13 އަހަރުގެ ކުއްޖާގެ ޕޯސްޓްމޯޓަމް ޕްރިލިމިނަރީ ރިޕޯޓް ލިބިއްޖެ
13 އަހަރުގެ ފިރިހެން ކުއްޖާގެ ޕޯސްޓްމޯޓަމް ހަދަން ފޮނުވީ މި މަހުގެ 5 ވަނަ ދުވަހު
ހުޅުމާލެ ދެވަނަ ފިޔަވަހީގައި މަރާލާފައި އޮތް ކުއްޖާ ފެނުނު ސަރަހައްދު
މަރާލާފައި އޮއްވާ ފެނުނު އުމުރުން 13 އަހަރުގެ ކުޑަ ކުއްޖާގެ ޕޯސްޓްމޯޓަމްގެ ޕްރިލިމިނަރީ ރިޕޯޓް ލިބިފައިވާ ކަމަށް ފުލުހުން ބުނެފިއެވެ.
ހުޅުމާލޭގެ ދެވަނަ ފިޔަވަހީގެ އިރުމަތި ފަރާތު މޫދުގައި މަރާލާފައި ފޮއްޓެއްގެ ތެރެއަށްލާފައި އޮއްވާ ފެނުނު 13 އަހަރުގެ ފިރިހެން ކުއްޖާގެ ޕޯސްޓްމޯޓަމް ހަދަން ފޮނުވީ މި މަހުގެ 5 ވަނަ ދުވަހުއެވެ. އަދި އެކުއްޖާގެ ޕޯސްޓްމޯޓަމް ހެދުމަށްފަހު މާލެ ގެނެސް ވަޅުލާފައިވަނީ 12 ވަނަ ދުވަހުއެވެ.
ފުލުހުން ބުނީ ޕޯސްޓްމޯޓަމްގެ ޕްރިލިމިނަރީ ރިޕޯޓް ލިބިފައިވާ ކަމަށާއި، ގާނޫނުގައި ކަނޑައަޅާފައި އޮންނަ މުއްދަތުގެ ތެރޭގައި ޕްރޮސެކިއުޓަރ ޖެނެރަލްގެ އޮފީހަށް ފޮނުވުމަށްޓަކައި ތަހުގީގު ފުރިހަމަ ކުރުމަށް ކުރަންޖެހޭ މަސައްކަތް ކުރަމުންދާ ކަމަށެވެ.
ޕޯސްޓްމޯޓަމްގެ ޕްރިލިމިނަރީ ރިޕޯޓް ފުލުހުންނަށް ލިބިފައިވީ ނަމަވެސް، އެކަމުގެ އިތުރު ތަފްސީލެއް ފުލުހުން ހާމަކޮށްފައެއް ނުވެއެވެ. ޕޯސްޓްމޯޓަމް ހެދުމަށް 13 އަހަރުގެ ކުއްޖާގެ ހަށިގަނޑު ފޮނުވީ ޓްރިވެންޑްރަމްގެ ގަވަރމެންޓް މެޑިކަލް ކޮލެޖަށެވެ.
ހުޅުމާލެ ދެވަނަ ފިޔަވަހީގައި، މީހުން ވަނުން މަނާކޮށްފައިވާ ސަރަހައްދުގެ މޫދު ތެރޭގައި ދަގަނޑެއްޖަހައި އޭގައި އައްސާފައި އޮތް ފޮއްޓެއްގެ ތެރެއަށް އެ ކުއްޖާގެ ހަށިގަނޑު ލާފައި އޮއްވާ ފުލުހުން އެ ކުއްޖާ ނެގީ މިދިޔަ މަހުގެ 21 ވަނަ ދުވަހުއެވެ. ކުއްޖާ ގެއްލިގެން އުޅޭ ކަމުގެ ރިޕޯޓު ފުލުހުންނަށް ލިބިފައިވަނީ 20 ވަނަ ދުވަހުއެވެ. އެނގިފައިވާ ގޮތުގައި ކުއްޖާގެ ހަށިގަނޑު އެތަނުން ނެގީ ކުއްޖާ މަރާލިކަމަށް ތުހުމަތުކުރެވޭ މީހުންގެ ހާޒިރުގައެވެ.
މި މައްސަލާގައި މިހާތަނަށް ދެ މީހަކު ހައްޔަރުކޮށްފައިވާއިރު އެއީ 17 އަހަރުގެ ފިރިހެން ކުއްޖަކާއި 27 އަހަރުގެ ފިރިހެނެކެވެ. އެމީހުން ހައްޔަރުކޮށްފައި ވަނީ އެކަން ކުރުމަށްފަހު ފިލަން ގޮސް މާލޭގެ ގެސްޓް ހައުސްއެއްގައި ތިއްބާ މި މަހުގެ 23 ވަނަ ދުވަހުއެވެ. މިކަމުގައި އަދި އިތުރު މީހަކުވެސް ހިމެނޭ ކަމަށް ތުހުމަތުކޮށްފައިވާއިރު، އަދި އެމީހާ ހޯދިފައެއް ނުވެއެވެ.
