ދިވެއްސަކަށް ވިތީ ފަޚުރުވެރިވާންވީ ސަބަބުތައް ދިވެހީންނަށް އެނގެންޖެހޭ- ޝަމީމް
27 ޖުލައި 2021 | އަންގާރަ 10:44ދިވެހި ރާއްޖޭގެ ޚާއްސަ ސިފަތަކާއި ގައުމިއްޔަތުގެ އަސާސްތަކާއި ދިވެހި ރާއްޖެއަށް ލިބިފައިވާ ރީތި ނަން އެނގެންޖެހޭ
ޑރ. އަލީ ޝަމީމް
ދިވެއްސަކަށް ވިތީ ފަޚުރުވެރިވާ ސަބަބުތައް ދިވެހީންނަށް ކިޔައިދޭން އެނގެންޖެހޭނެ ކަމަށް އެމްއެންޔޫގެ އެސިސްޓެންޓް ޕްރޮފެސަރ ޑޮކްޓަރ އަލީ ޝަމީމް ވިދާޅުވެއްޖެއެވެ.
ޑޮކްޓަރ ޝަމީމް މިހެން ވިދާޅުވީ މިނިވަން ދުވަހަށް ޚާއްސަކޮށް ރާއްޖެޓިވީން ކުރިއަށްގެންދިޔަ 'މިނިވަން އުފާ' ޕްރޮގްރާމްގައި ވާހަކަދައްކަވަމުންނެވެ.
ޝަމީމް ވިދާޅުވީ ކުރީއްސުރެން ދިވެހީންނަކީ އަމިއްލަވަންތަ އަދި ދިވެހީންގެ ކަންކަން އަމިއްލައަށް ނިންމާ ބައެއް ކަމަށެވެ. އަދި ވެރިކަމުގެ ނިޒާމް ބިނާކުރުމުގައާއި ވެރިކަން ހިންގުމުގައި ވެސް ދިވެހިން ދިވެހިންގެ މައްޗަށް އަމުރުކުރަމުން އައި ގައުމެއް ކަމަށެވެ.
ދިވެހި ރާއްޖޭގެ ޚާއްސަ ސިފަތަކާއި ގައުމިއްޔަތުގެ އަސާސްތަކާއި ދިވެހި ރާއްޖެއަށް ލިބިފައިވާ ރީތި ނަން ކޮންމެ ދިވެއްސަކަށް އެނގެންޖެހޭނެ ކަމަށް ޝަމީމް ވިދާޅުވިއެވެ. މި މައުލޫމާތަކީ މިހާރުގެ ދަރިވަރުންނަށް އަދި ޒުވާނުންނަށް ދަސްކޮށްދޭންޖެހޭ މައުލޫމާތެއް ކަމަށް ވެސް ވިދާޅުވިއެވެ.
ޝަމީމް ވިދާޅުވީ ސެޓެލައިޓް ޓީވީއިން ފެށިގެން ގޮސް މޮބައިލް ފޯނާއި އިންޓަރނެޓުގައި ވަގުތު ހޭދަކުރާ މިންވަރު އިތުރުވެ، އޭގެ ސަބަބުން ކުދިންނަށް ކުރާ ނޭދެވޭ އަސަރު ވަރަށް ބޮޑު ވެފައިވާ ކަމަށެވެ. އަދި މިނިވަންކަމަކީ ދިވެހީންނަށް ލިބޭނެ އެންމެ ބޮޑު ނިއުމަތަށް ވީ ނަމަވެސް ދިވެހިން އެކަމުގެ މައްޗަށް ސަމާލުކަން އެންމެ އެދެވޭ މިންވަރަށް ނުދެވޭ ކަމަށެވެ.
ޝަމީމް ވިދާޅުވީ މިނިވަންކަމަކީ ރައުސުލްމާލެއްގެ ގޮތުގައި ބަލާއިރު އެންމެ ވަރުގަދަ އެއް ރައުސުލްމާލު ކަމަށެވެ. އަދި ދިވެހީންނަށް ގިނަ ފަހަރު މިނިވަންކަން ތަސައްވަރު ކުރެވެނީ ފަލަސްތީނުގެ މީހުންގެ ވާހަކަ ދެއްކީމާ ކަމަށެވެ.
ދިވެހިރާއްޖޭގެ މިނިވަންކަމަކީ ގައުމިއްޔަތުގެ ބިންގާ ކަމަށާއި ގައުމިއްޔަތުގެ ފުރަތަމަ އަސާސަކީ ދިވެހިރާއްޖެއަކީ މިނިވަން ގައުމެއް އަދި މިނިވަން ދައުލަތެއްކަން ސާބިތުކޮއްދިނުން ކަމަށެވެ.
މީގެ އިތުރުން ދިވެހިރާއްޖެއަކީ ވަރަށް ޝަރަފުވެރި ތާރީޚެއް އޮތް ގައުމެއްކަމަށާއި ދިވެހިރާއްޖެ ވަރުގެ ޝަރަފުވެރި ތާރީހެއް އޮތް ގައުމެއް އިންޑިއާ ކަނޑުގައި ވެސް ނެތް ކަމަށް ވިދާޅުވިއެވެ. ޝަމީމް ވިދާޅުވީ މިކަހަލަ ފަޚުރުވެރި ޖަޒީރާ ގައުމެއް ނެތްކަމަށެވެ.
