އޮގަސްޓު 1ން ފެށިގެން އެސްޓީއޯ ފާމަސީތަކުން ބޭނުންކުރާނީ ކަރުދާސް ކޮތަޅު
މިގޮތަށް ނިންމާފައި ވަނީ ޕްލާސްޓިކާ ވެއްޓަށް ގެއްލުންދޭ ބާވަތްތައް އެތެރެކުރުން މަދުކުރުމުގެ ސިޔާސަތުގެ ދަށުން
ތުރާކުނު އެސްޓީއޯ ފާރމަސީ
ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ބޭސްފިހާރަތަކުން ޕްލާސްޓިކް ކޮތަޅު ބޭނުންކުރުން ހުއްޓާލައި، ކަރުދާސް ކޮތަޅަށް ބަދަލުކުރަން ނިންމައިފިއެވެ.
މޯލްޑިވިއަން ޑިމޮކްރަޓިކް ޕާޓީ (އެމްޑީޕީ)ގެ ކްލަބްހައުސް ހަރުގެ ޖަލްސާގައި ވާހަކަދައްކަވަމުން އެސްޓީއޯގެ މެނޭޖިން ޑިރެކްޓަރ ހުސެން އަމްރު ވަނީ އެކުންފުނީގެ ބޭސްފިހާރަތަކުން ބޭނުންކުރަމުންދާ ޕްލާސްޓިކް ކޮތަޅުތައް ބޭނުންކުރުން ހުއްޓާލަން ނިންމާފައިވާކަމަށް ވިދާޅުވެފައެވެ. އެގޮތުން ޕްލާސްޓިކާއި ވެއްޓަށް ގެއްލުންދޭ ބާވަތްތައް އެތެރެކުރުން މަދުކުރުމުގެ ސިޔާސަތުގެ ދަށުން އެސްޓީއޯގެ ފާމަސީތަކުން ޕްލާސްޓިކް ކޮތަޅު ބޭނުންކުރުން ހުއްޓާލަން ނިންމާފައިވާ ކަމަށް އަމްރު ވިދާޅުވިއެވެ.
އަމްރު ވިދާޅުވީ އޮގަސްޓް އެއް ވަނަ ދުވަހުން ފެށިގެން ބޭސްފިހާރަތަކުން ބޭނުން ކުރާނީ ކަރުދާސް ކޮތަޅުކަމަށެވެ. އަދި މިގޮތަށް ކަރުދާސް ކޮތަޅަށް ބަދަލުކުރެވުމުން އަހަރަކު އެއް މިލިއަން ޕްލާސްޓިކް ކޮތަޅު ރާއްޖެއަށް އެތެރެކުރުން ހުއްޓާލެވޭނެ ކަމަށް އަމްރު ވިދާޅުވިއެވެ.
އދ. ގެ 74 ވަނަ ޢާންމު މަޖިލީހުގައި ތަޤުރީރު ކުރައްވަމުން ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހް ވަނީ އެއްފަހަރު ބޭނުންކޮށްފައި އުކައިލެވޭ ޕްލާސްޓިކްގެ ބާވަތްތައް ރާއްޖެއަށް އެތެރެކުރުން މަނާކުރުމަށް ނިންމަވައި އެކަން އިއުލާނުކުރައްވާފައެވެ. އެއާއެކު، އެއްފަހަރު ބޭނުންކޮށްފައި އުކައިލާ ބާވަތުގެ ޕްލާސްޓިކް ރާއްޖެ އެތެރެކުރުމާއި، ރާއްޖޭގައި އުފެއްދުމާއި، ބޭނުންކުރުން ހުއްޓާލުމާ ގުޅޭ ޕްލޭނެއް އެކަށައަޅުއްވައި، ކެބިނެޓުގެ މަޝްވަރާއާއެކު، 2020 ނޮވެންބަރު 5 ވަނަ ދުވަހު ރައީސުލްޖުމްހޫރިއްޔާ ވަނީ އެ ޕްލޭން ތަންފީޒުކުރުމަށް ނިންމަވާފައެވެ.
ރާއްޖެއަށް އެތެރެކުރުން މަނާ ސިންގަލް-ޔޫޒް ޕްލާސްޓިކް ނުވަތަ ޕްލާސްޓިކުން އުފައްދާފައިވާ އެއްފަހަރު ބޭނުންކޮށްފައި އުކައިލެވޭ ބާވަތްތައް ރައީސް ޞާލިހްގެ ޤަރާރަކުން ކަނޑައަޅުއްވައި ދިވެހިސަރުކާރުގެ ގެޒެޓްގައި ވަނީ ޝާއިޢުކުރައްވާފައެވެ.
