ރައީސް މިވަގުތު އިސްކަންދެއްވަނީ ވައުދުތައް ފުއްދެވުމަށް: ތަރުޖަމާނު
އިދިކޮޅާއެކު މަސައްކަތް ކުރައްވަން ބޭނުންފުޅުވާ ކަމަށް ނަޝީދު ވިދާޅުވި
ރައްޔިތުންގެ މަޖިލީހުގައި ރައީސް ޞާލިހު ރިޔާސީ ބަޔާންއިއްވަމުން ދިޔައިރު، ފަހަތުން ރައީސް ނަޝީދު އަތްތިލަބަޑި ޖައްސަވަނީ
ރައީސުލް ޖުމްހޫރިއްޔާ އިބްރާހިމް މުހައްމަދު ސާލިހް މިވަގުތު އިސްކަން ދެއްވަނީ ވައުދުތައް ފުއްދެވުމަށް ކަމަށް ރައީސް އޮފީހުގެ ތަރުޖަމާނު މަބްރޫކް އަޒީޒް ވިދާޅުވެއްޖެއެވެ.
ރައީސުްޖުމްހޫރިއްޔާ އިބްރާހިމް މުޙައްމަދު ސާލިހާއެކު ސިޔާސީ މަސައްކަތް ކުރެއްވުމަށް ނުވިސްނަވާ ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް، މުހައްމަދު ނަޝީދު ވިދާޅުވެފައިވާތީ އެކަމާ ގުޅޭގޮތުން ރާއްޖެއެމްވީން ސުވާލުކުރުމުން މަބްރޫކް ވިދާޅުވީ ރައީސް މިވަގުތު ފޯކަސް ކުރައްވަނީ ވައުދުތައް ފުއްދެވުމަށް އެކަނި ކަމަށެވެ. އަދި އެކަމާ ގުޅޭގޮތުން އިތުރަށް އެއްޗެއް ވިދާޅުވާން ބޭނުންފުޅުނުވާ ކަމަށެވެ.
ރައީސް ޔާމީނާއެކު ސިޔާސީ މަސައްކަތް ކުރައްވަން ތައްޔާރަށް ހުންނެވިކަން ދޭހަވާ ބީދައަކުން ދާދި ފަހުން ބޭއްވި ނޫސްވެރިންގެ ބައްދަލުވުމެއްގައި ރައީސް ނަޝީދު ވަނީ ވާހަކަފުޅު ދައްކަވާފައެވެ. މައުލޫމާތު ލިބޭ ގޮތުގައި ރައީސް ނަޝީދު ގެންދަވަނީީ އެމަނިކުފާނުގެ މި ޚިޔާލުފުޅު އެމްޑީޕީގެ ލީޑަރޝިޕްގެ އިސްވެރިންނާ ވެސް ހިއްސާ ކުރައްވަމުންނެެވެ. ދާދި ފަހުން ރައީސް ނަޝީދު ވަނީ އެމްޑީޕީގެ މެމްބަރުން ނުރުހުނުކަމަށް ވިޔަސް، ސިޔާސީ މަސައްކަތުގައި ރައީސް ޔާމީނުގެ އެހީއަށް އެދިވަޑައިގަންނަވާނެކަން ހާމަ ކުރައްވާފައެވެ. އެކަން އެމްޑީޕީގެ ޤައުމީ މަޖިލީހުގެ ވަޓްސްއަޕް ގްރޫޕުން ދައުރުވަމުންދާ މެސެޖުތަކެއްގައި ވެސް އެ ހިިޔާލު ފާޅު ކުރައްވާފައިވާއިރު، ރައީސް ޞާލިޙާއެކު ސިޔާސީ މަސައްކަތް ކުރެއްވުމުގެ ވިސްނުންފުޅު ނަޝީދު މިހާރު ނުގެންގުޅުއްވާކަމަށް ވެސް އެމަނިކުފާނު ވަނީ ވިދާޅުވެފައެވެ.
މި މެސެޖުތަކުގައި ރައީސްއަށް އަމާޒު ކުރައްވައި ބަހުގެ ހޫނު ހަމަލާތަކެއް ދެއްވާފައިވާއިރު، މިހާރު ވިސްނުންފުޅު ހުރީ ރައީސް އަބްދުﷲ ޔާމީނާއެކު މަސައްކަތް ކުރެއްވުމަށްކަން ދައުރުވަމުންދާ މެސެޖުތަކުން ހާމަވެއެވެ.
އެ މެސެޖުތަކުގައި ވަނީ ރައީސް ނަޝީދު ޤައުމީ މަޖިލީހުގެ ވަޓްސްއަޕް ގްރޫޕުގައި ހިއްސާ ކުރެއްވި ވާހަކަތަކެކެވެ. އެގޮތުން ރައީސް ނަޝީދު ވަނީ ރައީސް ޞާލިޙާ ޒާތީ އެއްވެސް މައްސަލައެއް ނެތް ކަމަށް ވިދާޅުވެ، ރައީސް ޞާލިޙަކީ އެމަނިކުފާނުގެ ދަރިންގެ "އިބޫ ދޮންބެ" ކަމަށް ވިދާޅުވެފައެވެ. ނަމަވެސް ފިކުރީ ގޮތުން ރައީސް ޞާލިޙާއި، އެމަނިކުފާނުގެ ވިސްނުންފުޅު ތަފާތުކަން ފާހަގަކުރައްވައި ރައީސް ނަޝީދު ވަނީ "ރައީސުލްޖުމްހޫރިއްޔާއާ އެކުގައި ސިޔާސީ ގޮތުން ހުރެވޭކަށް ނެތް" ކަމަށް ވިދާޅުވެފައެވެ. ސަބަބެއްގެ ގޮތުގައި ރައީސް ނަޝީދު ވިދާޅުވަނީ ހަރުކަށި ފިކުރާ ދެކޮޅަށް ކުރައްވަމުން ގެންދަވާ މަސައްކަތްތަކެވެ.
އެމްޑީޕީގެ ތެރޭގައި ހަރުކަށި ފިކުރު އާލާވަމުންދާކަން ފާހަގަކުރައްވައި ރައީސް ނަޝީދު ވަނީ އެމަނިކުފާނު ބޭނުންފުޅު ވަނީ ދީނީ ގޮތުން މެދުމިނުގެ ފިކުރެއްކަމަށް ވިިދާޅުވެފައެވެ. އަދި ރައީސް ޔާމީނާއި ޕީޕީއެމްއިން މެދުމިނުގެ ދީނީ ސިޔާސަތަށް ތާއީދު ކުރައްވާނަމަ އެފަރާތްތަކުގެ އެހީއަށް އެދިވަޑައިގަންނަވާނެކަން ވެސް ރައީސް ނަޝީދު ވަނީ ހާމަކުރައްވާފައެވެ. އެހެންނަމަވެސް، ވައްކަމާއި ކޮރަޕްޝަންގެ ބޮޑެތި ކުށްތަކެއް ސާބިތުވެފައިވާ ބޭފުޅަކާއެކު ރައީސް ނަޝީދު ސިޔާސީ މަސައްކަތް ކުރައްވާނެތޯ ގިނަ ބަޔަކު ގެންދަނީ ސުވާލު ވެސް އުފައްދަމުންނެވެ.
