ރައީސް ޞާލިޙަކީ ރައްޔިތުންނަށް ކަންތައްތައް ކޮށްދެއްވޭތޯ ބައްލަވާ ވެރިޔެއް: ރައީސް މައުމޫން
27 ޖުލައި 2021 | އަންގާރަ 03:44ރައީސް ޞާލިޙަކީ ވަރަށް އަހްލާގު ރަނގަޅު، ވަރަށް ހަރުދަނާ ބޭފުޅެއް ކަމަށް ވިދާޅުވި
ރައީސް ޞާލިޙާއި ކުރީގެ ރައީސް މައުމޫން އަބްދުލް ގައްޔޫމް
ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙަކީ ރައްޔިތުންނަށް ކަންތައްތައް ކޮށްދެއްވޭތޯ ބައްލަވާ ވެރިޔެއް ކަމަށް ކުރީގެ ރައީސް އަދި އެމްއާރްއެމްގެ ރައީސް މައުމޫން ޢަބްދުލް ޤައްޔޫމް ވިދާޅުވެއްޖެއެވެ.
މިނިވަން ދުވަހާ ގުޅިގެން ރާއްޖެޓީވީގެ ފަށާއިރު ޕްރޮގްރާމަށް ދެއްވި ޚާއްސަ އިންޓަވިއުއެއްގައި މައުމޫން ވިދާޅުވީ ރައީސް ޞާލިޙަކީ ވަރަށް އަޚްލާގު ރަނގަޅު، ވަރަށް ހަރުދަނާ މާތް ބޭފުޅެއް ކަމަށެވެ.
ރައީސް މައުމޫން މިހެން ވިދާޅުވެފައިވާއިރު ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙާއެކު ސިޔާސީ މަސައްކަތްތައް ނުކުރެއްވޭނެ ކަމަށާއި، އިދިކޮޅު ޕީޕީއެމް/ޕީއެންސީއާ އިއްތިޙާދު ހައްދަވަން ބޭނުންފުޅުވެވަޑައިގަންނަވާ ކަމަށް ދާދި ފަހުން ރައީސް ނަޝީދު ވިދާޅުވުމާ ގުޅިގެން އެކަމަށް ރައްދު ދެއްވައި ރައީސް މައުމޫން ވިދާޅުވީ ރައީސް ޞާލިޙާއެކު އެމަނިކުފާނަށް ސަޕޯޓް ދެއްވައިގެން ކުރިއަށް ވަޑައިގަންނަވާނެ ކަމަށެވެ. އެމްއެމްއާރްއެމް އިން ކުރިއަށްދާނީ ކޯލިޝަނާއެކު ކަމަށާއި، ކޯލިޝަން ރޫޅާނުލައްވާނެ ކަމަށް ވެސް އެމަނިކުފާނު ވިދާޅުވިއެވެ. ރައީސް މައުމޫން މިހެން ވިދާޅުވެފައިވާއިރު މިނިސްޓަރު ޢިމްރާން ވިދާޅުވީ އޭރު ޕާޓީތައް ކޯލިޝަން ހެދުމުން ރައްޔިތުންގެ އުންމީދު ވަރަށް ބޮޑު ވެގެން ދިޔަކަމަށެވެ. އަދި ކޯލިޝަންގައި ހިމެނޭ ހުރިހާ ޕާޓީތަކަށް އެކުވެގެން މަސައްކަތް ކުރެވޭނެ މާހައުލެއް އޮތް ހިނދެއްގައި ސަރުކާރާއެކު ދެމިތިބޭނެ ކަމަށެވެ. އަދި މި ސަރުކާރު ކުރިއަށްދާނީ ކޯލިޝަނާއެކު ކަމަށާއި، ކުރީގެ ރައީސް ޢަބްދުﷲ ޔާމީނާއެކު ރައީސް ޞާލިޙު ކުރިއަށް ވަޑައިގަންނަވާތަން ނުފެންނަ ކަމަށެވެ.
ކޯލިޝަންގައި ހިމެނޭ ދެ ލީޑަރުން މިހެން ވިދާޅުވެފައިވާއިރު ޖުމްހޫރީ ޕާޓީގެ ލީޑަރ ގާސިމް އިބްރާހީމް ވެސް ވިދާޅުވީ ރައީސް ޞާލިޙަށް ދެއްވެން އޮތް އެއްބާރުލެއްވުމެއް ދެއްވަން ތައްޔާރަށް ހުންނެވި ކަމަށެވެ.
ސަރުކާރުގެ ކޯލިޝަންގައި ހިމެނޭ ހުރިހާ ލީޑަރުން މިހެން ވިދާޅުވެފައި މިވަނީ މިވަގުތު ގައުމަށާއި ޕާޓީއަށް އެންމެ ރަނގަޅު ގޮތަކީ އެމްޑީޕީ ޕީޕީއެމް އިއްތިޙާދެއް ކަމަށް އެމްޑީޕީގެ ރައީސް، ރައީސް މުޙައްމަދު ނަޝީދު ވިދާޅުވުމާ ގުޅިގެންނެވެ. އެގޮތުން ނަޝީދު ވަނީ ޕީޕީއެމްއަށް ބަދަލު ތަކެއް ގެނެވި، އެ ބަދަލުތަކަކީ އިންޑިއާ އައުޓް ފަލްސަފާއާ ދުރު، ނަފްރަތުގެ ބިލަށް ތާއީދުކުރާ، މިއުޒިކަށް ވެސް އެއްބަސްވާ ބަދަލުތަކަކަށްވެ، އެ ހަމަތަކުގައި ސަރުކާރު ހިންގުމަށް ޕީޕީއެމާ އެއްބަސްވެވޭ އެމްޑީޕީ-ޕީޕީއެމް އިއްތިޙާދެއް އުފެއްދެވުމަށް ކުރީގެ ރައީސް ޢަބްދުﷲ ޔާމީންގެ އެހީއަށް އެދިވަޑައިންނެވުމަކީ މިވަގުތު އެންމެ ރަނގަޅު ގޮތް ކަމަށް ވެސް ވިދާޅުވެފައެވެ. ރައީސް ނަޝީދު އެމްޑީޕީ އެހެން މިސްރާބަކަށް ގެންދަވައި ޕީޕީއެމާއެކު މަސައްކަތްކުރައްވަން ބޭނުންފުޅުވާކަން ފައުޅުކަންބޮޑު ގޮތެއްގައި މިހާރު އަންނަނީ ހާމަ ކުރައްވަމުންނެވެ.
އެހެންނަމަވެސް މިކަމާގުޅިގެން އިދިކޮޅު ކޯލިޝަން ޕީޕީއެމް/ޕީއެންސީއިން ބުނަނީ އެ ޕާޓީން ރައީސް ނަޝީދާއެކު މަސައްކަތް ނުކުރާނެ ކަމަށެވެ.
