ރައީސްގެ ޚާއްސަ މަންދޫބު ޑިފެންސް މިނިސްޓަރާ ބައްދަލުކުރައްވައިފި
10 ޖުލައި 2021 | ހޮނިހިރު 17:39ރައީސްގެ ޚާއްސަ މަންދޫބާއި ޑިފެންސް މިނިސްޓަރުގެ މިބައްދަލުވުމުގެ ތަފްސީލެއް ހާމަކޮށްފައެއްނުވޭ
ރައީސްގެ ޚާއްސަ މަންދޫބު ޑިފެންސް މިނިސްޓަރާ ބައްދަލުކުރެއްވުން
ރައްޔިތުންގެ މަޖިލީހުގެ ރައީސް މުޙައްމަދު ނަޝީދަށް އަމާޒުކޮށް، ދިން ހަމަލާއާ ގުޅިގެން ކުރިއަށް ގެންދާ ތަހުގީގު، ގާތުން ބެއްލެވުމަށްޓަކައި ރައީސުލްޖުމްހޫރިއްޔާ އައްޔަނުކުރެއްވި ޚާއްސަ މަންދޫބު ޢައްބާސް ފާއިޒް، ޑިފެންސް މިނިސްޓަރު މާރިޔާ އަޙުމަދު ދީދީއާ ބައްދަލު ކުރައްވައިފިއެވެ.
ރައީސުލްޖުމްހޫރިއްޔާގެ ޚާއްސަ މަންދޫބު ޑިފެންސް މިނިސްޓަރާ ބައްދަލުކުރައްވާފައި މިވަނީ ރައީސް ނަޝީދަށް އަމާޒުކޮށް، ދިން ހަމަލާގައި އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީ ކުރިޔަށް ގެންދިޔަ 241 ކޮމިޓީގެ ރިޕޯޓްގައި މިނިސްޓަރުގެ އިހުމާލުވުންތަކެއް ވާކަމަށް ބުނެފައިވާ ދަނޑިވަޅެއްގައެވެ. ރައީސްގެ ޚާއްސަ މަންދޫބާއި ޑިފެންސް މިނިސްޓަރުގެ މިބައްދަލުވުމުގެ ތަފްސީލެއް ހާމަކޮށްފައެއްނުވެއެވެ.
ރައީސްގެ ޚާއްސަ މަންދޫބު ޢައްބާސް ފާއިޒް، ބަންޑާރަ ނައިބު އަލްއުސްތާޛު އިބްރާހީމް ރިފްޢަތާވެސް ވަނީ މީގެކުރިން ބައްދަލުކުރައްވާފައެވެ. މި ތަޙްޤީޤުގެ ކަންކަން ހިނގާނުހިނގާގޮތް ބެއްލެވުމަށް ޢައްބާސް ފާއިޒް ރާއްޖެ ވަޑައިގެންފައިވަނީ މިމަހުގެ 3 ވަނަ ދުވަހުއެވެ. ޢައްބާސް ވަނީ މީގެ ކުރިން ރައްޔިތުންގެ މަޖިލީހުގެ ނައިބު ރައީސް އީވާ ޢަބްދުﷲއާ ވެސް ބައްދަލުކުރައްވާފައެވެ. އަދި ރާއްޖެވަޑައިގަތުމުގެ ކުރިން، މަޖިލީހުގެ 241 ކޮމެޓީގެ މެންބަރުންނާވެސް އޭނާވަނީ ވަރޗުއަލްކޮށް ބައްދަލުކުރައްވައި، ތަހުގީގުގެ ކަންކަން ކުރިއަށްދާގޮތުގެ މައުލޫމާތު އޮޅުންފިލުއްވާފައެވެ.
ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށްގެން ދީފައިވާ ޓެރަރިސްޓް ހަމަލާއާ ގުޅިގެން، ކުރިޔަށްދާ ތަހުގީގާއި، އެންމެހާ ކޯޓު މަރުހަލާތައް ގާތުން ބެއްލެވުމަށްޓަކައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްގެ ޚާއްޞަ މަންދޫބެއްގެގޮތުން ޢައްބާސް ފާއިޒް އައްޔަނުކުރައްވާފައިވަނީ މެއިމަހުގެ 19 ވަނަ ދުވަހުއެވެ.
241 ކޮމިޓީގެ އިންކުއަރީ ރިޕޯޓް މިހާރު އާންމުކޮށްފައިވާއިރު ރިޕޯޓުން ހާމަވާގޮތުގައި ހަމަލާގެ މައުލޫމާތު ލިބިވަޑައިގެންނެވިނަމަވެސް އެކަމަށް ފިޔަވަޅު އަޅާފައެއްނުވެއެވެ. އިންކުއަރީއަށް މައުލޫމާތު ދެއްވަމުން މިނިސްޓަރު ވިދާޅުވެފައިވަނީ ހުޅުދޫ ދާއިރާގެ މެމްބަރ އިލްޔާސް ލަބީބު ފޯނުން ގުޅުއްވައި، ރައީސް ނަޝީދަށް ހަމަލާދިނުމަށް ބަޔަކު އުޅޭކަމުގެ ދެއްވިކަމަށާއި ނަމަވެސް އެކަމާ ގުޅޭގޮތުން އެއްވެސް ކަމެއް ނުކުރެއްވީ އެއީ ފޯނު ކޯލެއްވީމާކަމަށެވެ. އަދި އެއީ މައުލޫމާތެއް ނޫންކަމަށް ވަނީ ވިދާޅުވެފައެވެ.
