އާއިލާތަކާ ކުދިން ހަވާލުކުރުމަށް ކޮމިޓީ މަރުހަލާއަކަށް
ކޮމިޓީ ޖަވާބުދާރީ ވާނީ މިނިސްޓަރަށް
ކުޑަކުދިންތަކެއް
ދައުލަތުގެ ބެލުމުގެ ދަށަށް ގެންދާ ކުޑަކުދިން، އަލުން އެކުދިންގެ އާއިލާއާ ހަވާލުކުރުމުގެ ކަންކަން ދެން ކުރިއަށްދާނީ ކޮމިޓީ މަރުހަލާއެއްގެ ތެރެއިން ކަމަށް ޖެންޑަރ މިނިސްޓްރީން ބުނެފިއެވެ.
ޖެންޑަރ މިނިސްޓްރީން ބުނީ ދައުލަތުގެ ބެލުމުގެ ދަށަށް ގެނެވޭ ކުޑަކުދިން، އަލުން އެކުދިންގެ އާއިލާތަކާ ހަވާލުކުރުމަށް އެކުލަވާލާ ކޮމިޓީއަކީ މި ކުދިންގެ ކަންކަން ބެލުމުގައި ޗައިލްޑް އެންޑް ފެމިލީ ޕްރޮޓެކްޝަން ސާވިސްއަށް ލަފާދިނުމުގެ އެންމެ އިސް ދައުރެއް އަދާކުރާނެ ފަރާތް ކަމަށެވެ.
މި ކޮމިޓީ އެކުލަވާލައްވާނީ ޖެންޑަރ މިނިސްޓަރު ކަމަށާއި، މި ކޮމިޓީ ޖަވާބުދާރީ ވާނީ މިނިސްޓަރަށް ކަމަށް އެ މިނިސްޓްރީން ބުނެފައިވެއެވެ.
ކޮމިޓީގެ އިދާރީ ކަންކަން ހިންގައި ބަލަހައްޓާނީ ޗައިލްޑް އެންޑް ފެމިލީ ޕްރޮޓެކްޝަން ސާވިސްއިން ކަމަށް ޖެންޑަރ މިނިސްޓްރީން ވަނީ ބުނެފައެވެ.
ޖެންޑަރ މިނިސްޓްރީން ބުނީ މި ކޮމިޓީގެ މަސައްކަތްތަކުގެ ތެރޭގައި ހިމެނެނީ ދައުލަތުގެ ބެލުމުގެ ދަށަށް ގެންނަ ކުދިންގެ ތެރެއިން އާއިލާތަކާ ހަވާލުކުރުމަށް ތައްޔާރުވެފައިވާ ކުދިންނަކީ ކޮބައިކަން ނިންމުމާއި، އެ ކުއްޖާ ހަވާލުކުރުމަށް އެންމެ އެކަށީގެންވާ ފަރާތްކަމަށް އެ މައްސަލައަކާ ހަވާލުވެހުރި އިޖުތިމާއީ ޚިދުމަތްތެރިޔާ ފާހަގަކުރާ ފަރާތްތަކާބެހޭ ލިޔުންތަކާއި އެސެސްމެންޓް ރިޕޯޓު ދިރާސާކުރުން ކަމަށެވެ.
ދައުލަތުގެ ބެލުމުގެ ދަށުގައި ހުންނަ ކުއްޖާ، އާއިލާގެ ފަރާތުން ހަވާލުކުރަން ގަސްތުކުރާ ފަރާތާ އިންޓަރވިއު ކުރަން ޖެހިއްޖެ ހާލަތެއްގައި އިންޓަރވިއު ކުރުމާއި، އެކުދިން އާއިލާތަކާ ހަވާލުކުރުމުގެ ކުރިން ނިންމަންޖެހޭ އެހެނިހެން އިދާރީ މަސައްކަތްތައް ވެސް ނިންމާނީ މި ކޮމިޓީން ކަމަށް ޖެންޑަރ މިނިސްޓްރީން ބުނެއެވެ.
އެކުދިން އާއިލާތަކާ ހަވާލުކުރުމާބެހޭ ހުރިހާ މަރުހަލާއެއްގައި މި ކުދިން އާއިލާތަކާ ހަވާލުކުރުމުގެ ގާނޫނުގެ 4 ވަނަ މާއްދާގައި ބަޔާންކޮށްފައިވާ އަސާސީ އުސޫލުތައް ނެގެހެއްޓޭނެކަން ކަށަވަރުކުރާނެ ކަމަށް ޖެންޑަރ މިނިސްޓްރީން ވަނީ ބުނެފައެވެ.
އެގޮތުން އާއިލާތަކާ ހަވާލުކުރާ ކުދިންގެ ހާލަތު ބެލުމާއި، ކޮމިޓީގެ ހުރިހާ މަސައްކަތެއް ކުރުމުގައި ވެސް ކުއްޖާކު ކަރާމާތަށް އިސްކަންދޭނެ ކަމަށް ޖެންޑަރ މިނިސްޓްރީން ބުނެފައިވެއެވެ.
މި ކޮމިޓީގައި ސިވިލް ސާވިސް މުވައްޒަފުންގެ އިސް މުވައްޒަފުންނާއި، ގާނޫނީ ވަކީލަކާއި، ސައިކޮލޮޖިސްޓެއް ހަރަކާތްތެރިވާނެ ކަމަށް ޖެންޑަރ މިނިސްޓްރީން ވަނީ ބުނެފައެވެ.
