ގައުމީ ޓީމަށް ކުޅުންތެރިން ނެގުމުގައި ހާއްސަ އުސޫލުތަކެއް

ގައުމީ ފުޓްބޯޅަ ޓީމަށް ކުޅުންތެރިން ނެގުމުގައި ހާއްސަ އުސޫލުތަކެއް ކަނޑައެޅުމަށް މަސައްކަތް ކުރަމުން އަންނަ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ އެހާ ފަސޭހައިން ގައުމީ ޓީމަށް ކުޅުންތެރިން އެރިގެން ނުވާނެ ކަމަށާއި، އެހެންކަމުން ގައުމީ ޓީމަށް ކުޅުންތެރިން ހޮވޭނެ ކްރައިޓީރިއާތަކެއް އޮންނަން ޖެހޭ ކަމަށެވެ. އަދި ގައުމު ތަމުސީލުކުރަންދާއިރު މުޅި އަހަރު ތެރޭގައި ކުލަބުތަކުގައި ބުރަ މަސައްކަތް ކުރާ ކުޅުންތެރިންނަށް ފުރުސަތުތަކެއް އޮންނަން ޖެހޭ ކަމަށާއި، އަލަށް ޓީމަކާ ގުޅިގެން އަންނަ ކުޅުންތެރިއަކަށް ގައުމީ ޓީމަށް ކުޅުމަކީ އެހާ ފަސޭހަ ކަމަކަށް ވެގެން ނުވާނެ ކަމަށްވެސް ވިދާޅުވިއެވެ.

ބައްސާމް ވިދާޅުވީ ވަރަށް އަވަހަށް މި ކްރައިޓީރިއާތައް ހަދައި، ކުރިއަށް އޮތް މަސް ތެރޭގައި އިއުލާން ކުރެވިގެންދާނެ ކަމަށެވެ. އަދި އެއަށްފަހު ހުރިހާ ކުޅުންތެރިންނާއި، ކުލަބުތައް އަދި ކޯޗުންނަށްވެސް މި ކްރައިޓީރިއާތައް ހިއްސާކުރެވިގެންދާނެ ކަމަށް ވަނީ ވިދާޅުވެފައެވެ. އަދި ގައުމީ ޓީމަށް ކުޅުންތެރިން ނެގުމަށް ކޮމިޓީއެއްގެ ގޮތުގައި ބޯޑެއް އެކުލަވާލެވިގެންދާނެ ކަމަށާއި، ކޮންމެ ފަހަރަކު ޓީމު ފުރުމުގެ ކުރިން ނުވަތަ ޓީމު އެކުލަވާލުމަށްފަހު މީޑިއާއަށް ސްކޮޑް ހާމަކުރުމުގެ ކުރިން، ޓީމަށް ނެގި ކުޅުންތެރިންގެ ތަފުސީލުތައް އޭރު ހުންނަ ކޯޗަކު ކިޔާދޭން ޖެހޭނެ ކަމަށްވެސް ވަނީ ވިދާޅުވެފައެވެ.

އަދި މި ކްރައިޓީރިއާތަކާއެކު ކުރިއަށް އޮތް ތަނުގައި ގައުމީ ޓީމަށް ކުޅުންތެރިން ނެގުމުގައި މައްސަލަތަކެއް ދިމާނުވާނެ ކަމަށާއި އެކަމަކު އެންމެ ރަނގަޅަށް މިކަން ކުރެވޭނީ ދިވެހި ޕްރިމިއާ ލީގުގެ 2023-2024 ވަނަ އަހަރުގެ ސީޒަނުގައި އަންނާނެ ބަދަލުތަކާއެ، އެ ލީގަށް އެކުލެވިގެންދާ ބޯޑާއެކުގައި ކަމަށްވެސް ވަނީ ވިދާޅުވެފައެވެ.

ބައްސާމް އިތުރަށް ވިދާޅުވީ ކްރައިޓީރިއާތައް ކަނޑައަޅާއިރު ގައުމީ ޓީމަށް ނަގާ ކުޅުންތެރިއަކު ވަކި އަދަދަކަށް އަހަރު ތެރޭގައި މެޗު ކުޅެވެންޖެހޭނެ ކަމަށާއި، ނުވަތަ ވަކި އަދަދަކަށް މިނެޓު ފުރިހަމަ ކުރަންޖެހޭނެ ކަމަށެވެ. އަދި އެ ކުޅުންތެރިޔާގެ އަޚުލާގަށްވެސް ބަލަން ޖެހޭނެ ކަމަށާއި، އެގޮތުން އެ ކުޅުންތެރިއަކު ކުޅުނު މެޗުތަކުގައި އެ ކުޅުންތެރިއަކަށް ދެއްކި ކާޑުތައްވެސް ބަލަން ޖެހޭ ކަމަށް ވިދާޅުވިއެވެ.

ހަމަ އެއާއެކު ކުޅުންތެރިއާގެ ފިޓްނަސްއަށް ބަލަންޖެހޭ ކަމަށާއި، އެގޮތުން ގައުމީ ޓީމަށް ނަގާ ކުޅުންތެރިއަކު އަހަރަކު ތިންވަރަކަށް ފިޓްނަސް ޓެސްޓު ހަދަން ޖެހޭނެ ކަމަށްވެސް ވަނީ ވިދާޅުވެފައެވެ.

ބައްސާމް ވިދާޅުވީ މިކަހަލަ ގޮތަކަށް ކްރައިޓީރިއާތައް ކަނޑައެޅުމަށް ވިސްނަމުން އައި ނަމަވެސް، މި ނިންމުންތައް ނިންމާނީ އެފްއޭއެމުގެ ޓެކްނިކަލް ޑިޕާޓްމަންޓުން ކަމަށެވެ.

ގައުމީ ޓީމަށް ކުޅުންތެރިން ނެގުމުގައި ހާއްސަ އުސޫލުތަކެއް އެކުލަވާލާއިރު، މި ފަހަކަށް އައިސް ގައުމީ ޓީމަށް ކުޅުންތެރިން ނެގުމުގައި އެންމެ އިންސާފުވެރި ނިންމުންތައް ނިންމާފައިނުވާ ކަމަށް ބުނެ އެފްއޭއެމަށް ގިނަ ބަޔަކު ވަނީ ފާޑުކިޔާފައެވެ.