ވިލިނގިލި އާންމު ހާލަތަށް ގެނެސްފި
28 ޖުލައި 2021 | ބުދަ 04:52އެ ރަށް އާންމު ހާލަތަށް ގެނެސްފައިވަނީ ޖުލައި މަހުގެ 27 ވީ އަންގާރަ ދުވަހުގައި
ވިލިނގިލިން ކޮވިޑްގެ ކޭސްތަކެއް ފެނިގެން މެއި މަހު 15 ވަނަ ދުވަހު އެ ރަށް މޮނިޓަރިންގެ ހާލަތަށް ގެނެވުނު
ގއ. ވިލިނގިލި މޮނިޓަރިންއިން ނަގައި، އާންމު ހާލަތަށް ގެނެސްފިއެވެ.
ވިލިނގިލިން ކޮވިޑްގެ ކޭސްތަކެއް ފެނިގެން މެއި މަހު 15 ވަނަ ދުވަހު އެ ރަށް މޮނިޓަރިންގެ ހާލަތަށް ގެނެވުނެވެ. ރާއްޖެއެމްވީއަށް މައުލޫމާތު ދެއްވަމުން ވިލިނގިލީ ކައުންސިލްގެ ރައީސް ވިޝާލް މުހައްމަދު ވިދާޅުވީ ފެންނަ ކޭސްތައް ފާއިތުވި ހަފްތާގެ ތެރޭގައި މަދުވެފައިވާ ކަމަށާއި، އެ ހަފްތާގެ ތެރޭގައި ކޮވިޑަށް ޕޮޒިޓިވްވެފައިވާ ކޭސްތަކަކީ ހޯމް ކަރަންޓީނުގައި ތިބި މީހުން އެކަނި ކަމަށެވެ.
އެޗްޕީއޭއިން ބުނީ އެ ރަށް އާންމު ހާލަތަށް ގެނެސްފައިވަނީ ޖުލައި މަހުގެ 27 ވީ އަންގާރަ ދުވަހުގައި ކަމަށެވެ. އަދި އެރަށުގައި އެ ހާލަތު އިތުރަށް ދަމަހައްޓަންޖެހޭ ސަބަބެއް މިވަގުތު ނެތް ކަމަށް ވެސް އެޗްޕީއޭއިން ބުނެއެވެ. ވުމާއެކު އެ ރަށް މޮނިޓަރިންގެ ހާލަތުން ނަގައި އާންމު ހާލާތަށް ގެނެސްފައިވާ ކަމަށެވެ.
ވިލިނގިއްޔަކީ އަތޮޅުގެ ވެރިކަންކުރާ ރަށަށް ވުމާއެކު އެ ރަށް މޮނިޓަރިންގެ ހާލަތުގައި އޮތުމުން އަތޮޅުގެ އެހެން ރަށްރަށަށް ދަތި އުދަގޫތަކަކާ ކުރިމަތިލާން ޖެހިފައިވާކަމަށް ކައުންސިލްގެ ރައީސް ވިޝާލު ވަނީ ވިދާޅުވެފައެވެ.
