ކޮވިޑާ ގުޅިގެން ހާލުގައި ޖެހިފައިވާ 71 އާއިލާއަކަށް އެހީ ފޯރުކޮށްދީފި
ދިރިއުޅުމަށް ބޭނުންވާ ގޯތި ގެދޮރު ހަމަޖައްސައިދޭ
މިނިސްޓަރ އޮފް ޖެންޑަރ ފެމިލީ އެންޑް ސޯޝަލް ސާވިސަސް އާއިޝަތު މުހައްމަދު ދީދީ
އަހުލު ޕްރޮގްރާމުގެ ތެރެއިން 71 އާއިލާއަކަށް މިހާތަނަށް އެހީތެރިކަން ފޯރުކޮށްދީފައިވާކަމަށް ޖެންޑަރ މިނިސްޓްރީން ބުނެފިއެވެ.
މިއީ ކޮވިޑް-19 އާއެކު ދިރިއުޅުމުގެ ހާލަތު ބަދަލުވުމާ ގުޅިގެން ދިރިއުޅޭ ރަށް ނޫން އެހެން ރަށަކަށް ބަދަލުވާން ޖެހިފައިވާ މީހުންނަށް އެހީތެރިކަން ފޯރުކޮށްދިނުމަށް ފަށާފައިވާ ޕްރޮގްރާމެކެވެ.
މި ޕްރޮގްރާމުގެ ތެރެއިން އެމީހުންގެ ދިރިއުޅުމަށް ބޭނުންވާ ގޯތި ގެދޮރު ހަމަޖައްސައިދިނުމާއި، މާލީ އެހީތެރިކަން ފޯރުކޮށްދިނުމާއި، އެމީހުންނަށް ވަޒީފާގެ ފުރުސަތު ތަނަވަސްކޮށްދިނުމާއި، އެ އާއިލާއެއްގައި ހިމެނޭ ސްކޫލަށް ދާ އުމުރުފުރައިގެ ކުދިން އެހެން ސްކޫލަކަށް ބަދަލުކުރުން ހިމެނެއެވެ.
ޖެންޑަރ މިނިސްޓްރީން ބުނީ އަހުލު ޕްރޮގްރާމުގެ ތެރެއިން މިހާތަނަށް 71 އާއިލާއަކަށް އެހީތެރިކަން ފޯރުކޮށްދީފައިވާ ކަމަށެވެ.
އެގޮތުން އެހީއަށް އެދި ފޯމު ހުށަހަޅާފައިވާ 29 އާއިލާއެއްގެ ތެރެއިން 25 އާއިލާއަކަށް އެ ފަރާތްތަކުގެ ރަށުގައި ވަޒަންވެރިވުމަށް މިހާތަނަށް އެހީތެރިކަން ފޯރުކޮށްދީފައިވާނެ ކަމަށް ޖެންޑަރ މިނިސްޓްރީން ބުނެފައިވެއެވެ.
15 އާއިލާއަކަށް 3 މަހުގެ މާލީ އެހީތެރިކަން ފޯރުކޮށްދީފައިވާ ކަމަށާއި، 7 އާއިލާއަކަށް 6 މަހުގެ މާލީ އެހީތެރިކަން ފޯރުކޮށްދީފައިވާ ކަމަށް މިނިސްޓްރީން ބުނެފައިވެއެވެ.
7 އާއިލާއަކަށް 20،000ރ. ގެ ލޯނު އެހީތެރިކަން ދީފައިވާ ކަމަށާއި، އިތުރު 11 އާއިލާއަކަށް ދަތުރުގެ ޚަރަދު އަދި މާލީ އެހީތެރިކަން ފޯރުކޮށްދިނުމަށް ހަމަޖެހިފައިވާ ކަމަށް ޖެންޑަރ މިނިސްޓްރީން ބުނެފައިވެއެވެ.
13 އާއިލާއެއް މި ޕްރޮގްރާމްއަށް ހުށަހެޅުމުގެ ކުރިން އަމިލްލައަށް ރަށަށް ބަދަލުވެފައި ވާތީ އެފަރާތްތަކަށް ދަތުރުގެ ޚަރަދު ދެވިފައި ނުވާކަމަށް މިނިސްޓްރީން ވަނީ ބުނެފައެވެ.
ކޮވިޑްގެ ސަބަބުން ދިރިއުޅުމުގެ ހާލަތަށް ނޭދެވޭ އަސަރުކޮށް، އެހެން ރަށްރަށަށް ބަދަލުވާން ބޭނުންވާ ފަރާތްތަކަށް އަމާޒުކޮށް ޖެންޑަރ މިނިސްޓްރީން ހިންގާ މި ޕްރޮގްރާމަށް ސަރުކާރުގެ ނިއު ޕޮލިސީ އިނީޝިއޭޓިވްސްގެ ދަށުން ވަނީ 25 މިލިއަން ރުފިޔާ ކަނޑައަޅާފައެވެ.
މީގެ ތެރެއިން 10 މިލިއަން ރުފިޔާ ހަމަޖެހިފައިވަނީ މި އަހަރު ބަދަލުކުރުމަށް ކަނޑައަޅާފައިވާ 500 އާއިލާއަކަށް ލޯނުގެ ގޮތުގައި ދިނުމަށެވެ.
ދިރިއުޅުމުގެ ހާލަތު ބަދަލުވެފައިވާ ފަރާތްތަކަށް ސަރުކާރުން ފޯރުކޮށްދޭ އެހީއަށް އެދުމުގެ ފުރުސަތު އަދިވެސް ވަނީ ހުޅުވާލާފައެވެ. މިކަމަށް އެދި ހުށަހަޅާ ފޯމު ޖެންޑަރ މިނިސްޓްރީގެ ކައުންޓަރުންނާއި،ވެބްސައިޓުންލިބޭނެ ކަމަށް އެ މިނިސްޓްރީން ބުނެފައިވެއެވެ.
މި ފޯމް ހުށަހަޅަންޖެހެނީ އެހީއަށް އެދޭ ފަރާތުން ވަޒަންވެރިވާން ބޭނުންވާ ރަށުގެ ކައުންސިލްގެ އިދާރާއަށެވެ.
