އަފްޣާނަށް ޚާއްސަކޮށްގެން އެމެރިކާއިން އިތުރު 8،000 ވިސާ ދެނީ
23 ޖުލައި 2021 | ހުކުރު 03:50އެމެރިކާއަށް ޚިދުމަތް ދެމުންދަނިކޮށް މަރުވެފައިވާ އަފްޣާން ރައްޔިތުންގެ އާއިލާތަކަށް ވެސް މި ވިސާއަށް އެދެވޭނެ
އަފްޣާނިސްތާނުގައި ތިބި އެމެރިކާ އަދި ނޭޓޯގެ ސިފައިން އެގައުމުން ފައިބަންވަނީ ފަށާފައި
އަފްޣާނިސްތާނަށް އެމެރިކާއިން އިތުރު 8،000 ވިސާ ދިނުމަށް ނިންމައިފިއެވެ.
ބުރާސްފަތި ދުވަހު އެމެރިކާގެ ހައުސް އޮފް ރެޕްރެޒެންޓޭޓިވުން ވަނީ، އަފްޣާނިސްތާނުގައި އެމެރިކާއަށް ޚިދުމަތްކޮށްދިން އަފްޣާން ރައްޔިތުންނަށް ވިސާ ދިނުމަށް ފާސްކޮށްފައެވެ. މި ބިލަށް ދެން ގޮތެއް ނިންމާނީ އެމެރިކާގެ ސެނެޓުންނެވެ. އެމެރިކާއަށް ޚިދުމަތް ދެމުންދަނިކޮށް މަރުވެފައިވާ އަފްޣާން ރައްޔިތުންގެ އާއިލާތަކަށް ވެސް މި ވިސާއަށް އެދެވޭނެއެވެ.
20 އަހަރަށްފަހު އެމެރިކާގެ ސިފައިން އަފްޣާނިސްތާނުން ފައިބަން ވަނީ ފަށާފައެވެ. މިއާއެކު ޠާލިބާނުން އަންނަނީ އަފްޣާނިސްތާނުގައި އަތްގަދަ ކުރަމުންނެވެ. އަނެއްކާވެސް އަފްޣާނިސްތާނު ކުރީގެ ހާލަތަށް އަތުވެދާނެކަމުގެ ބިރު ވަނީ ހީވެފައެވެ.
ހަނގުރާމަ ނިމުމަކަށް ގެނެސް އެގައުމުގައި ތިބި އެމެރިކާގެ ސިފައިން ބާލާނެކަމަށް އެމެރިކާގެ ރައީސް ޖޯ ބައިޑަން ވަނީ ވިދާޅުވެފައެވެ. ނަމަވެސް އެގައުމަށް އަސްކަރީ ގޮތުން އެހީތެރިކަން ފޯރުކޮށްދޭނެކަމަށާއި އިންސާނީ އެހެނިހެން އެހީތެރިކަން ވެސް ދޭނެކަމަށް އެމެރިކާއިން ވަނީ ވައުދުވެފައެވެ.
އެހެންނަމަވެސް ކުރިން ކަންތައް ވީގޮތަށް އިންސާނީ ހައްގުތަކަށް ވަކިން ޚާއްސަކޮށް އަންހެނުންނާއި އަންހެން ކުދިންގެ ހައްގުތަކަށް އަރައިގަންނަ ކަމަށްވާނަމަ އެހީތެރިކަން ދިނުން މެދުކަނޑާލާނެކަމަށް އެމެރިކާއިން ވަނީ ބުނެފައެވެ.
