ރައީސް ނަޝީދަށް ހަމަލާ ދިން މީހުންގެ މަގުސަދު ހާސިލްނުވިޔަސް އަދަބު ކުޑަވެގެން ނުވާނެ: ނިޝާން
28 ޖުލައި 2021 | ބުދަ 18:26ރައީސް ނަޝީދަށް ހަމަލާ ދިން މީހުންގެ ނިޔަތަކީ ގަސްތުގައި މީހަކު މަރާލުން
ޤާނޫނީ ވަކީލު މުޙައްމަދު ނިޝާން އިބްރާހީމް
ރައީސް ނަޝީދަށް އަމާޒުކޮށް، ދިން ހަމަލާގައި، އެ ހަމަލާ ދިން މީހުންގެ މަގުސަދު ހާސިލްނުވި ނަމަވެސް އެމީހުންނަށް ގިނަ ކުށްތަކެއްގެ ދަޢުވާ ކުރަންޖެހޭ ކަމަށް މަޝްހޫރު ޤާނޫނީ ވަކީލު މުޙައްމަދު ނިޝާން އިބްރާހީމް ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ނިޝާން ވިދާޅުވީ ރައީސް ނަޝީދަށް އަމާޒުކޮށް ހަމަލާ ދިނުމުގައި ހަރަކާތްތެރިވި މީހުންގެ މައްޗަށް ގަސްދުގައި މީހަކު މެރިކަމުގެ ދަޢުވާ ކޮށްފިނަމަ އެމީހުންގެ މައްޗަށް އެ ދަޢުވާ ސާބިތު ނުވާނެ ކަމަށެވެ.
އެމީހުންގެ ނިޔަތަކީ ރައީސް ނަޝީދު އަވަހާރަކޮށްލުންކަން ސާފުކޮށް އެނގެން އެބަ އޮތް ކަމަށާއި، އެހެންނަމަވެސް އެމީހުންގެ މަގުސަދު ހާސިލްނުވުމުން މި ހާލަތުގައި އެމީހުންގެ މައްޗަށް ގަސްދުގައި މީހަކު މެރިކަމުގެ ދައުވާ އުފުލިގެން ނުވާނެ ކަމަށް ނިޝާން ވިދާޅުވިއެވެ.
އެމީހުންގެ މައްޗަށް ގަސްތުގައި މީހަކު މެރި ކަމުގެ ދަޢުވާ ނުކުރެވުނު ނަމަވެސް، މި ހާލަތުގައި އެމީހުންގެ މައްޗަށް އުފުލާ ދަޢުވާ ކުޑަވެގެންނުވާނެ ކަމަށް ނިޝާން ވިދާޅުވިއެވެ. އެމީހުން ކޮށްފައިވާ ކުށަށް ބަލައި، އެމީހުންގެ މައްޗަށް ގިނަ ކުށްތަކެއްގެ ދަޢުވާ އުފުލަންޖެހޭނެ ކަމަށް ނިޝާން ވިދާޅުވިއެވެ.
ނިޝާން ވިދާޅުވީ ރައީސް ނަޝީދަށް އަމާޒުކޮށް ގޮއްވާލި އައިއީޑީގެ ސަބަބުން އެކި ގޮތްގޮތުން އަސަރުކޮށްފައިވާ ގިނަ ބަޔަކު ރާއްޖޭގައި އެބަތިބި ކަމަށެވެ. މިއީ ޓެރަރިޒަމް ހުއްޓުވުމާއި މަނާކުރުމުގެ ޤާނޫނުގެ ތިންވަނަ ޕޮއިންޓުގައި ބަޔާންކުރާ، "އާންމު ރައްޔިތުންނަށް ބިރުދެއްކުމުގެ" ގޮތުން ކުރާ ކަމެއް ކަމަށް ނިޝާން ވަނީ ވިދާޅުވެފައެވެ.
ނިޝާން އިތުރަށް ވިދާޅުވީ މީހަކު ކުރި ކުށަކަށް ދަޢުވާ ކުރާއިރު، އެމީހަކަށް އަންނަ ދަޢުވާ އެކި ދަރަޖަތަކަށް ބެހިގެންދާ ކަމަށެވެ.
މި ހަމަލާގައި ހަމަލާ ދިން މީހާއާއި، ހަމަލާ ދިނުމުގައި އެއްވެސް ސިފައެއްގައި ބައިވެރިވި މީހާއާއި، ފަންޑުކުރި މީހެއް ވާނަމަ އެމީހަކަށް އަންނަ ދަޢުވާ ވެސް ތަފާތު ވާނެ ކަމަށް ނިޝާން ވިދާޅުވިއެވެ.
ރައީސް ނަޝީދަށް އަމާޒުކޮށް ދިން ހަމަލާއާއި ގުޅިގެން މިހާތަނަށް 10 މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. މި މީހުންގެ ތެރޭގައި ހަމަލާ ދިނުމުގެ އެންމެ އިސްކޮށް ހަރަކާތްތެރިވި މީހުން ކަމަށް ބެލެވޭ ބަޔަކު ވެސް ފުލުހުން ވަނީ ހައްޔަރުކޮށްފައެވެ.
