ޕޯސްޓްމޯޓަމަށްފަހު 13 އަހަރުގެ ކުއްޖާގެ ހަށިގަނޑު ގެނެސް ވަޅުލައިފި
12 ޖުލައި 2021 | ހޯމަ 17:46ޕޯސްޓްމޯޓަމަށް ހަށިގަނޑު ފޮނުވާފައި ވަނީ މިމަހު 5ގައި
ހުޅުމާލެ ދެވަނަ ފިޔަވަހީގައި ކުއްޖާ މަރާލާފައި އޮއްވާ ފެނުނު ސަރަހައްދު | ރާއްޖެއެމްވީ
މަރާލާފައި އޮއްވާ ފެނުނު އުމުރުން 13 އަހަރުގެ ކުޑަ ކުއްޖާގެ ހަށިގަނޑު، ޕޯސްޓްމޯޓަމަށްފަހު ރާއްޖެ ގެނެސް ވަޅުލާފައިވާ ކަމަށް ފުލުހުން ބުނެފިއެވެ.
ފުލުހުން ބުނީ ޕޯސްޓްމޯޓަމަށްފަހު އެ ކުއްޖާ މާލެ ގެނެސް ވަޅުލީ ހޯމަ ދުވަހު ކަމަށެވެ. ޕޯސްޓްމޯޓަމް ހެދުމަށް ހަށިގަނޑު ފޮނުވާފައި ވަނީ މި މަހު 5ގައެވެ. ޕޯސްޓްމޯޓަމް ނަތީޖާގައި ހާމަވި އެއްވެސް ކަމެއް ފުލުހުން މިހާތަނަށް އާންމުކޮށްފައެއް ނުވެއެވެ. ޕޯސްޓްމޯޓަމް ހެދުމަށް ހަށިގަނޑު ފޮނުވީ ޓްރިވެންޑްރަމްގެ ގަވަރމެންޓް މެޑިކަލް ކޮލެޖަށެވެ.
ހުޅުމާލެ ދެވަނަ ފިޔަވަހީގައި، މީހުން ދިއުން މަނާކޮށްފައިވާ ސަރަހައްދުގެ މޫދު ތެރޭގައި ދަގަނޑެއްޖަހައި އޭގައި އައްސާފައި އޮތް ފޮއްޓެއްގެ ތެރެއަށް އެ ކުއްޖާގެ ހަށިގަނޑު ލާފައި އޮއްވާ ފުލުހުން އެ ކުއްޖާ ނެގީ މިދިޔަ މަހުގެ 21 ވަނަ ދުވަހުއެވެ. ކުއްޖާ ގެއްލިގެން އުޅޭ ކަމުގެ ރިޕޯޓު ފުލުހުންނަށް ލިބިފައިވަނީ 20 ވަނަ ދުވަހުއެވެ. އެނގިފައިވާ ގޮތުގައި ކުއްޖާގެ ހަށިގަނޑު އެތަނުން ނެގީ ކުއްޖާ މަރާލިކަމަށް ތުހުމަތުކުރެވޭ މީހުންގެ ހާޒިރުގައެވެ.
މި މައްސަލާގައި މިހާތަނަށް ދެ މީހަކު ހައްޔަރުކޮށްފައިވާއިރު އެއީ 17 އަހަރުގެ ފިރިހެން ކުއްޖަކާއި 27 އަހަރުގެ ފިރިހެނެކެވެ. އެމީހުން ހައްޔަރުކޮށްފައި ވަނީ އެކަން ކުރުމަށްފަހު ފިލަން ގޮސް މާލޭގެ ގެސްޓް ހައުސްއެއްގައި ތިއްބާ މި މަހުގެ 23 ވަނަ ދުވަހުއެވެ. މިކަމުގައި އަދި އިތުރު މީހަކުވެސް ހިމެނޭ ކަމަށް ތުހުމަތުކޮށްފައިވާއިރު، އަދި އެމީހާ ހޯދިފައެއް ނުވެއެވެ.
