ސަރުކާރުން ހަރުކަށި ފިކުރަށް ތާއީދު ކުރާކަމަށް ދޭހަވާ މޭރުމުން ވާހަކަ ދެއްކެވުމަކީ ރަނގަޅު ކަމެއް ނޫންކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެމްބަރު ރޮޒެއިނާ އާދަމް ވިދާޅުވެއްޖެއެވެ.
ރޮޒެއިނާ ވިދާޅުވީ، ހަރުކަށި ފިކުރުގެ ބައެއް ސިފަތައް ގައުމުގެ އެތެރޭގައި ހުރިކަމަށާއި، އެއީ ކޮންމެ ގައުމެއްގައިވެސް ކަން ހިނގާ ގޮތް ކަމަށެވެ. ނަމަވެސް މުޅި ރާއްޖެއަކީ ހަރުކަށި ފިކުރަށް ތާއީދުކުރާ ނުވަތަ ރާއްޖޭގެ ސަރުކާރަކީ ހަރުކަށި ފިކުރަށް ތާއީދު ކުރާ ސަރުކާރެކޭ ބުނުމަކީ ރަނގަޅު ގޮތެއް ނޫން ކަމަށް ރޮޒެއިނާ ވިދާޅުވިއެވެ.
އޭގެ އިތުރުން، މި އަހަރުގެ އީދުގެ އުފަލާއި، އީދު ފާހަގަ ކުރުމަށް ބޭއްވި އެކި ހަރަކާތްތަކުންވެސް ރާއްޖޭގެ ސަގާފަތާއި، ގަބޫލުކުރުންތަކާއި، މިއުޒިކްގެ އެކި ހަރަކާތްތަކެއްވެސް ފެނިގެން ގޮސްފައިވާކަން ފާހަގަ ކުރައްވައި ރޮޒެއިނާ ވަނީ ރާއްޖެއަކީ ހަރުކަށި ފިކުރުގެ ގައުމެކޭ ބުނާ ވާހަކަތައް ކުށްވެރި ކުރައްވާފައެވެ.
ސަރުކާރު ހިންގާ މައި ޕާޓީ އެމްޑީޕީގެ އެތެރޭގައި ހަރުކަށި ފިކުރު އޮތް ކަމަށާއި، ރައީސް ސާލިހާއެކު ސިޔާސީ މަސައްކަތް ނުކުރެވޭނެ ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ދާދި ފަހުން ވިދާޅުވެފައިވާއިރު، އެ ވާހަކަތަކާއި ގުޅިގެން ރާއްޖޭގެ ސިޔާސީ މަސްރަހު ވަނީ ވަރަށް ބޮޑަށް ހަލަބޮލިވެފައެވެ. އަދި ސިޔާސީ އެކި ފަރާތްތަކުން ގެންދަނީ އެކަމާމެދު ޝުއޫރު ފާޅު ކުރަމުންނެވެ.
ދާދި ފަހުން މެމްބަރު ރޮޒެއިނާވެސް ވަނީ ހުރިހާ ކަމަކީ "އަޑުގަދަކޮށްގެން" ހައްލުވާނެ ކަންކަމެއް ނޫންކަން ފާހަގަ ކުރައްވައި، ރޭވުންތެރިކަމާއި ވިސްނުންތެރިކަމާއެކު ކަންކަން ހައްލު ކުރަންޖެހޭ ކަމަށް ވިދާޅުވެފައެވެ. ރޮޒެއިނާ ވަނީ ބަސްމަދުކޮށް އަމަލު ގިނަކުރާ އުސޫލު މުހިއްމުކަން ފާހަގަ ކުރައްވާފައެވެ.
ހަރުކަށި ފިކުރާ ދެކޮޅަށް ސަރުކާރުން މަސައްކަތް ކުރާ ކަމަށް ގިނަ ސިޔާސީ ފަރާތްތަކުން ބުނާއިރު، ކ. މާފުށީ ޖަލުގައި ތިބި ގައިދީންގެ ތެރެއިން ހަރުކަށި ފިކުުރުގެ ގައިދީން ދެނެގަތުމުގެ މަސައްކަތް ދާދި ފަހުން މޯލްޑިވްސް ކަރެކްޝަނަލް ސަރވިސްއިން ވަނީ ފަށާފައެވެ. އަދި އެފަދަ ގައިދީން ހޯދައި، އަންނަ އޮގަސްޓު މަހުގެ ތެރޭގައި ގައިދީން އެއް ޔުނިޓަށް ބަދަލު ކުރުމުގެ މަސައްކަތް ފަށާނެ ކަމަށާއި، އެ ޔުނިޓް ވެގެންދާނީ އެފަދަ ގައިދީންނަށް އަމާޒުކޮށް ތަފާތު ޕްރޮގްރާމްތައް ހިންގާ، ރިހެބިލިޓޭޓް ކުރުމުގެ ޕްރޮގްރާމްތައް ވެސް ހިންގާނެ ޔުނިޓެއްކަމަށް ކަރެކްޝަނުން ބުނެއެވެ.
