ޕީއެސްޖީގެ އެއްބަސްވުން ޕޮޗެޓީނޯ އާކޮށްފި

ޕީއެސްޖީއާއެކު އެ ޓީމުގެ ކޯޗު މައުރީސިއޯ ޕޮޗެޓީނޯ ހަދާފައިވާ އެއްބަސްވުން އާކޮށްފިއެވެ.

ޕީއެސްޖީގެ ކޯޗުގެ މަގާމާ އުމުރުން 49 އަހަރުގެ ޕޮޗެޓީނޯ ހަވާލުވީ މި އަހަރުގެ ޖެނުއަރީ މަހުގެ ތެރޭގައެވެ. ޕީއެސްޖީގެ ކޯޗަކަށް ޕޮޗެޓީނޯ ހަމަޖެއްސީ، 2018 ވަނަ އަހަރު އެ ޓީމާ ހަވާލުވި ތޯމަސް ޓުޗެލް މަގާމުން ވަކިކުރުމަށްފަހުއެވެ.

ޕީއެސްޖީއާއެކު ޕޮޗެޓީނޯ މީގެ ކުރިން ހަދާފައި އޮތް އެއްބަސްވުމުގެ މުއްދަތު ހަމަވަން އޮތީ އަންނަ އަހަރުގެ ހޫނު މޫސުމަށެވެ. އެކަމަކު އެ އެއްބަސްވުމުގެ ދަށުން ޕީއެސްޖީން ބޭނުންވާނަމަ އިތުރު އެއް އަހަރަށް އޭނާ އެ ޓީމުގައި ބެހެއްޓޭއިރު، އެ ފުރުސަތުގެ ބޭނުން ހިފައި ޕީއެސްޖީން ވަނީ ޕޮޗެޓީނޯގެ އެއްބަސްވުން 2023 ވަނަ އަހަރުގެ ހޫނު މޫސުމުގެ ނިޔަލަށް އާކޮށްފައެވެ.

ޕީއެސްޖީގެ އެއްބަސްވުން ޕޮޗެޓީނޯ އާކުރިއިރު، މި ފަހަރުގެ ޓްރާންސްފާ ބާޒާރުގައި ޕޮޗެޓީނޯ އަލުން އޭނާގެ ކުރީގެ ކުލަބު ޓޮޓެންހަމް ހޮޓްސްޕާއާ ހަވާލުވާން އުޅޭ ކަމަށް މީޑިއާގައި އަޑުފެތުރުނެވެ. އެއާއެކު ޕީއެސްޖީގެ ކޯޗަކަށް ރެއާލް މެޑްރިޑުގެ ކުރީގެ ކޯޗު ޒިނެދިން ޒިދާން ހަމަޖައްސަން އުޅޭ ކަމަށްވެސް މީގެ ކުރިން ވަނީ ރިޕޯޓުކޮށްފައެވެ.

ޕޮޗެޓިނޯގެ އިރުޝާދުގެ ދަށުން ކުރިއަށް އޮތް ސީޒަނަށް ޕީއެސްޖީ ކުރިމަތިލާއިރު، އެ ޓީމަށް ވަނީ މިދިޔަ ސީޒަނުގެ ފްރެންޗް ލީގު ގެއްލިފައެވެ. މިއީ ފާއިތުވި އަށް އަހަރު ތެރޭ ޕީއެސްޖީއަށް ލީގު ގެއްލުނު ފުރަތަމަ ފަހަރެވެ. އެކަމަކު ޕޮޗެޓީނޯގެ އިރުޝާދުގެ ދަށުން ޕީއެސްޖީން ވަނީ މިދިޔަ ސީޒަނުގެ ފްރެންޗް ކަޕާއި، ފްރެންޗް ސުޕަ ކަޕް ކާމިޔާބުކޮށްފައެވެ.

މީގެ ކުރިން ޕީއެސްޖީއަށް ކުޅުންތެރިއެއްގެ ގޮތުގައި ކުޅުނު ޕޮޗެޓީނޯ ވަނީ 2001 ވަނަ އަހަރުން ފެށިގެން 2003 ވަނަ އަހަރުގެ ނިޔަލަށް އެ ޓީމަށް ޖުމްލަ 95 މެޗު ކުޅެދީފައެވެ. އަދި މި މުއްދަތުގެ ތެރޭގައި އޭނާ ވަނީ ޕީއެސްޖީއާއެކު ޔުއެފާ އިންޓަޓޮޓޯ ކަޕް ކާމިޔާބުކޮށްފައެވެ.