ޔޫރަޕްގެ އާބާދީގެ ފަންސާސް އިންސައްތަ މީހުން ވެކްސިން ފުރިހަމަކޮށްފި ކަމަަށް ޔޫރަޕިއަން ޔޫނިއަނުން ބުނެފިއެވެ.

އީޔޫން ބުނީ ބުރާސްފަތި ދުވަހުގެ ނިޔަލަށް ޔޫރަޕްގެ 200 މިލިއަން މީހުން ވެކްސިންގެ ދެ ޑޯޒް ފުރިހަމަ ކޮށްފައިވާ ކަމަށެވެ. އެހެންނަމަވެސް ޑެލްޓާ ވޭރިއަންޓު ފެތުރިދާނެ ކަމުގެ ބިރު އެބައޮތް ކަމަށެވެ. އީޔޫއިން ބުނީ އަމާޒުކުރި ލަނޑުދަނޑި އަދިވެސް ހާސިލްނުކުރެވޭ ކަމަށެވެ. އެ އިއްތިހާދުން އަމާޒުކުރީ، ހޫނު މޫސުން އައުމުގެ ކުރިން 70 އިންސައްތަ މީހުންނަށް ވެކްސިން ޖަހާ ނިންމުމަށެވެ.

ޖަރުމަންގެ ޗާންސެލަރ އެންގެލާ މާކެލް ވިދާޅުވީ، އެ ގައުމުގައި ބަލިފެތުރުން އިތުރުވަމުން އަންނަ ކަމަށެވެ. އެހެންކަމުން ވީހާވެސް އަވަހަށް ވެކްސިން ޖެހުމަށް ޗާންސެލަރވަނީ އެދިވަޑައިގެންފައެވެ. ޖަރުމަނުގައި ބަލިޖެހޭ މީހުންގެ ރޭޓު ހުރީ ކޮންމެ 100،000 މީހުންގެ ތެރެއިން 12.2 އިންސަތާގައެވެ. މިއީ ޖުލައި މަހުގެ ކުރީކޮޅާ އަޅާބަލާއިރު ދެގުނަ އިތުރު އަދަދެކެވެ. މިގޮތަށް ބަލި ޖެހޭ މީހުން އިތުރުވާނަމަ ފިޔަވަޅުތައް ވަރުގަދަ ކުރަން ޖެހިދާނެ ކަމުގެ އިންޒާރު ވެސް ޗާންސެލަރ ވަނީ ދެއްވާފައެވެ.

ޖަރުމަނަކީ ވެސް ޔޫރަޕްގެ ގައުމުތަކުގެ ތެރެއިން ޑެލްޓާ ވޭރިއަންޓް ހަލުވިކަމާއެކު ފެތުރެމުން އަންނަ ގައުމެކެވެ.