އިސްލާމް ދީނުގެ ބުރުސޫރަ ހުތުރުކުރުވާ މީހުންނަށް ނޫނެކޭ ބުނަން ކެރޭވަރުގެ މުސްލިމް ދަރިންނަށް މިއަދު ވަނީ ބޭނުންވެފައި ކަމަށް އީދު ޚުތުބާގައި ބުނެފިއެވެ.
އަޟްހާ އީދު ދުވަހު ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ މިއަދު މި ވަނީ އެމީހުންގެ ވަގުތުންނާއި، މުދަލުންނާއި، އީޖާދުތަކުން، އިސްލާމް ދީނަށްޓަކައި ގުރުބާން ވާން ކެރޭ މީހުންނަށް ބޭނުންވެފައި ކަމަށެވެ. އަދި މުސްލިމުންގެ އީދަކީ މިނިވަންކަމުގެ އީދެއް ކަމަށެވެ. ޚުތުބާގައި ބުނީ މި ދުވަސްތަކުގައި، މާތް ﷲ ގެ އަމުރުފުޅާ އެއްގޮތަށް އުފާ ކުރި ނަމަވެސް މުންކަރާތްތަކަށް އަރައިނުގަނެ، މާތް ﷲ ހުއްދަކުރައްވާފައިވާ އިންތަކުގެ ތެރޭގައި ތިބެ، އުފާފާޅުކުރުމަކީ މަނާކަމެއް ނޫން ކަމަށެވެ.
ޚުތުބާގައި ބުނީ މިއަދަކީ ގުރުބާނީގެ ދުވަސް ކަމަށެވެ. އަދި މިއީ މާތް ﷲ އެކަލޭގެފާނުގެ މައްޗަށް ސަލާމް ލެއްވި އިބްރާހީމުގެފާނާއި، ލޮބުވެތި ދަރިކަލުން އިސްމާއީލުގެފާނާ ކުރިމަތި ކުރެއްވި ބޮޑު އިމްތިހާނުން ފާސްވެ ވަޑައިގަތުމުން މާތް ﷲ އެ ދެބަފައިކަލުންނަށް ތައުރީފުގެ ބަސްވަހީކުރެއްވި ދުވަސް ކަމަށެވެ.
އެކަލާނގެ ޚަލީލު އިބްރާހީމްގެފާނު އިމްތިހާނު ކުރެއްވީ އެކަލޭގެފާނުގެ އީމާންކަމުގެ ވަރުގަދަކަން ބައްލަވައި، އެކަލޭގެފާނުގެ ގަދަރު މަތިވެރި ކުރެއްވުމަށް ޓަކައެވެ. މާތް ﷲ އެކަލޭގެފާނާ ކުރިމަތިކުރެއްވީ، ދުނިޔެ މަތީގައި މީހަކާ ކުރިމަތިވާނެ، އެންމެ ބޮޑުއިމްތިހާނެވެ. މުސްކުޅިފުޅު ވީ ދުވަހު ލިބިވަޑައިގެންނެވި ލޮބުވެތި ދަރިކަލުން، ﷲ އަށްޓަކައި ގުރުބާން ކުރެއްވުމަށް އަންގަވައި، މާތް ﷲ ކުރެއްވި ވަރުގަދަ އިމްތިހާނެވެ. އިބްރާހީމްގެފާނު މި އިމްތިހާނުން ފާސްވެވަޑައިގަތުމުން، މާތް އެކަލޭގެފާނަށް މަތިވެރި ނިޢުމަތްތަކެއް ދެއްވިއެވެ. އިސްމާއީލުގެފާނުގެ ބަދަލުގައި ގުރުބާންކުރައްވާނެ ކަންބަޅިއެއް ފޮނުއްވެވިއެވެ.އީދު ޚުތުބާ
ޚުތުބާގައި ބުނީ އިބްރާހީމުގެފާނާއި އެކަލޭގެފާނުގެ ދަރިކަލުން އިސްމާއީލުގެފާނު ދެއްކެވި ކިޔަމަންތެރިކަމުގެ ނަމޫނާއަކީ ޒުވާނުންނަށް ލިބިގެންވާ ހެޔޮ ނަމޫނާއެއް ކަމަށެވެ. މާތް ﷲ އަށް ކިޔަމަންގަތުމަށް ފަހު، މައިންބަފައިންގެ ބަސް އަހަން ޖެހޭނެކަމުގެ ހެޔޮ މިސާލެެއް ކަަމަށެވެ.
