ޓެނިސް ލެޖެންޑް ފެޑެރާ އޮލިމްޕިކްސް ނުކުޅެން ނިންމައިފި

މި މަހު ފަށާ ޓޯކިޔޯ އޮލިމްޕިކްސް މުބާރާތުގައި ނުކުޅެން މަޝްހޫރު ޓެނިސް ކުޅުންތެރިޔާ ރޮޖާ ފެޑެރާ ނިންމައިފިއެވެ.

އުމުރުން 39 އަހަރުގެ ފެޑެރާ ވަނީ ނިމިދިޔަ ވިމްބަލްޑަން ޓެނިސް މުބާރާތުގައިވެސް ވާދަކޮށްފައެވެ. އެކަމަކު މުބާރާތުގެ ކުއާޓާ ފައިނަލުން ފެޑެރާ ވަނީ ކަޓައިފައެވެ. އޭނާ ކެޓީ ޕޮލެންޑުގެ ހިއުބާޓް ހުކާޒް އަތުން ބަލިވުމުންނެވެ.

މިދިޔަ އަހަރު ކަކުލުގެ ދެ އޮޕަރޭޝަނެއް ކޮށްފައިވާ ފެޑެރާ ފަހަކަށް އައިސް ގާތްގާތުގައި ގިނަ މުބާރާތްތަކެއް ނުކުޅޭ އެއް ސަބަބަކީ ރިކަވަރީއަށް ވަގުތު ދޭން ބޭނުން ވުމެވެ.

އޮލިމްޕިކްސްގައި ބައިވެރިނުވާނެ ކަމަށް ބުނަމުން ފެޑެރާ ބުނީ އެންމެ ފަހުން ވިމްބަލްޑަންގައި ކުޅުނުއިރު، ކަކުލަށް ދިމާވެފައިވާ މައްސަލައިގެ ސަބަބުން އުނދަގޫތަކެއްވި ކަމަށެވެ. އެހެންކަމުން ކުރިޔަށް އޮތް އޮލިމްޕިކްސްގައި ނުކުޅޭނެ ކަމަށާއި، ކެރިޔަރުގެ މިހާ ހިސާބުން އޮލިމްޕިކްސް ކަހަލަ ބޮޑު މުބާރާތެއްގައި ބައިވެރިނުވެވުން އެއީ ދެރައެއް ކަމަށެވެ.

ފެޑެރާ ވަނީ 2008 ވަނަ އަހަރުގެ ބެއިޖިން އޮލިމްޕިކްސް އިން ރަން މެޑަލާއި 2012 ވަނަ އަހަރުގެ ލަންޑަން އޮލިމްޕިކްސް އިން ރިހި މެޑަލް ހާސިލްކޮށްފައެވެ.

ފެޑެރާގެ އިތުރުން އަނިޔާގެ ސަބަބުން ޓެނިސް ލެޖެންޑް ސްޕެއިންގެ ރަފައެލް ނަޑާލްވެސް އޮލިމްޕިކްސްގައި ނުކުޅޭނެއެވެ.