އެކި މީހުން މަޝްހޫރު ވަނީ އެކި ކަންކަމަށެވެ. މީހުންގެ ސަމާލުކަން ލިބެނީ ވެސް އެމީހެއްގެ ހުންނަ ތަފާތު ހުނަރަކަށް ނުވަތަ ކުރާ ތަފާތު ކަމަކަށެވެ. ޚާއްސަކޮށް ކޮންމެ ގައުމެއްގެ ވެސް ރައީސުން ކުރާ ކަންކަމަކީ ގިނަ ބައެއްގެ ލޯތައް އެކަމަކަށް އަމާޒުވާ ކަންކަމެވެ. އަދި އެ ކަމެއްގެ ވާހަކަ ގިނަ ބަޔަކު ދައްކާ ކަމަކަށް އެކަން އޮންނަނީ ވެފައެވެ. ރައީސުލްޖުމްހޫރިއްޔާ އިބްރާހީމް މުހައްމަދު ޞާލިޙް އެންމެ ފުރަތަމަ ވެސް ފާހަގަ ކުރެވިގެން ދިޔައީ ފޮޓޯ ނަންގަވަން ލޯބި ކުރައްވާ ބޭފުޅެއްގެ ގޮތުގައެވެ. ރިޔާސީ އިންތިޚާބުގެ ކެމްޕޭނުގައި އެމަނިކުފާނު ނެންގެވި ސެލްފީތަކުގެ ވާހަކައަކީ ގިނަ ބައެއްގެ ދުލުން ދެކެވުނު ވާހަކައެވެ. ވެރިކަމަށް ވަޑައިގަތުމަށްފަހު ވެސް އެމަނިކުފާނުގެ ސެލްފީ ނެންގެވުމަށް ބަދަލެއް ނާދެއެވެ. ފޮޓޯ ނެންގެވުމަކީ ހޮބީ އެއްގެ ގޮތުގައި ކުރައްވާ ކަމެވެ.
ސުކޫލް ދައުރުގައި އުފެދުނު ޝައުގުވެރިކަން އަދިވެސް ފޮޓޯގްރަފީއަށް އެމަނިކުފާނުގެ ހިތްޕުޅުގައި އޮންނަވާކަން ނަންގަވާ ފޮޓޯތަކުން އެނގެއެވެ. އެކި ދަތުރުފުޅުތަކުގައި ވަޑައިގަންނަވާ ތަންތަނުގެ ފޮޓޯ އެމަނިކުފާނުގެ އަމިއްލަފުޅު ގެލަރީގައި ރައްކާކުރައްވައެވެ. އެމަނިކުފާނު އެކި ތަންތަނަށް ކުރައްވާ ދަތުރުފުޅުތަކުގައި ނަންގަވާ ސެލްފީގެ އިތުރުން އަނބިކަނބަލުންނާއެކު ނަންގަވާ ސެލްފީތަކާއި ފޮޓޯތައް ވެސް ވަރަށް ޝައުގުވެރިއެވެ. އަނބިކަނބަލުންނާއެކު ކުރައްވާ ދަތުރުފުޅުތަކުގައި ޚާއްސަ ތަންތަނުގައި ފޮޓޯ ނެންގެވުމަށް ލޯބި ކުރައްވައެވެ. އަދި އަމިއްލަފުޅަށް ނަންގަވާ ފޮޓޯތައް އެމަނިކުފާނުގެ އިންސްޓަގްރާމްގައި ހިއްސާ ކުރައްވައެވެ.
އެންމެ ފަހުން އަތޮޅުތެރެއަށް ކުރެއްވި ދަތުރުފުޅުގައި ހދ. ކުމުންދޫގެ ކުޅިއަށް ވަޑައިގެން އަނބިކަނބަލުންނާއެކު ނަންގަވާފައިވާ ފޮޓޯ ވަރަށް ވެސް ހިތްގައިމެވެ. ދެކަނބަލުންގެ މޫނުފުޅުން އުފާވެރިކަމާއި ލޯބި ފެނެއެވެ. ދެކަނބަލުންގެ ހިނިތުންވުމުން ވަރަށް ގިނަ ވާހަކަތައް ދޭހަވެއެވެ. މި ފޮޓޯ އެންމެ ފުރަތަމަ ފެނުނު ވަގުތު ކައިރީގައި ހުރި ރައްޓެއްސެއް ގާތު ބޭއިޚްތިޔާރުގައި ބުނެލެވުނީ "ރައީސް ހާދަ ފޮޓޯޖެނިކޭ" މިހެންނެވެ. ފޮޓޯ ވަރަށް ވެސް ފުރިހަމައެވެ. އެ ހިތްގައިމު ގުދުރަތީ މާހައުލުގެ ހިތްހަމަޖެހުން ދެކަނބަލުންގެ މޫނުފުޅުން ވަރަށް ސާފުކޮށް ފެނެއެވެ.
މިފަދަ ފޮޓޯއެއް މީގެ ކުރިން ވެސް ފެނިގެން ދިޔައެވެ. ވެރިކަމަށް ވަޑައިގެން އެންމެ ފުރަތަމަ އިންޑިއާއަށް ކުރެއްވި ދަތުރުފުޅުގައި ތާޖް މަހަލްގައި ނަންގަވާފައިވާ ފޮޓޯ ވެސް ހަމަ އެހާ ހިތްގައިމެވެ. ތާޖް މަހަލަކީ ލޯބީގެ ނިޝާނެކެވެ. ދެކަނބަލުން ތާޖް މަހަލްގައި ނަންގަވާފައިވާ ފޮޓޯއިން ވެސް ދެކަނބަލުންގެ ދެމެދުގައިވާ ލޯބި ރަމްޒުކޮށްދެއެވެ. އެ ފޮޓޯގައި ވެސް އެމަނިކުފާނުގެ މޫނުފުޅުން ފެންނަ ހިނިތުންވުމުން ފޮޓޯ ނެންގެވުމަށް އޮންނަވާ ޝައުގުވެރިކަން ފާޅުވެއެވެ.
ރައީސަކީ އަބަދުވެސް ކެމެރާއާ ރަށްޓެހި ބޭފުޅެކެވެ. ސިޔާސީ ދާއިރާއަށް ވެދެވަޑައިގަތުމުގެ ކުރިން މަސައްކަތް ކުރެއްވީ މީޑިއާގައެވެ. އަމިއްލަފުޅު ފޯނުން ރީތި މަންޒަރުތައް ފޮޓޯ ނަންގަވާއިރު އަމިއްލަފުޅު ހަޔާތްޕުޅުގެ ހަނދާންތައް ވެސް ގެންދަވަނީ ރީތި ތަސްވީރުތަކާއެކު ރައްކާކުރައްވަމުންނެވެ.
