ހުށަހެޅި ބިޑްތައް ރެސްޕޮންސިވް ނޫންކަމަށް ނެޝަނަލް ޓެންޑާ ބޯޑުން ނިންމާފައިވީ ނަމަވެސް، މިއީ ވުޖޫދުގައި ނުވާ ސަބަބުތަކެއްކަން އެނގެން އޮންނަ ކަމަށެވެ.

އެހެންކަމުން، މި ބިޑްތައް އިވެލުއޭޓްކުރުމުގައި އަމަލުކުރަންޖެހޭނީ، އެސްޖޭގެ ފަރާތުން ހުށަހެޅި ބިޑްތައް ވެސް ހިމަނައިގެން ބިޑް އިވެލުއޭޓްކޮށް، އެވޯޑްކުރަންވީ ފަރާތް ކަނޑައެޅުމަށް ކަމަށާއި މި މަޝްރޫޢުތައް އެވޯޑްކުރުމުގެ ކަންކަން ބީލަން ކަރުދާހުގައި ހިމެނިފައިވާ ގޮތަށް ބަލާއިރު، ބިޑް މަޝްރޫޢުގައި ބަޔާންކޮށްފައިވަނީ ބިޑް އެވޯޑްކުރަންވާނީ ރެސްޕޮންސިވް ބިޑްތައް އިވެލުއޭޓްކުރުމުން، އެންމެ ދަށް އަގެއް ހުށަހަޅާފައިވާ ފަރާތަށް ކަމަށް ވެސް ބަޔާނުގައިވެއެވެ.

އެސްޖޭއިން ބުނީ މުސްތަގިއްލު ރިވިއު ކޮމެޓީގެ ނިންމުމަކީ ޤާނޫނީ ބާރު ލިބިގެންވާ ނިންމުމެއްކަމަށްވާއިރު، އެ ނިންމުމާ ޚިލާފަށް ނޭޝަނަލް ޓެންޑަރއިން އަމަލުކުރުމަކީ ދައުލަތުގެ މާލިއްޔަތު ގަވާއިދުގެ ބާބު 17 ގައި ކަނޑައަޅާފައިވާ އިޖުރާއަތްތަކާ ވެސް ފުށުއަރާކަމެއް ކަމަށް ބަޔާނުގައިވަނީ ބުނެފައެވެ.

މި މައްސަލަ ސިވިލް ކޯޓަށް ހުށަހެޅީ ދައުލަތަށް ލިބިދާނެ ގެއްލުމަކަށް ބަލައި އެކަމުގައި މިނިސްޓްރީގެ ތެރެއިން ހައްލެއް ހޯދަން މަސައްކަތް ކުރުމަށްފަހު ކަމަށްވަނީ ބުނެފައެވެ.

ބަޔާނުގައި ބުނެފައިވަނީ، މި މައްސަލައިގައި ނެޝަނަލް ޓެންޑާ ބޯޑުން އަމަލުކޮށްފައިވާ ގޮތުން ހިތްހަމަ ނުޖެހިގެން އެކަން ފިނޭންސްގެ މިނިސްޓްރީގެ ޕްރޮކިއުމެންޓް އޮފިސަރަށް ވެސް ހުށަހެޅި ކަަމަށެވެ. އެހެންނަމަވެސް އެދެވޭ ހައްލެއް އެކަމުގައި ލިބިފައި ނުވާތީ ދެން އެކަން ހުށަހެޅީ މި ފަދަ މައްސަލަތަކުގައި ފަހު ނިންމުން ނިންމާ މުސްތަގިއްލު ރިވިއު ކޮމިޓީއަށް ކަމަށެވެ.