ސާފް ޗެމްޕިއަންޝިޕް ރާއްޖޭގައި؟

ސާފް ޗެމްޕިއަންޝިޕް ބޭއްވުމުގެ ފުރުސަތު ބަންގްލަދޭޝްއަށް ކުޑަވެފައިވާއިރު، ރާއްޖެ އާއި ލަންކާއާ ގުޅިގެން މި މުބާރާތް ހޯސްޓުކުރުމުގެ ވިސްނުމެއް ގެންގުޅުއްވަމުން އަންނަ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް ބައްސާމް އަދީލް ޖަލީލް ވިދާޅުވެއްޖެއެވެ.

މީގެ ކުރިން ސާފް ޗެމްޕިއަންޝިޕް ބަންގްލަދޭޝްގައި ބޭއްވުމަށް ތާވަލުކޮށްފައި އޮތީ މިދިޔަ އަހަރުގެ ސެޕްޓެމްބަރު މަހުގެ 19 ވަނަ ދުވަހުން ފެށިގެން 30 ވަނަ ދުވަހުގެ ނިޔަލަށެވެ. އެކަމަކު ބަންގްލަދޭޝްގައި ކޮވިޑް-19 ގެ ނުރައްކާ ބޮޑުވުމާ ގުޅިގެން އެ އަހަރުގެ ޖޫން މަހުގެ ތެރޭގައި މުބާރާތް ވަނީ މި އަހަރަށް ފަސްކޮށްފައެވެ.

އަދި މިދިޔަ އަހަރުގެ ޑިސެމްބަރު މަހުގެ ތެރޭގައި އޮންލައިންކޮށް ބޭއްވި ސައުތު އޭޝިއަން ފުޓްބޯލް ފެޑެރޭޝަން (ސާފް) ގެ ހިންގާ ކޮމިޓީގެ ބައްދަލުވުމުގައި ވަނީ މި މުބާރާތް މި އަހަރުގެ ސެޕްޓެމްބަރު މަހުގެ 14 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް ބަންގްލަދޭޝްގައި ބޭއްވުމަށް ތާވަލުކޮށްފައެވެ. އެކަމަކު ބަންގްލަދޭޝްގައި ކޮވިޑުގެ ހާލަތު ގޯސްވުމާއި، އޭގެ އިތުރުން މިހާތަނަށް ސާފް ޗެމްޕިއަންޝިޕަށް ސްޕޮންސަރެއް ހޯދަން ކުރާ މަސައްކަތުގައި އެކަށީގެންވާ ކުރިއެރުމެއް ނުލިބޭތީ، ބަންގްލަދޭޝަށް ވަނީ މުބާރާތް ނުބޭއްވިދާނެ ކަމުގެ ބިރާ ކުރިމަތިލާން ޖެހިފައެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަވަމުން ބައްސާމް ވިދާޅުވީ މުބާރާތް ބަންގްލަދޭޝްގައި ނުބޭއްވޭނެކަން ސާފްއިން މިހާތަނަށް އަންގާފައި ނުވާ ކަމަށާއި، ސާފްގެ އެންގުމަކީ ސްޕޮންސާޝިޕް ހަމަޖެހުމާއެކު މުބާރާތް ބާއްވާނެ ތަނެއް ނިމިގެންދާނެ ކަމަށެވެ. އެއާއެކު މުބާރާތް ބޭއްވުމަށް ނޭޕާލުން ޝައުގުވެރިކަން ފާޅުކޮށްފައިވާ ކަމަށްވެސް ވިދާޅުވިއެވެ.

ބައްސާމް ވިދާޅުވީ މިހާރު އޭނާގެ ވިސްނުމަކީ ރާއްޖެ އާއި ލަންކާ ގުޅިގެން ސާފް ޗެމްޕިއަންޝިޕް ބޭއްވުން ކަމަށާއި، އެކަމަކު އެކަމަށް މަސައްކަތް ފެށޭނީ ސަރުކާރާއެކު މަޝްވަރާކުރުމަށްފަހު ކަމަށެވެ. އަދި ސާފް ޗެމްޕިއަންޝިޕް ރާއްޖޭގައި ބޭއްވުމަކީ ވަރަށް ބޮޑު ކަމެއް ކަމަށާއި، އެހެންކަމުން އެފަދަ މަސައްކަތެއްގައި ކުޅިވަރާ ބެހޭ ވުޒާރާ އާއި ރައީސް އޮފީސް ގުޅިގެން މަސައްކަތްކުރަން ވަރަށް ބޮޑަށް ބޭނުންވާ ކަމަށްވެސް ވިދާޅުވިއެވެ.

ބައްސާމް އިތުރަށް ވިދާޅުވީ ރާއްޖެ އާއި ލަންކާ ގުޅިގެން ސާފް ޗެމްޕިއަންޝިޕް ބޭއްވުމަށް ލަންކާއާއެކު ކޮންމެވެސް ވަރަކަށް މަޝްވަރާކުރެވިފައިވާ ކަމަށާއި، އެފަދަ ފުރުސަތެއް އޮތް ނަމަ ބައިވެރިވާން ތައްޔާރަށް އޮތްކަން ލަންކާއިން ހާމަކޮށްފައިވާ ކަމަށެވެ. އަދި މި މުބާރާތް މީގެ ކުރިންވެސް ދެ ގައުމު ގުޅިގެން ބޭއްވި ގޮތަށް ބާއްވާނަމަ، ލަންކާއިންވެސް ޝައުގުވެރިވާ ކަމަށް ބައްސާމް ވިދާޅުވިއެވެ. އެކަމަކު އެކަމުގެ އެންމެ ފަހުގެ މަޝްވަރާތައް ކުރިއަށްގެންދާނީ ރާއްޖޭގެ ސަރުކާރުގެ އިތުރުން ސާފްއާއެކު މަޝްވަރާކުރުމަށްފަހު ކަމަށްވެސް ބައްސާމް ވަނީ ވިދާޅުވެފައެވެ.

ރާއްޖެ އާއި ލަންކާއާ ގުޅިގެން ސާފް ޗެމްޕިއަންޝިޕް ބޭއްވުމަށް މަސައްކަތް ކުރަމުން އަންނައިރު، 2008 ވަނަ އަހަރުގެ މުބާރާތްވެސް ވަނީ ރާއްޖެ އާއި ލަންކާގައި ބާއްވާފައެވެ. އެ ފަހަރު ރާއްޖެއިން ވަނީ މުޅިން އަލަށް މި މުބާރާތް ކާމިޔާބުކޮށްފައެވެ. އެއަށްފަހު ޑާކާގައި 2018 ވަނަ އަހަރު ބޭއްވި މުބާރާތުގެ ޗެމްޕިއަންކަންވެސް ރާއްޖެއިން ވަނީ ހޯދާފައެވެ.