އަންނަ އޮކްޓޯބަރު މަހު ބާއްވާ 12 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް 2021 ގައި ރާއްޖޭގެ ހަ ބޮޑީބިލްޑަރަކު ވާދަކުރާ ގޮތަށް ހަމަޖެހިއްޖެއެވެ.

މި މުބާރާތް އޮންނާނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން ހަތްވަނަ ދުވަހުގެ ނިޔަލަށް އުޒްބެކިސްތާނުގެ ވެރިރަށް ޓަޝްކެންޓުގައެވެ. މި މުބާރާތުގައި ރާއްޖޭގެ ގައުމީ ޓީމު ވާދަކުރާއިރު، ރާއްޖޭގެ ހަ ބޮޑީބިލްޑަރަކު މުބާރާތުގައި ވާދަކުރަން ނިންމާފައިވާ ކަމަށް ބޮޑީބިލްޑިން އެސޯސިއޭޝަން އޮފް މޯލްޑިވްސް (ބީބީއޭއެމް) އިން މައުލޫމާތުދެއެވެ.

މި ފަހަރުގެ މުބާރާތުގައި ވާދަކުރާ އެތުލީޓުންނަކީ އަޒްނީން ރަޝީދާއި، ހުސެއިން ހިމްޔާނާއި، ފަތުހުﷲ މުޙައްމަދާއި، އިބްރާހީމް ނަބީލުގެ އިތުރުން މުޙައްމަދު މޫސާ އާއި މުޙައްމަދު ރަޝީދެވެ. މި ޓީމުގެ ކޯޗަކީ އަބްދުލް ހަސީބު ހުސެއިންއެވެ. އަދި ޓީމުގެ މެނޭޖަރަކަށް ހަމަޖައްސާފައިވަނީ ބީބީއޭއެމްގެ ނައިބު ރައީސް އަޙްމަދު އައިމަނެވެ.

މި ފަހަރުގެ މުބާރާތުގައި އަޒްނީން ވާދަކުރާއިރު، އޭނާ ވަނީ ދެކުނު ކޮރެއާގައި 2019 ވަނަ އަހަރު ބޭއްވި 11 ވަނަ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ ފިރިހެނުންގެ ސްޕޯޓްސް ފިޒީކް 170 ސެންޓިމީޓަރު ބައިން ލޯ މެޑަލް ހާސިލްކޮށްފައެވެ. މީގެ އިތުރުން އޭނާ ވަނީ ނޭޕާލުގެ ކަތުމަންޑޫގައި 2019 ވަނަ އަހަރު ބޭއްވި 12 ވަނަ ސައުތު އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ 170 ސެންޓިމީޓަރު ބައިން ރަން މެޑަލް އާއި އިންޑޮނީޝިއާގެ ބަތަމްގައި 2019 ވަނަ އަހަރު ބޭއްވި 53 ވަނަ އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ ފިރިހެނުންގެ ސްޕޯޓްސް ފިޒީކް 170 ސެންޓިމީޓަރު ބައިން ހަތަރުވަނަވެސް ހޯދާފައެވެ. އަދި މި އަހަރު ބޭއްވި ގައުމީ ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕް (މިސްޓަރ މޯލްޑިވްސް) ގެ ސްޕޯޓްސް ފިޒީކް ބައިން އެއްވަނަ ހޯދީވެސް އަޒްނީނެވެ.

ދެން ގައުމީ ޓީމުގައި ހިމެނުނު ފަތުހުﷲ މުޙައްމަދު ވަނީ ސައުތު އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ 167 ސެންޓިމީޓަރު ބައިން ލޯ މެޑަލް ހާސިލުކޮށްފައެވެ. އަދި މި ފަހަރުގެ މިސްޓަރ މޯލްޑިވްސްގައި އޭނާ ވަނީ އެތުލެޓިކް ފިޒީކުގެ 170 ސެންޓިމީޓަރު ބައިން އެއްވަނަ ހޯދާފައެވެ.

ގައުމީ ޓީމުގައި ދެން ހިމެނޭ މުޙައްމަދު މޫސާވެސް މީގެ ކުރިން ބައިނަލްއަގުވާމީ މައިދާނުގައި ގިނަ ކާމިޔާބީތަކެއް ހޯދާފައެވެ. އެގޮތުން އޭނާ ވަނީ ވޯލްޑް ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ 55 ކިލޯގެ ސީނިއާ މެންސް ބޮޑީބިލްޑިން ކެޓަގަރީން ލޯ މެޑަލް ހާސިލްކޮށްފައެވެ. މީގެ އިތުރުން އޭނާ ވަނީ ސައުތު އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ 55 ކިލޯގެ ބައިން ރަން މެޑަލް އާއި އޭޝިއަން ބޮޑީބިލްޑިން އެންޑް ފިޒީކް ސްޕޯޓްސް ޗެމްޕިއަންޝިޕުގެ 55 ކިލޯގެ ބައިން ލޯ މެޑަލްވެސް ހޯދާފައެވެ. އަދި މި އަހަރު ބޭއްވި މިސްޓަރ މޯލްޑިވްސްއިން މޫސާ ވަނީ 60 ކިލޯގެ އެއްވަނަވެސް ހޯދާފައެވެ.

މި ފަހަރުގެ މުބާރާތުގައި ދެން ވާދަކުރާ މުޙައްމަދު ރަޝީދު ވަނީ މި އަހަރުގެ މިސްޓަރ މޯލްޑިވްސްގެ 70 ކިލޯގެ އެއްވަނަ ހޯދާފައެވެ. އަދި މީގެ ކުރިން އޭނާ ވަނީ ތިން ފަހަރެއްގެ މަތިން މިސްޓަރ މޯލްޑިވްސް ކާމިޔާބުކޮށްފައެވެ.

މި އަހަރު ބާއްވާ ދުނިޔޭގެ މުބާރާތުގައި ރާއްޖޭގެ ހަ ބޮޑީބިލްޑަރުން ވާދަކުރާއިރު، ގައުމީ ޓީމު އެކުލަވާލާފައިވަނީ ޖުލައި މަހުގެ 16 ވަނަ ދުވަހު ބޭއްވި ސިލެކްޝަނުންނެވެ. އެ ސިލެކްޝަނުގައި އަށް ބޮޑީބިލްޑަރުން ވާދަކުރި ކަމަށް ބީބީއޭއެމުން މައުލޫމާތުދެއެވެ.