މާލޭގެ އަޣުލަބިއްޔަތު ނުލިބުނީ ސަރުކާރުގެ ސިޔާސަތުތަކުގެ ސަބަބުން: ރައީސް ނަޝީދު

ނިމިދިޔަ ލޯކަލް ކައުންސިލް އިންތިޚާބުގައި މާލޭގެ މެޖޯރިޓީ އެމްޑީޕީއަށް ކާމިޔާބުނުވީ ސަރުކާރުން ގެންގުޅުނު ސިޔާސަތުތަކުގެ ސަބަބުން ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު މިފަދައިން ވިދާޅުވީ އިންޑިއާގެ ވިއޯން ޓީވީއަށް ދެއްވި އިންޓަރވިއުއެއްގައެވެ.

މި އިންޓަރވިއުގައި ނިމިދިޔަ ލޯކަލް ކައުންސިލް އިންތިޚާބުގައި މާލެ ސިޓީން ޕީޕީއެމަށް ލިބުނު ތާއީދާ ގުޅޭގޮތުން ސުވާލުކުރެއްވުމުން ރައީސް ނަޝީދު ވިދާޅުވީ މި އިންތިޚާބުގައި އެމްޑީޕީއަށް މާލެ ސިޓީ ކާމިޔާބު ނުކުރެވުނީ ސަރުކާރުން ގެންގުޅު ސިޔާސަތުތަކުގެ ސަބަބުން ކަމަށެވެ.

ސަރުކާރުގެ ސިޔާސަތުތައް ރައްޔިތުން ބޭނުންވާ ގޮތަށް ބަދަލުކޮށްފިނަމަ ރައްޔިތުން އެކަން ބަލައިގަންނާނެ ކަމަށާއި، ވޯޓުލާން ވެސް ނިކުންނާނެ ކަމަށް ރައީސް ނަޝީދު ވިދާޅުވިއެވެ.

ނިމިދިޔަ ކައުންސިލް އިންތިޚާބުގައި މާލެ ސިޓީއަށް ލިބުނު ނާކާމިޔާބީއަކީ ރައްޔިތުން ސަރުކާރަށް ދިން ވަރަށް ބޮޑު މެސެޖެއް ކަމަށް ރައީސް ނަޝީދު ވިދާޅުވިއެވެ.

އެހެންކަމުން މިކަންކަމަށް ސަރުކާރުން އިތުރު ސަމާލުކަމެއްދީ، މިކަންކަން ހައްލުކުރަން މަސައްކަތްކުރަންޖެހޭ ކަމަށް ރައީސް ނަޝީދު ވިދާޅުވިއެވެ.

މި އިންޓަރވިއުގައި އެމްޑީޕީގެ އެތެރޭގެ ގުޅުން އޮތް ގޮތާ ގުޅޭގޮތުން ސުވާލުކުރުމުން ރައީސް ނަޝީދު ވަނީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙާއި އެމަނިކުފާނާ ދެމެދު ޚިޔާލު ތަފާތުވުންތަކެއް ހުރިކަމުގައި ވިޔަސް ދެ ބޭފުޅުންގެ ދެމެދުގެ ގުޅުމަށް އެއްވެސް ބަދަލެއް ނާންނަކަން ފާހަގަކުރައްވާފައެވެ.

އެހެންނަމަވެސް ގައުމުގައި މިވަގުތު ކޮންމެހެން ހައްލުކުރަންޖެހޭ ކަންތައްތައް ހައްލުކުރުމަށް ރައީސުލްޖުމްހޫރިއްޔާ މަސައްކަތްކުރައްވަންޖެހޭނެ ކަމަށް ގަބޫލުފުޅުކުރައްވާ ކަމަށް ރައީސް ނަޝީދު ވިދާޅުވިއެވެ.  

އެގޮތުން މެދުމިނުގެ ދީނީ ފިކުރެއް ގާއިމުކުރުމާއި، ހައްދުފަހަނަ އަޅައި ދިޔުންފަދަ ކަންކަމަށް ތާއީދު ނުކުރުމަށް ރައީސް ނަޝީދު ވަނީ ސަރުކާރަށް ގޮވާލައްވާފައެވެ.