ރާމޯސްގެ ހަތަރު ނަންބަރު ޖާޒީ އަލަބާއަށް

ޕީއެސްޖީއަށް ބަދަލުވި ރެއާލް މެޑްރިޑުގެ ލެޖެންޑް ސާޖިއޯ ރާމޯސްގެ ހަތަރު ނަންބަރު ޖާޒީ އެ ޓީމާ ދާދި ފަހުން ގުޅުނު އޮސްޓްރިއާގެ ޑިފެންޑަރު ޑޭވިޑް އަލަބާއަށް ދީފިއެވެ.

ރެއާލުގައި 16 އަހަރު ހޭދަކުރުމަށްފަހު އުމުރުން 35 އަހަރުގެ ރާމޯސް ވަނީ މިދިޔަ ޖޫން މަހުގެ ތެރޭގައި ރެއާލް ދޫކޮށްލަން ނިންމިކަން އިއުލާން ކޮށްފައެވެ. ރިޕޯޓުތައް ބުނާ ގޮތުން ރެއާލާއެކު ހަދާފައިވާ އެއްބަސްވުން އާކުރަން ރާމޯސް މީގެ ކުރިން ބޭނުންވި ނަމަވެސް، ރެއާލުން ވަނީ ރާމޯސްގެ ހުށަހެޅުމަށް ދެކޮޅު ހަދާފައެވެ. އެހެންކަމުން ހިލޭ ޓްރާންސްފާއެއްގެ ދަށުން ރާމޯސް ވަނީ ޕީއެސްޖީއަށް ސޮއިކޮށްފައެވެ. ރާމޯސް ޕީއެސްޖީއާ ގުޅުނީ ދެ އަހަރުގެ އެއްބަސްވުމެއްގެ ދަށުންނެވެ.

ރާމޯީސް ރެއާލް ދޫކޮށްލިއިރު، މެއި މަހުގެ ތެރޭގައި އެ ޓީމުން ވަނީ އުމުރުން 29 އަހަރުގެ އަލަބާގެ ސޮއި ހޯދާފައެވެ. އެއަށްފަހު ރެއާލުގެ ކުޅުންތެރިއެއްގެ ގޮތުގައި ރަސްމީކޮށް އަލަބާ ދައްކާލީ ބުދަ ދުވަހު ބޭއްވި ހާއްސަ ރަސްމިއްޔާތެއްގައެވެ. މި ރަސްމިއްޔާތުގައި ވަނީ އަލަބާއަށް ރާމޯސް ކުޅެމުން އައި ހަތަރު ނަންބަރު ޖާޒީ ދީފައެވެ.

ބަޔާން މިއުނިކުގައި 13 އަހަރު ހޭދަކުރުމަށްފަހު އަލަބާ ރެއާލަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. އަދި އަލަބާ ވަނީ ރެއާލާއެކު ފަސް އަހަރުގެ އެއްބަސްވުމެއް ހަދާފައެވެ. އަލަބާ ރެއާލަށް ބަދަލުވިއިރު، ރިޕޯޓުތައް ބުނާ ގޮތުން އަލަބާ ހޯދަން އިނގިރޭސި ޕްރިމިއާ ލީގުގެ އެންމެ ފަހުގެ ދެ ޗެމްޕިއަނުން ކަމަށްވާ މެންޗެސްޓާ ސިޓީ އާއި ލިވަޕޫލުން ވަނީ މަސައްކަތްކޮށްފައެވެ.

އޮސްޓްރިއާގެ ޔޫތު ޓީމުތަކުން ފާހަގަވި އަލަބާ އެންމެ ފުރަތަމަ ބަޔާނުގެ ޔޫތު ޓީމާ ގުޅުނީ 2008 ވަނަ އަހަރުއެވެ. އަދި 2010 ވަނަ އަހަރު ބަޔާނުގެ ސީނިއާ ޓީމަށް އަލަބާ ޕްރޮމޯޓުވިއިރު، އޭގެ ފަހުން އެއް ސީޒަނުގައި އަލަބާ ވަނީ ލޯނު އެއްބަސްވުމެއްގެ ދަށުން ހޮފެންހެއިމަށްވެސް ކުޅެފައެވެ.

އެކަމަކު ފަހުން ބަޔާނުގެ ސީނިއާ ޓީމުގެ މުހިންމު މެންބަރަކަށް އަލަބާ ވިއިރު، އޭނާ ވަނީ ބަޔާނަށް 431 މެޗު ކުޅެދީ 33 ލަނޑު ޖަހާފައެވެ. އަދި ވަނީ ބަޔާނާއެކު ޖަރުމަން ލީގު 10 ފަހަރު، ޔުއެފާ ޗެމްޕިއަންސް ލީގު ދެ ފަހަރު އަދި ފީފާ ކުލަބު ވޯލްޑް ކަޕް ދެ ފަހަރު ކާމިޔާބުކޮށްފައެވެ.