ކުޑަކުދިންގެ ހިޔާގައި އަނެއްކާވެސް އަލިފާނުގެ ހާދިސާއެއް ހިނގައިފި
29 ޖުލައި 2021 | ބުރާސްފަތި 04:37މިއީ މި ފަހަކުން ހިނގި އަލިފާނުގެ ހަތަރުވަނަ ހާދިސާ
އެމްއެންޑީއެފުން ކުޑަކުދިންގެ ހިޔާގައި ހަރަކާތްތެރިވަނީ
ވިލިމާލެ ކުޑަކުދިންގެ ހިޔާގެ ކޮޓަރިއެއްގައި އަލިފާނުގެ ހާދިސާއެއް ހިނގައިފިއެވެ.
އެމްއެންޑީއެފުން ބުނީ ކުޑަކުދިންގެ ހިޔާގެ ހަތަރު ވަނަ ފަންގިފިލާގައި ހުރި ކޮޓަރިއެއްގައި އަލިފާން ރޯވި ކަމުގެ މަޢުލޫމާތު ލިބުނީ ބުރާސްފަތި ދުވަހުގެ ހެނދުނު 06:03 ގައި ކަމަށެވެ.
ހާދިސާގެ ރިޕޯޓު ލިބުމާއެކު އެމްއެންޑީއެފް ވިލިމާލެ ފަޔަރ ސްޓޭޝަންގެ ސިފައިން އެތަނުގައި ހަރަކާތްތެރިވާން ފަށާފައިވާ ކަމަށް އެމްއެންޑީއެފުން ބުނެފައިވެއެވެ.
އަލިފާންގަނޑު ނިއްވާލަން ކުރި މަސައްކަތުން 06:10 ހާއިރުު އަލިފާންގަނޑު ކޮންޓްރޯލް ކުރެވިފައިވާ ކަމަށާއި، އަލިފާން އެއްކޮށް ނިއްވާލެވުނީ 07:20 ހާއިރު ކަމަށް އެމްއެންޑީއެފުން ވަނީ ބުނެފައެވެ.
އެމްއެންޑީއެފުން ބުނީ މި ހާދިސާގައި އެއްވެސް މީހަކަށް އަނިޔާއެއް ލިބިފައިނުވާ ކަމަށެވެ. އެހެންނަމަވެސް ކޮޓަރީގައި ހުރި ބައެއް ތަކެއްޗަށް އެކި ވަރުގެ ގެއްލުން ލިބިފައިވާކަމަށް އެމްއެންޑީއެފުން ވަނީ ބުނެފައެވެ.
ފުލުހުން ގެންދަނީ މި ހާދިސާ އިތުރަށް ތަހުގީގުކުރަމުންނެވެ.
މިއީ މި ފަހަކުން ކުޑަކުދިންގެ ހިޔާގައި ހިނގި އަލިފާނުގެ 4 ވަނަ ހާދިސާއެވެ. ކުޑަކުދިންގެ ހިޔާގައި އެންމެ ފަހުން އަލިފާނުގެ ހާދިސާއެއް ހިނގާފައިވަނީ މިދިޔަ މެއި މަހުގެ 4 ވަނަ ދުވަހުއެވެ. މި އަލިފާނުގެ ހާދިސާއާ ގުޅިގެން ގިނަ ބައެއްގެ ފާޑުކިޔުން ވަނީ އަމާޒުވެފައެވެ. އަދި މިކަމާ ހިތްހަމަ ނުޖެހުން ފާޅުކޮށް އާކުން ވަނީ ބަޔާނެއް ވެސް ނެރެފައެވެ.
އާކުން ވަނީ ކުޑަކުދިންގެ ހިޔާގެ ސަލާމަތީ ކަންކަމުގެ އޮޑިޓެއް ހެދުމަށް ކަމާބެހޭ ފަރާތްތަކަށް ގޮވާލާފައެވެ. އާކުން ބުނީ ކުޑަކުދިންގެ ހިޔާގައި މި ދުވަސްވަރު ނޭދެވޭ އެތައް ކަމެއް ހިނގަމުންދާކަމަށާއި، އެކަންކަން އެތައް ފަހަރެއްގެ މަތިން ކަމާބެހޭ މުއައްސަސާތަކުގެ ސަމާލުކަމަށް ގެނެސްފައިވާ ކަމަށެވެ. އެހެންނަމަވެސް މިއަދާ ހަމައަށް ވެސް މިފަދަ ހާދިސާތައް މަދުކުރުމަށާއި، މައްސަލަތައް ހައްލުކުރުމަށް ކަމާބެހޭ މުއައްސަސާއަކުން މިކަމަށް އެކަށީގެންވާ ފިޔަވަޅެއް އަޅާފައެއް ނުވެއެވެ.
