ޓެނިހުން ރަން މެޑަލް ޒްވެރެވްއަށް

ޓޯކިއޯ އޮލިމްޕިކް ގޭމްސް 2020 ގެ ޓެނިސް އިވެންޓުގެ ފިރިހެން ސިންގަލްސްއިން ޖަރުމަނުގެ އަލެކްސަންޑަ ޒްވެރެވް ރަން މެޑަލް ހޯދައިފިއެވެ.

މި ފަހަރުގެ ފައިނަލަށް ދުނިޔޭގެ ރޭންކިންގެ ފަސްވަނައިގައި އޮތް އުމުރުން 24 އަހަރުގެ ޒެވްރެވް ދަތުރުކުރީ ސެމީ ފައިނަލުގައި ދުނިޔޭގެ އެއްވަނަ ޓެނިސް ކުޅުންތެރިޔާ ސާބިއާގެ ނޮވަކް ޖޮކޮވިޗް ބަލިކުރުމަށްފަހުއެވެ. ޒްވެރެވް އަކީ 2000 ވަނަ އަހަރަށްފަހު އޮލިމްޕިކްސްގެ ޓެނިސް ފައިނަލުގައި ކުޅުނު ޖަރުމަނުގެ ފުރަތަމަ ކުޅުންތެރިޔާއެވެ.

ފައިނަލުގައި ޒްވެރެވްއާ ދެކޮޅަށް ރަޝިއާގެ ކަރެން ކަޗަނޯފް ނުކުތްއިރު، އާދީއްތަ ދުވަހު ކުޅުނު ފައިނަލް މެޗުން ޒްވެރެވް މޮޅުވީ ސީދާ ދެ ސެޓުންނެވެ. ފައިނަލް މެޗުގެ ސެޓުތައް ޒްވެރެވް ގެންދިޔައީ ފަސޭހަކަމާއެކު 6-3 އަދި 6-1 ންނެވެ. މިއީ އޮލިމްޕިކްސްއިން ޒްވެރެވް ހޯދި ފުރަތަމަ މެޑެއްޔެވެ.

އޮލިމްޕިކްސްއިން ޒްވެރެވް ރަން މެޑަލް ހޯދިއިރު، އޭނާއަށް އަދި މިހާތަނަށް ގްރޭންޑް ސްލޭމް މުބާރާތެއް ކާމިޔާބުކުރެވިފައެއް ނުވެއެވެ. ގްރޭންޑް ސްލޭމް މުބާރާތެއްގެ ފައިނަލުގައި މިހާތަނަށް ޒްވެރެވް ވާދަކޮށްފައިވަނީ މިދިޔަ އަހަރުގެ ޔޫއެސް އޯޕަންގައެވެ. އެ ފަހަރުގެ ފައިނަލުން ޒްވެރެވް ވަނީ އޮސްޓްރިއާގެ ޑޮމިނިކް ތިއެމް އަތުން ބަލިވެފައެވެ. އެކަމަކު މީގެ ކުރިން ޒްވެރެވް ވަނީ މެކްސިކަން އޯޕަން އާއި އޭޓީޕީ މާސްޓާސް ކާމިޔާބުކޮށްފައެވެ.

މިހާރު ކުރިއަށްދާ ޓޯކިއޯ އޮލިމްޕިކްސްގެ ފިރިހެން ސިންގަލްސްގެ ޗެމްޕިއަންކަން ޒްވެރެވް ހޯދިއިރު، އޮލިމްޕިކްސްގެ އަންހެން ސިންގަލްސްގެ ޗެމްޕިއަންކަން ހޯދާފައިވަނީ ސްވިޓްޒަލެންޑުގެ ބެލިންޑާ ބެންޗިކެވެ. އޭނާ ޗެމްޕިއަންކަން ހޯދީ ހޮނިހިރު ދުވަހު ކުޅުނު ފައިނަލް މެޗުގައި ޗެކް ރިޕަބްލިކުގެ މާކޭޓާ ވޮންޑްރޯޝޯވާ އަތުން 2-1 ސެޓުން މޮޅުވެގެންނެވެ.