ޚުތުބާގައި ބުނީ މިއަދު ފެންނަމުން ދަނީ އިސްލާމްދީނަށް ފާޅުގައި އިހާނެތިކޮށް ހިތަމުން އަންނަ ތަން ކަމަށެވެ. އަދި ގުރުއާނަށް އިހާނެތިކޮށް ހިތަމުން އަންނަ ތަން ފެންނަމުންދާ ކަމަށާއި، ނަބިއްޔާއަށް ފުރައްސާރަ ކުރަމުން އަންނަ ތަން ވެސް ފެންނަމުން ދާ ކަމަށެވެ. މުސްލިމުންގެ މުގައްދަސް ތަންތަނަށް އަރައި، އެތަންތަން ފޭރިގަންނަ ތަން ފެންނަ ކަމަށް ބުނެފައިވެއެވެ. މީގެ އިތުުރުން މުސްލިމް އިލްމުވެރިންގެ ގަދަރު ވައްޓައިލަމުން ދާ ކަމަށާއި އިސްލާމީ ޔުނިވާސިޓީތަކާއި، މަތީ ތައުލީމުދޭ މަރުކަޒުތަކުގެ މަންހަޖުތައް ބަދަލުކުރުމަށް ފިއްތުންތައް ކުރިމަތި ކުރުވަމުންދާ ކަމަށެވެ. ސައްތައިން ސައްތަ އިސްލާމީ ގައުމެއް އޮވެގެން ނުވާނެ ކަމަށް އަޑު އުފުލަމުން ދާ ކަމަށާއި މުސްލިމުންގެ ހައްގުތަކަށް އަރައިގަންނަމުން ދާ ކަމަށް ޚުތުބާގައި ބުނެފައިވެއެވެ.
މި ޢީދަށް ޢީދުލްއަޟްޙާ އޭ ކިޔުނީ، މި ޢީދުގައި އުޟްޙިޔާކަތިލުން ޝަރްޢު ކުރައްވާފައި ވާތީ އެވެ. ކީރިތި ރަސޫލާ ޙަދީޘް ކުރައްވާފައިވެއެވެ. މާނައީ: "ތިޔަބައިމީހުން އުޟްޙިޔާ ކަތިލާށެވެ! ފަހެ،ހަމަކަށަވަރުން އެއީ ތިޔަބައިމީހުންގެ ބަފައިކަލުން އިބްރާހީމުގެފާނުގެ ސުންނަތެވެ. "އުޟްޙިޔާ ކަތިލުމަކީ ކުޅަދާނަވެގެންވާ މީހާގެ މައްޗަށް އޮތް ގަދަވެގެންވާ ސުންނަތެކެވެ. އުޟްޙިޔާއަށް ކަތިލެވޭނީ ނަޢަމު ސޫތްޕެކެވެ. އުޟްޙިޔާ ކަތިލައި، އެއިން ބައެއް ފަޤީރުންނަށް ޞަދަޤާތް ކުރާއިރު، އެކަން އަޅުގަނޑުމެންނަށް ހަނދާންކޮށްދެނީ، ކޮންމެމީހަކު ވެސް އެ މީހެއްގެ އަޚުންނަށާއި އުޚްތުންނަށް އަޅާލަން ޖެހޭނެކަމެވެ.އީދު ޚުތުބާ
ޚުތުބާގައި ބުނީ އިސްލާމީ އުއްމަތަކީ، އަހުރެން ވަންތަކަން ދޫކޮށްލައި، އަހުރެމެން ވަންތަކަމަށް ޓަކައި، މަސައްކަތް ކުރަން ޖެހޭ އުއްމަތެއް ކަމަށެވެ. އަދި އީދު ދުވަހު އައު ހެދުންލައި ޒީނަތްތެރިވުން ރަމްޒުކޮށްދެނީ، އަޅުގަނޑުމެންގެ ހަށިތަކެކޭ އެއްފަދައިން، އަމަލުތައް ވެސް އިސްލާމީ އަޚުލާގުން ޒީނަތްތެރި ކުރަން ޖެހޭނެކަން ކަމަށެވެ. އަދި ހުވަނދުލައި މީރުވަސް ދުއްވާ ގޮތަށް، އިސްލާމީ އަޚްލާގުގެ ހުވަނދުން މުޖްތަމައު އެއްވަސްކުރަން ޖެހޭނެކަން ކަމަށެވެ.
