ފަރުވާދޭ އެއްވެސް މަރުކަޒެއް ބަންދެއް ނުކުރޭ: އެންޑީއޭ
މަސްތުވާތަކެތި ބޭނުންކުރުމުގެ މައްސަލަ ހުންނަ މީހުންގެ ފަރުވާ އަށް ގިނަ ޚިދުމަތްތައް ދެމުންދޭ
ނޭޝަނަލް ޑްރަގް އެޖެންސީން، އެންޑީއޭގެ މައި އޮފީސް
ނޭޝަނަލް ޑްރަގް އެޖެންސީން (އެންޑީއޭ)އިން ދެމުންދާ ބައެއް ޚިދުމަތްތައް ވަގުތީގޮތުން މެދުކަނޑާލަން ޖެހުނުކަމުގައި ވީނަމަވެސް ފަރުވާދޭ އެއްވެސް މަރުކަޒެއް ބަންދުނުކުރާ ކަމަށް އެ އޭޖެންސީން ބުނެފިއެވެ.
އެންޑީއޭއިން ބުނީ މަސްތުވާތަކެތި ބޭނުންކުރާ މީހުންގެ ފަރުވާ އަށް ގިނަ ޚިދުމަތްތައް ދެމުންދާ ކަމަށެވެ.
މަސްތުވާތަކެތި ބޭނުންކުރާ މީހުންނަށް ފަރުވާ ދިނުމަށް އެންޑީއޭއިން ހިންގަމުން ގެންދާ ފަރުވާދޭ މަރުކަޒުތަކުގެ ތެރެއިން ބައެއް މަރުކަޒުތައް ބަންދުކޮށްފައިވާ ކަމަށް ރިޕޯޓުކޮށްފައިވާތީ އެކަން ދޮގުކޮށް އެ އޭޖެންސީން ބުނީ މަސްތުވާތަކެއްޗާބެހޭ ޤާނޫނު ގެ 47 ވަނަ މާއްދާގެ (ހ) ގެ ދަށުން އެ އޭޖެންސީން އުފައްދާ ހިންގަމުން ގެންދާ ފަރުވާދޭ އެއްވެސް މަރުކަޒެއް ބަންދުކުރުމަށް ހަމަޖެހިފައިނުވާ ކަމަށެވެ.
އެންޑީއޭއިން ބުނީ ފަރުވާދޭ މަރުކަޒުތަކުން ދެމުންގެންދާ ޚިދުމަތްތަކަށް ބަދަލުތަކެއް ގެނައުމުގެ ގޮތުން ފެސިލިޓީތައް މެޕްކުރުމާއި، ޓްރީޓްމެންޓް ޕްރޮގްރާމްތައް ހަރުދަނާކުރުމުގެ މަސައްކަތްތަކެއް ކުރަމުންދާ ކަމަށެވެ. އަދި އެ މަސައްކަތްތައް ކުރިއަށްދާތީ ބައެއް ޚިދުމަތްތައް ވަގުތީގޮތުން މެދުކަނޑާލަން ޖެހުނުކަމުގައި ވީނަމަވެސް ފަރުވާދޭ އެއްވެސް މަރުކަޒެއް ބަންދުކުރުމަށް ހަމަޖެހިފައިނުވާ ކަމަށް އެންޑީއޭއިން ބުނެފައިވެއެވެ.
އެންޑީއޭއިން ބުނީ މާލެ ސިޓީގައި ޑީޓޮކްސިފިކޭޝަން ޚިދުމަތަށް ބޭނުންވެފައިވާ ގިނަ ބަޔަކު ތިބުމާ ގުޅިގެން އެމީހުންނަށް މި މަހުގެ 8 ވަނަ ދުވަހުން ފެށިގެން ހުޅުމާލޭ ފޭސް 2 ގައި ޑީޓޮކްސިފިކޭޝަންގެ ޚިދުމަތް ދެމުންގެންދާ ކަމަށެވެ.
