ބޮސްނިއާގެ ސަރބުން އެގައުމުގެ މައި ސަރުކާރުގެ މުއައްސަސާތައް ބޮއިކޮޓްކޮށްފި

ބޮސްނިއާގެ ސަރބުން އެގައުމުގެ މައި ސަރުކާރުގެ މުއައްސަސާތައް ބޮއިކޮޓްކޮށްފިއެވެ.

ބޮސްނިއާގައި ސަރބުން 1995 ވަނަ އަހަރު ހިންގި ގަތުލުއާމުން އެމީހުންނަށް ރެކި އެކަން ނުކުރާ ކަމަށް ދޭހަވާގޮތަށް ވާހަކަދެއްކުމަކީ ޖަލު ހުކުމް އަންނާނެ ކަމެއް ކަމަށް ބޮސްނިއާއަށް އދ. އިން ކަނޑައަޅާފައި ހުންނަވާ ސުލްހައިގެ މަންދޫބު ވެލެންޓިން އިންޒްކޯ ނިންމަވައި އެކަން އިއުލާނުކުރުމާ ގުޅިގެން އެގައުމުގެ ސަރބުން ވަނީ އެކަމަށް ވަރަށް ބޮޑަށް ނުރުހުން ފާޅުކޮށްފައެވެ. އަދި ބޮސްނިއަން ސަރބްގެ ރިޕްރެޒެންޓޭޓިވް ވަނީ އެ މީހުން ބޮސްނިއާގެ މައި ސަރުކާރުގެ މުއައްސަސާތައް ބޮއިކޮޓްކުރަން ނިންމާފައިވާކަމަށް އިއުލާނުކޮށްފައެވެ.

ހޯމަ ދުވަހު މިކަން އިއުލާނުކޮށްފައިވާ އިރު، އަންގާރަ ދުވަހުން ފެށިގެން ސަރބުން ރަމްޒުކޮށްދޭ އެއްވެސް ސިޔާސީ ލީޑަރަކު ސަރުކާރުގެ މުއައްސަސާތަކުގެ މަސައްކަތްތަކުގައި ބައިވެރިނުވާނެ ކަމަށް ބޮސްނިއަން ސަރބްގެ ރިޕްރެޒެންޓޭޓިވް ވަނީ ވިދާޅުވެފައެވެ. އެގޮތުން ސަރބުން ދެން ބޮސްނިއާގެ ޖޮއިންޓް ޕްރެޒިޑެންސީ އާއި ގާނޫނު ހަދާ މަޖިލިސް އަދި ސަރުކާރު ވެސް ބަލައިނުގަންނާނެ ކަމަށް ވަނީ ވިދާޅުވެފައެވެ.

ބޮސްނިއާގެ މައި ސަރުކާރަކީ އެ ގައުމުގައި ދިރިއުޅޭ ތިން ދަރިކޮޅުގެ މީހުންގެ ރުހުމާއެކު އުފެދިފައިވާ ސަރުކާރެކެވެ. ސަރުކާރު އޮންނަށް ތިން ދަރިކޮޅުގެ ވެސް ރުހުން ބޭނުންވާނެއެވެ.

ބޮސްނިއާގެ ހަމަނުޖެހުންތަކަކީ އެތައް އަހަރެއް ކުރިން އެގައުމުގައި އުފެދިފައިވާ ހަމަނުޖެހުންތަކަކެވެ. 1995 ވަނަ އަހަރު ހިންގި ގަތުލުއާމަކީ 1992ން 1995ށް އެގައުމުގައި ހިނގި ހަނގުރާމައިގައި ހިންގި ގަތުލުއާމެވެ. މި ހަނގުރާމާގައި ލައްކަ އަކަށް ވުރެ ގިނަ މީހުން މަރުވެފައިވާ އިރު، ހަނގުރާމަ ނިމުމަކަށް ގެނެސް އެއްބަސްވުމެއްގައި ސޮއިކޮށްފައި ވަނީ 1995 ވަނަ އަހަރުގެ ޑިސެމްބަރު މަހުއެވެ.

އޭގެ ފަހުން ރިޕަބްލިކަން ސަރޕްސްކަ އަދި ބޮސްނިއެކް ކޮރޮއަޓް ފެޑެރޭޝަން ގާއިމުކުރެވުނެވެ.