އެމެރިކާގެ ޖީޑީޕީ ޕެންޑަމިކްގެ ކުރިން އޮތްވަރަށް އިޔާދަ ވެއްޖެ

އެމެރިކާގެ އިގްތިސާދު ޕެންޑަމިކްގެ ކުރިން އޮތްވަރަށް އިޔާދަ ވެއްޖެކަމަށް އެ ގައުމުގެ ރައީސް ހާމަކޮށްފިއެވެ.

އެމެރިކާގެ ރައީސް ޖޯ ބައިޑަން ވިދާޅުވީ، އެ ގައުމުގެ ޖީޑީޕީ ބުރާސްފަތި ދުވަހު މައްޗަށް ޖެހިލާފައިވާ ކަމަށެވެ. އެއާއެކު ޕެންޑަމިކްގެ ކުރިން ހުރިވަރަށް އިޤްތިޞާދު އިޔާދަ ވެއްޖެކަމަށް ބައިޑަން ވިދާޅުވިއެވެ. މިއީ ވިސްނުންތެރިކަމާއެކު ކުރި މަސައްކަތުގެ ނަތީޖާ ކަމަށާއި, އެގޮތުން އާއިލާތަކުގެ ހާލަތު ރަނގަޅު ކުރުމަށް ދިން އެހީތަކާއި، ކުދި ވިޔަފާރިތައް ކޮޅަށް ޖެހުމަށް ކުރި މަސައްކަތްތައް ބައިޑަންވަނީ ފާހަގަ ކުރައްވާފައެވެ.

ގައުމުގެ ވަޒީފާ ނެތް މީހުންގެ ރޭޓް މަދުކުރެވިފައިވާ ކަމަށާއި، އައު ވަޒީފާތައް އުފައްދާފައިވާކަމަށްވެސް ބައިޑަން ވިދާޅުވިއެވެ. މީގެ އިތުރުން ވަކިވަކި ފަރުދުންގެ އާމްދަނީވެސް މިހާރު އިތުރު ވަމުން އަންނަ ކަމަށް އޭނާ ވަނީ ވިދާޅުވެފައެވެ.

ޕެންޑަމިކްގެ ކުރިއަށް ޖެހިލާއިރު، 2019ވަނަ އަހަރު އެމެރިކާގެ ޖީޑީޕީއަކީ 21.43 ޓްރިލިއަންނެވެ. ދުނިޔޭގެ ޖީޑީޕީ އެންމެ މަތި ގައުމަކީވެސް އެމެރިކާއެވެ. ދެވަނައަށް ޖީޑީޕީ އެންމެ މަތި ގައުމަކީ ޗައިނާއެވެ. ޗައިނާގެ ޖީޑީޕީއަކީ، 14.43 ޓްރިލިއަނެވެ.