ނައުފަލް ފެނުނު ނަމަވެސް ކަންހިނގި ގޮތާމެދު ބައިވަރު ސުވާލުތަކެއް

ދާދި ފަހުން ނޫސްތަކުގެ ފަލަސުރުޚީތަކަށް އެރި ޚަބަރަކީ އދ. ކުނބުރުދޫއަށް އުފަން އުމުރުން 26 އަހަރުގެ އަހްމަދު ނައުފަލް ގެއްލިގެން އުޅޭކަމުގެ ވާހަކަތަކެވެ. ރަށުގައި އުޅުމަށްފަހު އޭނާ މާލެއައީ ޑޮކްޓަރަށް ދެއްކުމަށެވެ. އެންމެ ފަހުން ފެނިފައިވަނީ ހުޅުމާލެއިންނެވެ. އޭނަގެ ޚަބަރެއް ނުވެގެން ސޯޝަލް މީޑިއާ ޕްލެޓްފޯމްތަކުގައި އާއިލާގެ މެމްބަރުން އެ ވާހަކަތައް ހިއްސާކުރުމުން ދިޔައިރު ވަރަށް ގިނަ އަދަދެއްގެ މީހުން ވަނީ އޭނާ ސަލާމަތުން އާއިލާއަށް ފެންނާނެ ކަމަށް އުންމީދު ކުރާ ކަމަށް ބުނެ ދުއާކޮށް ހަދާފައެވެ.

ނައުފަލް ގެއްލުނުތާ 6 ދުވަސް ފަހުން އޭނާ ފެނުނީ ހޮނިހިރު ދުވަހުގެ 04:45 ގައެވެ. ފުލުހުން ހަމައެކަނި ހިއްސާކުރި މައުލޫމާތަކީ ނައުފަލްގެ ހާލު ރަނގަޅު ކަމަށެވެ. އާންމުންނެކޭ އެއްފަދައިން އަޅުގަނޑުގެ ހިތުގައި ވެސް ނައުފަލް ގެއްލެންވީ ކީއްވެތޯ ސުވާލު އުފެދުނެވެ. އަދި ނައުފަލް ފެނުނީ ފުލުހުންނަށް ނުވަތަ އާއިލާ މީހުންނަށްތޯ ވެސް ސުވާލު އުފެދުނެވެ. އެހެންކަމުން ކަން ހިނގާ ދިޔަ ގޮތް އިތުރަށް ސާފުކުރުމަށްޓަކައި ނައުފަލްގެ އާއިލާގެ މެމްބަރަކަށް ގުޅުމުން ބުނީ ނައުފަލް އޭނާގެ ކޮއްކޮއަށް ހޮނިހިރު ދުވަހު އަމިއްލައަށް ގުޅި ކަމަށެވެ. ގުޅުމަށްފަހު ފޯނު ހަލާކުވެގެން އުޅޭ ވާހަކަ ބުނި ކަމަށެވެ. ނައުފަލްގެ އާއިލާ މެމްބަރަކު އޭނާ ބަލައި ދިޔައީ ރޮމްބަސް ކައިރިއަށެވެ.

އާއިލާ އިން ބުނީ މިހާރު ނައުފަލް އަނބުރާ ރަށަށް ފޮނުވާލާފައިވާ ކަމަށެވެ. އަދި އޭނާއާ ވަކިން ވާހަކަ ދެއްކުމުން ވެސް ތަކުރާރު ކުރަނީ ހަމަ އެއް ވާހަކައެއް ކަމަށެވެ. ފޯނު ހަލާކުވި ކަމަށް ބުނަމުންދާ ކަމަށާއި ގެއްލިގެން ހޯދަކަން އެނގުނީ ވެސް ހޮނިހިރު ދުވަހުގެ މެންދުރު ކަމަށް ނައުފަލް ބުނާ ކަމަށް އާއިލާ އިން ބުންޏެވެ.

