ބެން ވައިޓް ގަންނަން އާސެނަލުން އެއްބަސްވުމަކަށް

އިންގްލެންޑުގެ ޑިފެންޑަރު ބެން ވައިޓް ގަަތުމަށް އާސެނަލުން ބްރައިޓަންއާއެކު އެއްބަސްވުމަކަށް އައިސްފައިވާ ކަމަށް ރިޕޯޓުތައް ބުނެފިއެވެ.

ބީބީސީން ރިޕޯޓުކޮށްފައިވާ ގޮތުން ބްރައިޓަންއިން މިހާރު ވަނީ 50 މިލިޔަން ޕައުންޑަށް އުމުރުން 23 އަހަރުގެ ވައިޓް އާސެނަލަށް ވިއްކާލުމަށް ނިންމާފައެވެ. އަދި އާސެނަލުގެ މެޑިކަލް ޓެސްޓްތަކުގައި މި މަހުގެ 26 ވަނަ ދުވަހު ވައިޓް ބައިވެރިވާނެ ކަމަށްވެސް ވަނީ ރިޕޯޓުކޮށްފައެވެ. ވައިޓް ގަންނަން އާސެނަލުން އެއްބަސްވުމަކަށް އައިސްފައިވާއިރު، އޭނާ ހޯދުމަށް އާސެނަލުން މީގެ ކުރިން ދެ ފަހަރެއްގެ މަތިން ވަނީ ބިޑް ކޮށްފައެވެ.

ވައިޓް އަކީ މި ފަހަރުގެ ޔޫރޯ ފުޓްބޯޅަ މުބާރާތުގެ ރަނަރަޕްކަން ހޯދި އިންގްލެންޑުގެ ސްކޮޑުގައި ހިމެނުނު ކުޅުންތެރިއެކެވެ. އިންގްލެންޑުގެ ސްކޮޑުން ވައިޓަށް ފުރުސަތު ލިބުނީ ޔޫރޯގެ ކުރިން ލިވަޕޫލުގެ ޒުވާން ޑިފެންޑަރު ޓްރެންޓް އަލެކްސަންޑަ-އާނޯލްޑަށް އަނިޔާވުމުންނެވެ. އެކަމަކު މި ފަހަރުގެ ޔޫރޯގައި ވައިޓް މެޗެއް ކުޅެފައެއް ނުވެއެވެ.

ބްރައިޓަންއިން ސީނިއާ ކެރިއަރު ފެށި ވައިޓް މީގެ ކުރިން ވަނީ ލޯނު އުސޫލުން ނިއުޕޯޓް ކައުންޓީ އާއި ޕީޓަބޮރޯ ޔުނައިޓެޑް އަދި ލީޑްސް ޔުނައިޓެޑަށް ކުޅެފައެވެ. އޭގެ ތެރެއިން 2019-2020 ވަނަ އަހަރުގެ ސީޒަނުގެ އިނގިރޭސި ދެވަނަ ޑިވިޝަނުގެ ޗެމްޕިއަންކަން ލީޑްސްއިން ހޯދިއިރު، ވައިޓް ވަނީ އެ ޓީމުގައި ތަފާތު މޮޅު ކުޅުމެއް ދައްކާފައެވެ. އަދި މިދިޔަ ސީޒަނުގައި ވައިޓް ވަނީ ބްރައިޓަންއާއެކު އިނގިރޭސި ޕްރިމިއާ ލީގުގައިވެސް މޮޅު ކުޅުމެއް ދައްކާފައެވެ.

އާސެނަލުން ވައިޓްގެ ސޮއި ހޯދުމާ ގާތަށް ޖެހިލިއިރު، އެ ޓީމުން ވަނީ މި ޓްރާންސްފާގައި ބެންފިކާއަށް ކުޅެމުން އައި އުމުރުން 21 އަހަރުގެ ނޫނޯ ޓަވަރޭސްގެ ސޮއި ހޯދާފައެވެ. އެކަމަކު ކުރިއަށް އޮތް ސީޒަނަށް ބްރެޒިލުގެ ޑިފެންޑަރު ޑޭވިޑް ލުއިޒްގެ އެއްބަސްވުން އާނުކުރަން އާސެނަލުން ވަނީ ނިންމާފައެވެ.