ހުޅުމާލޭގައި 500 ޖާގައިގެ ޕާކިންގ އިމާރާތެއް ހެދުމުގެ މަސައްކަތް މާލެ ސިޓީ ކައުންސިލުން ފަށައިފިއެވެ.
މިއީ ހުޅުމާލޭގެ މަގުތަކުގައި ޕާރކް ކޮށްފައި ހުންނަ އުޅަނދުތަކާއި، ހުޅުމާލޭގެ ރައްޔިތުންގެ އުޅަނދުތައް ޕާރކް ކުރުމަށް ޚާއްސަކުރާ ތެނެކެވެ. މިތަން އިމާރާތްކުރަނީ މާލެ ސިޓީ ކައުންސިލްގެ މިދިޔަ ދައުރުގައި އެ ކައުންސިލަށް ހޯދާފައިވާ ބިމުގައެވެ. އެ މަސައްކަތް މިހާރު ސިޓީ ކައުންސިލުން ވަނީ ފަށާފައެވެ.
މި އިމާރާތް ކުރުމަށް ކަނޑައަޅާފައިވާ ސަރަހައްދު ސިޓީ ކައުންސިލުން ވަނީ އަދީއްތަ ދުވަހު ބަލާލާފައެވެ. މާލެ ސިޓީ ކައުންސިލުން ވަނީ، މާލޭގެ އެކި ސަރަހައްދުތަކުގައި ބަހައްޓާފައި ހުރި ގިނަ ދުވަސްވީ، އުޅަނދުތައް ނެގުމުގެ މަސައްކަތްވެސް ފަށާފައެވެ. އަދި މާލެ ސަރަހައްދަށް ރަޖިސްޓްރީކުރާ އުޅަނދުތަކުގެ ގަރާޖް ސިޓީ ދޫކުރުމަށްވެސް އޮގަސްޓް މަހުގެ 1 ވަނަ ދުވަހުން ފެށިގެން ވަނީ ފަށާފައެވެ. މާލޭގެ ޕާކިންގ މައްސަލަ ހައްލު ކުރުމަށް އެކި ސަރަހައްދުތަކުގައި ޒޯންތައް ހެދުމުގެ މަސައްކަތް ކައުންސިލްގެ މިދިޔަ ދައުރުގައިވެސްވަނީ ކޮށްފައެވެ.