ނައުފަލް އަކީ ކަންނެލި ދޯންޏެއްގައި މަހަށް ދާ މީހަކަށްވުމުން އޭނަ މާލެ އައީ މަސް ކިރުމަށް ކުރި ދަތުރު ނިންމާލުމަށްފަހު ޑޮކްޓަރަށް ދައްކާށެވެ. 21 ވަނަ ދުވަހު އޭނާ ޓްރީޓޮޕް ހޮސްޕިޓަލަށް ޑޮކްޓަރަށް ދެއްކި ކަމަށާއި އޭނަ ގެއްލުނު ރޭ އާއިލާގެ މެމްބަރަކު ހޮސްޕިޓަލުގައި އެޑްމިޓްކޮށްފައި އޮތުމުން ރޭގަނޑު ނުވައަކުން ބާރައަށް އެމީހާގެ ކައިރީގައި މަޑުކުރި ކަމަށް ވެސް އާއިލާ އިން ބުންޏެވެ. ނައުފަލް އެންމެ ފަހުން ފޯނުން ވާހަކަ ދެއްކީ އޭނަގެ މަންމަޔާއެވެ. އަދި އޭނާ ގެއްލުނު ރޭ ހުންނަނީ ކޮންތާކުތޯ ސުވާލުކުރުމުން ރައްޓެއްސެއް ކަމަށްވާ ހައިޝަމް ގާތު ހުންނަ ކަމަށް ބުނި ކަމަށް ވެސް އާއިލާ އިން ބުންޏެވެ. އެހެންނަމަވެސް ހައިޝަމް އަކީ ކާކު ކަމެއް އާއިލާ މީހުންނަކަށް ނޭނގެއެވެ.

އާއިލާއާ އޭރު ވާހަކަ ދެއްކިއިރު ބުނީ ނައުފަލް އަކީ އެގޮތަށް ޚަބަރު ނުވެ ހުންނަ ކުއްޖެއް ނޫން ކަމަށެވެ. މިޖާޒުގައި މަޑުމައިތިރި ގޮތްތަކެއް ހުންނަ ނައުފަލް އަކީ، ވަރަށް މަދުން މީހުންނާއި ވާހަކަ ދައްކާ މީހެއް ކަމަށް ވެސް އާއިލާއިން ބުންޏެވެ. އަދި އޭނާ އަކީ އެއްވެސް އިރެއްގައި ރައްޓެހިންނާއެކު ބޭރަށް ގޮސް، ގިނަ ވަގުތު ގެއިން ބޭރުގައި އުޅޭ ކުއްޖެއް ނޫން ކަމަށް ވެސް އާއިލާ އިން ބުންޏެވެ.

ކޮންމެއަކަސް މިހާރު ނައުފަލް ފެނިފައިވާއިރު ހިތުގައި ބައިވަރު ސުވާލުތަކެއް އަނެއްކާވެސް ވަނީ އުފެދިފައެވެ. އޭނަގެ ޚަބަރެއް ނުވެގެން އާއިލާއިން އުޅުނުއިރު ހަ ދުވަސްވީއިރު އާއިލާ މީހުންނާއި ނުގުޅާ ހުރީ ކީއްވެގެންބާވައެވެ. އެހާ ދުވަސްވީއިރު ހަމަގައިމުވެސް އާއިލާގެ މީހުން ހޯދަނެކަން ނައުފަލްއަށް ވެސް އެނގޭނެ ނޫން ހެއްޔެވެ. ފޯނު ހަލާކުވި ދުވަހު އާއިލާގެ މީހުންނަށް ގުޅާ އެކަން ނޭންގީ ކީއްވެބާއެވެ. މިފަދަ އެތައް ސުވާލުތަކެއް އަޅުގަނޑުގެ އިތުރުން ނައުފަލްގެ އާއިލާ މީހުންގެ ހިތުގައި ވެސް އުފެދޭނެކަން ޔަގީނެވެ.

ނައުފަލް އަމިއްލައަށް އޭނަ ނުގެއްލޭ ކަމަށް ބުނި ނަމަވެސް ފުލުހުން ބުނީ އެ މައްސަލައާ ގުޅިގެން އިތުރަށް ބަލަން ޖެހޭ ކަންކަން ބަލައި އެ މައްސަލަ އަދިވެސް ތަހުގީގު ކުރަމުންދާ ކަމަށެވެ. ނައުފަލް ފެނުނު ނަމަވެސް ކަންހިނގި ގޮތާމެދު ކޮންމެ މީހެއްގެ ހިތުގައި ވެސް ބައިވަރު ސުވާލުތައް އަދިވެސް އުފެދޭނެކަން ޔަގީނެވެ.