އެމެރިކާގެ ހުޅަނގު ބިތުގައި ބޮޑެތި އަލިފާންގަނޑުތަކެއް ފެތުރެނީ

އެމެރިކާގެ ހުޅަނގު ބިތުގައި 60ށް ވުރެ ގިނަ އަލިފާންގަނޑު ފެތުރެން ފަށައިފިއެވެ.

ހޫނު ގަދަވެ ރޯވަމުން އަންނަ އަލިފާންގަނޑުތައް އެމެރިކާގެ 10 ސްޓޭޓެއް ފަތަހަ ކުރަމުންދާ އިރު، އޮރެގަން ގައި ފެތުރެމުން އަންނަ އަލިފާންގަނޑު ޕޯޓްލޭންޑުގެ ދެގުނައަށްވުރެ ބޮޑުކަމަށް ރިޕޯޓްތައް ބުނެއެވެ.

އަލިފާންގަނޑު ފެތުރި އެތައް ގެއެއް ބިމާ ހަމަކޮށްފައިވާ އިރު، އެތައް ހާސް ބަޔަކު ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވެފައެވެ. މީގެ ތެރޭގައި އެލަސްކާއިން ފެށިގެން ވަޔޮމިންއާ ހަމައަށް ހިމެނޭ ސްޓޭޓްތައް ހިމެނެއެވެ. އެރިޒޯނާ، އިޑާހޯ އަދި މޮންޓާނާއަކީ އެންމެ ބޮޑަށް އަސަރުކޮށްފައިވާ ސަރަހައްދުކަމަށް ނެޝަނަލް އިންޓަޖެންސީ ފަޔަރ ސެންޓަރުން ބުނެއެވެ.

އަލިފާންގަނޑު ފެތުރެމުން ދަނީ ހޫނު ގަދަވުމުގެ ސަބަބުން ކަމަށާއި ހަފްތާއެއްގެ ތެރޭގައި އެތައް ސަރަހައްދަކަށް އަލިފާންގަނޑު ފެތުރިފައިވާ ކަމަށް ރިޕޯޓްތައް ބުނެއެވެ. މޫސުމަށް އަންނަ ބަދަލުތަކާއި ހޫނުގަދަވުމުގެ ސަބަބުން ފެތުރެމުންދާ އަލިފާންގަނޑު ކުރިއަށްވުރެ މިހާރު ނުރައްކާ ކަމަށް ސައިންސްވެރިން ބުނެއެވެ.

އެމެރިކާގެ މޫސުމާބެހޭ ގައުމީ އިދާރާއިން ބުނެފައިވަނީ ހީޓްވޭވް ގިނަ ސަރަހައްދުތަކަށް އަރާފައިވާ އިރު، އަންގާރަ ދުވަހާ ހަމައަށް މީގެ އަސަރު ނިމޭނެ ކަމަށެވެ. ނަމަވެސް އޭގެފަހުން ވެސް ހީޓްވޭވް ފެތުރިފައިވެއެވެ. ބެލެވޭ ގޮތުގައި 80ގެ އަހަރުތަކާއި 90ގެ އަހަރުތަކުގައި އަލިފާން ފެތުރުނު މިންވަރަށްވުރެ ބޮޑަށް މި ފަހަރު އަލިފާންގަނޑު ފެތުރި ގެއްލުން ވާނެއެވެ.

އުތުރު ކެލިފޯނިއާގައި އަލިފާންގަނޑު ފެތުރެމުން ދިޔަ އިރު ހޮނުއެޅުމުގެ ސަބަބުން އަލިފާން ފެތުރުނު މިންވަރު އިތުރުވެގެން ދިޔައެވެ. އެތައް ދުވަހެއް ވަންދެން ފަޔަރފައިޓަރުން އަލިފާން ނިންވުމުގެ މަސައްކަތް ހުއްޓުމެއް ނެތި ކުރަމުން ދާއިރު މިހާތަނަށް ކޮންޓްރޯލްކުރެވިފައިވަނީ 46 އިންސައްތައެވެ. އަލިފާންގަނޑު ބޮޑަށް ރޯވެ ފެތުރިފައިވަނީ ހޫނު ގަދަވުމާއި ވައިބާރުވުމާއި ހިއުމިޑިޓީ ދަށްވުމުގެ ސަބަބުންނެވެ. މިއާއެކު 3000ށް ވުރެ ގިނަ މީހުން ވަނީ ކެލިފޯނިއާގެ އުތުރުގެ ސަރަހައްދުތަކުން ނެވާޑާއަށް ބަދަލުކޮށްފައެވެ.

މިހާތަނަށް އައި އިރު އެތައް ގެއްލުމެއްވެ، ގިނަ ގެތަކެއް ވަނީ އަނދައި، ބޭނުން ނުކުރެވޭ ވަރުވެފައެވެ. އަދި ލިބުނު ގެއްލުމުގެ އަންދާޒާއެއް ހަދަމުން އަންނަ އިރު، ޕްލަމްސްގެ ނެޝަނަލް ފޮރެސްޓް ހިމެނޭ ގޮތަށް 362 އަކަ ކިލޯމީޓަރުގެ ސަރަހައްދެއް ވަނީ އަނދާ ހުލިވެފައެވެ.

އާދީއްތަ ދުވަހު ނެވާޑާގެ ދެކުނު ސަރަހައްދުގައި ފެތުރުނު އަލިފާންގަނޑުގެ ސަބަބުން ޔޮސެމެޓީ ނެޝަނަލް ޕާކުގެ 36 އަކަ ކިލޯމީޓަރުގެ ސަރައްހައްދެގައި ރޯވިއެވެ. ނަމަވެސް އެތަނުން އަލިފާން ކޮންޓްރޯލް ކުރެވުނީ އެންމެ 10 އިންސައްތައެވެ.

އެމެރިކާގައި މިހާތަނަށް އެންމެ ބޮޑަށް ފެތުރެމުންދާކަމަށް ރިކޯޑް ކުރެވުނު އަލިފާންގަނޑު ފެނުނީ އޮރެގަންގެ ދެކުނު ހުޅަނގު ކެލިފޯނިއާގެ ބޯޑަރު ސަރަހައްދުންނެވެ. ހަފްތާ ބަންދު ތެރޭގައި އަލިފާން ފެތުރުނު މިންވަރު ދެގުނަ އިތުރުވެގެން ދިޔައިރު 2000 އެއްހާ ގެއަށް ވަނީ ގެއްލުންވެފައެވެ. އަދި 7 ގެއެއް އަނދާ އަޅިއަށްވި އިރު، އިތުރު 40 އިމާރާތެއްގައި އަލިފާން ރޯވިކަމަށް ރިޕޯޓްތައް ބުނެއެވެ.

2020 ވަނަ އަހަރަށްވުރެ ބޮޑަށް މިއަހަރު އަލިފާން ފެތުރިފައިވެއެވެ. ޖެނުއަރީ 1ން ފެށިގެން 13 ޖުލައިއާ ހަމައަށް 33،953 އަލިފާންގަނޑު ރޯވެފައިވާ ކަމަށް ރިޕޯޓްކޮށްފައިވާ އިރު، 2020 ވަނަ އަހަރުގެ މި މުއްދަތުގެ ތެރޭގައި ރިޕޯޓްކުރީ 27،770 އަލިފާންގަނޑެވެ.