ހާލަންޑް ވިއްކާލުމާ މެދު ޑޯޓުމުންޑަށް ގޮތެއް ނުނިންމިފައި

ބްރޫޝިއާ ޑޯޓުމުންޑަށް ކުޅެމުން އަންނަ ނޯވޭގެ ޒުވާން ފޯވާޑް އާލިން ބްރައުޓް ހާލަންޑް ވިއްކާލުމާއި މެދު ގޮތެއް ނިންމުމަށް ދަތިވެފައިވާ ކަމަށް ރިޕޯޓްތައް ބުނެފިއެވެ.

މިދިޔަ އަހަރުގެ ޖެނުއަރީ މަހު އާރްބީ ސާލްޒްބާގް ދޫކޮށް، އުމުރުން 20 އަހަރުގެ ހާލަންޑް ޑޯޓްމުންޑަށް ބަދަލުވީ ހަތަރު އަހަރާ ބައިގެ އެއްބަސްވުމެއްގެ ދަށުން، 20 މިލިޔަން ޔޫރޯއަށެވެ. އެހެންކަމުން ހާލަންޑުގެ އެއްބަސްވުން ހަމަވާނީ 2024 ވަނަ އަހަރުގެ ޖޫން މަހުއެވެ.

މި ޓްރާންސްފާ މާކެޓުގައި ޑޯޓުމުންޑުގެ މުހިންމު ކުޅުންތެރިއެއް ކަމަށްވާ ޖޭޑަން ސަންޗޯ ވަނީ އެ ޓީމު ދޫކޮށް މެންޗެސްޓާ ޔުނައިޓެޑަށް ބަދަލުވެފައެވެ. އަނެއްކޮޅުން ހާލަންޑް ހޯދުމަށް ޗެލްސީން އޮތީ 150 މިލިއަން ޕައުންޑް ހަރަދުކުރުމަށް ތައްޔާރަށް ކަމަށް ރިޕޯޓްތައް ބުނެއެވެ.

ހާލަންޑް މަޑުކުރުވަން ޑޯޓުމުންޑުގެ ކޯޗު މާކޯ ރޯސް ބޭނުންވެއެވެ. އެކަމަކު މި ޓްރާންސްފާ މާކެޓުގައި ހާލަންޑް ޑޯޓުމުންޑުގައި ބަހައްޓައިފިނަމަ އަންނަ ސީޒަނުގައި އޭނާ ޑޯޓުމުންޑް ދޫކޮށްލައިފިނަމަ، އެ ޓީމަށް މާލީ ގޮތުން ބޮޑު ގެއްލުމެއްވާނެއެވެ.

އެއީ އަންނަ އަހަރު ހާލަންޑް ގަންނަނަމަ 70 މިލިއަން ޕައުންޑްއަށް އެ ޑީލް ނިންމައިލެވޭނެ އެވެ. އެކަމަކު، މި ފަހަރުގެ ޓްރާންސްފާ މާކެޓްގައި އުމުރުން 20 އަހަރުގެ ހާލަންޑް މަދުވެގެން 170 މިލިއަން ޑޮލަރުގެ ޑީލެއްގެ ތެރެއިން ވިއްކާލެވޭނެއެވެ.

މި ހޫނު މޫސުމުގެ ޓްރާންސްފާގައި ހާލަންޑް ގަތުމަށް ޔޫރަޕުގެ ބޮޑެތި ކުލަބުތަކުން މަސައްކަތްކުރަމުން އަންނައިރު، އޭގެ ތެރޭގައި ޗެލްސީގެ އިތުރުން އިނގިރޭސި ޕްރިމިއާ ލީގުގެ ޗެމްޕިއަން މެންޗެސްޓާ ސިޓީ އާއި، މެންޗެސްޓާ ޔުނައިޓެޑް އަދި ލިވަޕޫލުވެސް ހިމެނެއެވެ. އަދި އޭނާއަށް ސްޕެއިނުގެ ގަދަ ދެ ބާރު ކަމަށްވާ ބާސެލޯނާ އާއި ރެއާލް މެޑްރިޑުންވެސް އަންނަނީ ފާރަލަމުންނެވެ. ހާލަންޑް ގަތުމަށް ޔޫރަޕުގެ ބޮޑެތި ކުލަބުތަކުން މަސައްކަތްކުރި ނަމަވެސް، މި ހޫނު މޫސުމުގައި ހާލަންޑް ވިއްކާނަމަ، އޭނާ ވިއްކަން ޑޯޓްމުންޑުން ކަނޑައަޅާފައިވާ އަގަކީ 180 މިލިޔަން ޔޫރޯ ކަމަށް ރިޕޯޓުތައް ބުނެއެވެ.

ޑޯޓްމުންޑާއެކު ހާލަންޑް ތަފާތު މޮޅު ކުޅުމެއް ދައްކަމުން އަންނައިރު، އޭނާ ވަނީ މިހާތަނަށް ޑޯޓްމުންޑަށް ކުޅެދިން 59 މެޗުގައި 57 ލަނޑު ޖަހާފައެވެ. އަދި އޭނާ ވަނީ ޑޯޓްމުންޑާއެކު މިދިޔަ ސީޒަނުގެ ޖަރުމަން ކަޕް ކާމިޔާބުކޮށްފައެވެ.