ހުޅުމާލޭގައި އެއްޗެއް ގޮވީ ވެލްޑިންކުރުމުގެ ތެރޭގައި: ފުލުހުން
23 ޖުލައި 2021 | ހުކުރު 10:46ބުރާސްފަތި ދުވަހުގެ ރޭ ގާތްގަނޑަކަށް 12:15 ހާއިރު
ބާރުގަދަ އަޑަކާއެކު އެއްޗެއް ގޮވި ސަރަހައްދުގައި ފުލުހުން ހަރަކާތްތެރިވަނީ
ހުޅުމާލޭގައި އެއްޗެއް ގޮވީ ވެލްޑިންކުރުމުގެ ތެރޭގައިކަމަށް ފުލުހުން ބުނެފިއެވެ.
ބުރާސްފަތި ދުވަހުގެ ރޭ ގާތްގަނޑަކަށް 12:15 ހާއިރު ހުޅުމާލޭ ބޯގަންވިލާ މަގުގައި ކުޅިވަރުކުޅުމަށް އޮންނަ ހުސްބިމު ސަރަހައްދުން ބާރު އަޑަކާއެކު އެއްޗެއް ގޮވި ކަމަށް ފުލުހުން މީގެ ކުރިން ބުނެފައިވެއެވެ. މި ހާދިސާއާ ގުޅިގެން އެ ސަރަހައްދަށް އާއްމުންނަށް ނުވަދެވޭނެ ގޮތަށް ބުރާސްފަތި ދުވަހުގެރޭ ވަނީ ބަންދުކޮށްފައެވެ.
މިހާރު އެ ސަރަހައްދު ހުސްކޮށް ނުރައްކަލެއް އޮތްތޯ ފުލުހުންނާއި ސިފައިން ގުޅިގެން ބަލާ ފާސްކުރުމަށްފަހު މިހާރު ވަނީ އާއްމުންނަށް އެ ސަރަޙައްދު ހުޅުވާލާފައެވެ. އަދި އެއްޗެއް ގޮވާފައިވަނީ އެ ސަރަޙައްދުގައި ހުރި ގެއަކުން ވެލްޑިންގ ކުރަން އުޅުމުގެ ތެރޭގައި ކަމަށް ފުލުހުން ވަނީ ބުނެފައެވެ.
ރާއްޖެ އެމްވީއަށް މައުލޫމާތުދިން އާއްމުންގެ މީހަކު ބުނީ އެއްޗެއް ގޮވި އަޑު ވަރަށް ބާރަށް އިވުނު ކަމަށާއި، އެވަގުތު އަލިފާން ވެސް ފެނުނު ކަމަށެވެ. އެމީހާ ބުނީ އަޑުން ހީވަނީ ގޮވާފައިވަނީ ގޭސްފުޅިއެއް ކަހަލަ އެއްޗެއްކަމަށް ލަފާކުރެވޭ ކަމަށެވެ. އެމީހާ ބުނީ އެވަގުތު ގިނަ އަދަދެއްގެ ބަޔަކު އެތަނަށް އެއްވިކަމަށެވެ.
