ޓޮޓެންހަމުގެ އެއްބަސްވުން ސޮން އާކޮށްފި

ޓޮޓެންހަމް ހޮޓްސްޕާ އާއެކު ހަދާފައިވާ އެއްބަސްވުން ދެކުނު ކޮރެއާގެ ފޯވާޑް ސޮން ހުއެން-މިން އާކޮށްފިއެވެ.

ބަޔާ ލެވަކޫސެން ދޫކޮށް 2015 ވަނަ އަހަރު 22 މިލިޔަން ޕައުންޑަށް ޓޮޓެންހަމާ ގުޅުނު ފޯވާޑް، އެ ޓީމާއެކު މީގެ ކުރިން ހަދާފައި އޮތް އެއްބަސްވުން ހަމަވަން އޮތީ 2023 ވަނަ އަހަރު ޖޫން މަހުގެ ނިޔަލަށެވެ. އެކަމަކު މި ފަހަކަށް އައިސް ޓޮޓެންހަމުގައި ސޮން ދެއްކި މޮޅު ކުޅުމާއެކު، އޭނާގެ އެއްބަސްވުން ދިގު މުއްދަތަކަށް އާކުރަން މިދިޔަ އަހަރުގެ ތެރޭގައި ޓޮޓެންހަމުން މަސައްކަތް ފެށިއެވެ.

އެއާއެކު ޓޮޓެންހަމުގެ އެއްބަސްވުން ސޮން އާކުރިކަން ހުކުރު ދުވަހުގެ ވަގުތެއްގައި އެ ކުލަބުން ވަނީ ހާމަކޮށްފައެވެ. ޓޮޓެންހަމުގެ ބަޔާނުގައިވާ ގޮތުން ސޮން ވަނީ އެއްބަސްވުން އިތުރު ހަތަރު އަހަރަށް އާކޮށްފައެވެ. އެހެންކަމުން 2025 ވަނަ އަހަރުގެ ހޫނު މޫސުމުގެ ނިޔަލަށް އޭނާ ޓޮޓެންހަމުގައި މަޑުކުރާނެއެވެ.

ޓޮޓެންހަމުގައި ތަފާތު މޮޅު ކުޅުމެއް ދައްކަމުން އަންނަ ސޮން ވަނީ މިހާތަނަށް ޓޮޓެންހަމަށް ކުޅެދިން 280 މެޗުގައި 107 ލަނޑު ޖަހާފައެވެ. ޓޮޓެންހަމާއެކު ސޮންއަށް އަދި މިހާތަނަށް ކާމިޔާބީއެއް ހޯދިފައި ނުވި ނަމަވެސް، އެ ޓީމުން 2018-2019 ވަނަ އަހަރުގެ ސީޒަނުގެ ޔުއެފާ ޗެމްޕިއަންސް ލީގުގެ ފައިނަލުގައި މުޅިން އަލަށް ވާދަކުރިއިރު، ސޮންގެ ދައުރު ބޮޑެވެ.

މީގެ އިތުރުން ސޮންގެ ކެޕްޓަން ކަމުގެ ދަށުން ދެކުނު ކޮރެއާއިން ވަނީ 2018 ވަނަ އަހަރުގެ އޭޝިއަން ގޭމްސްގެ ފުޓްބޯޅަ އިވެންޓުން ރަން މެޑަލް ކާމިޔާބުކޮށްފައެވެ. އަދި އޭގެ ފަހުން އެ ގައުމުގެ ޤާނޫނުގައިވާ ގޮތުގެ މަތިން މިދިޔަ އަހަރުގެ ތެރޭގައި ސޮން ވަނީ އަސްކަރީ ތަމްރީނުތައްވެސް ފުރިހަމަކޮށްފައެވެ.