ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކޮންސްޓްރަކްޝަން އެޖެންޓުންނަށް މިިހާރު ގްރޭޓަރ މާލެ ސަރަހައްދު ފިޔަވައި އެހެން ހުރިހާ ސަރަހައްދަކަށް އިމާރާތްކުރުމަށް ބޭނުންވާ ސާމާނު ވިއްކޭނެ ކަމަށް އެކުންފުނިން ބުނެފިއެވެ.

އެސްޓީއޯ އިން ކޮންސްޓްރަކްޝަން އެޖެންޓުން ކަނޑައަޅައި ވަކިވަކި ސަރަހައްދުތަކަށް އިމާރާތްކުރުމަށް ބޭނުންވާ ސާމާނު ވިއްކުމުގެ ފުރުސަތު ދިނުމުން އެކަމަށް އޮތް ޑިމާންޑު އިތުރުވެ، އެޖެންޓުންގެ އެދުމުގެ މަތިން އެކުންފުުނިން ވަނީ އެޖެންޓުންނަށް އިމާރާތްކުރުމަށް ބޭނުންވާ ސާމާނު ރާއްޖޭގެ ކޮންމެ ހިސާބަކަށް ވިއްކޭނެ ގޮތަށް ބަދަލުގެނެސްފައެވެ. މިބަދަލާއެކު އެކުންފުނިން ވަނީ ކޮންމެ އަތޮޅަކުން 2 އެޖެންޓުން ކަނޑައެޅުމުގެ ބަދަލުގައި އެޖެންޓެއްގެ ގޮތުގައި ހަރަކާތްތެރިވާން ބޭނުންވާ ކޮންމެ ފަރާތަކަށް ވެސް އެ ފުރުސަތު ހުޅުވާލާފައެވެ.

އެސްޓީއޯ އިން ބުނީ މިގޮތަށް ހުޅުވާލާފައި މިވަނީ އެ ކުންފުންޏަކީ ހުރިހާ ދިވެހިންގެ ކުންފުންޏަށް ވެފައި، އެޖެންޓުންގެ ގޮތުގައި މަސައްކަތްކުރަން ބޭނުންވާ ހުރިހާ ފަރާތަކަށް އެފުރުސަތު ދިނުމަށް ކަމަށެވެ. އެގޮތުން އެސްޓީއޯގެ ކޮންސްޓްރަކްޝަން އެޖެންޓަކަށް ވުމުގެ ފުރުސަތު އިކޮނޮމިކް މިނިސްޓްރީގައި ރަޖިސްޓްރީކޮށްފައިވާ ކޮންމެ ވިޔަފާރިއަކަށް މިހާރު އެބައޮތް ކަމަށް އެސްޓީއޯ އިން ފާހަގަކުރެއެވެ.

މިގޮތަށް އެޖެންޓުން ކަނޑައެޅުމުގެ މަގުސަދަކީ މުޅި ރާއްޖޭގެ ހުރިހާ ރަށަކަށް އެސްޓީއޯގެ އިމާރާތްކުރުމަށް ބޭނުންވާ ސާމާނު އެންމެ ހެޔޮ އަގުގައި ފަސޭހައިން ލިބެން ހުންނާނެހެން ފޯރުކޮށްދިނުމަށް ކަމަށް އެކުންފުނިން ބުނެއެވެ. އަދި އެޖެންޓުންގެ އެހީއާއެކު އަތޮޅުތެރޭގައި ރަށްރަށުގައި އިމާރާތްކުރުމުގެ ސާމާނު ނުލިބުމުގެ މައްސަލައަށް ވަރަށް ބޮޑު ހައްލެއް ލިބިގެންދާނެ ކަމަށް ކުންފުނިން ފާހަގަކުރެއެވެ.

އެސްޓީއޯގެ ކޮންސްޓްރަކްޝަން އެޖެންޓަކަށް ވުމަށް މާގިނަ ލިޔުންތަކެއް ހުށަހަޅާކަށް ނުޖެހެއެވެ. އެގޮތުން އެޖެންޓަކަށް ވުމަށް ހުށަހަޅަންޖެހޭ ލިޔުންތަކުގެ ތެރޭގައި ހިމެނެނީ ވިޔަފާރި ރަޖިސްޓްރޭޝަން، ޖީއެސްޓީ ރަޖިސްޓްރޭޝަން ފަދަ ކޮންމެހެން ބޭނުންވާ މުހިންމު ލިޔުންތަކެވެ. އޭގެ އިތުރުން އެޖެންޓުން ވިއްކަން ގަސްތުކުރާ އަގުތައް އެސްޓީއޯއަށް ހުށަހަޅަންޖެހެއެވެ.