ބައިޑަން ވެރިކަމަށް އައުމަށް ދެކޮޅުހެދި ކޮންގްރެސް މެމްބަރުންނަށް ފޯރުކޮށްދެމުން ދިޔަ ޑޮނޭޝަންތައް ދިނުން ޓޮޔޯޓާއިން ހުއްޓާލައިފި
ޓޮޔޯޓާއިން ވަނީ މީގެ ކުރިން ބައިޑަން ވެރިކަމަށް އައުމަށް ދެކޮޅުހެދި ކޮންގްރެސްގެ 38 މެމްބަރުންނަށް 56،000 ޑޮލަރުގެ ޑޮނޭޝަން ދީފައި
ޓޮޔޯޓާ ކުންފުނީގެ ޝޯރޫމެއް
އެމެރިކާގެ މިހާރުގެ ރައީސް ޖޯ ބައިޑަން ވެރިކަމަށް އައުމަށް ދެކޮޅުހެދި ކޮންގްރެސް މެމްބަރުންނަށް ފޯރުކޮށްދެމުން އައި ޑޮނޭޝަންތައް ހުއްޓާލުމަށް ޓޮޔޯޓާ ކުންފުނިން ނިންމައިފިއެވެ.
ޓޮޔޯޓާއިން އެމެެރިކާގެ ކޮންގްރެސް މެމްބަރުންނަށް ޑޮނޭޝަންތައް ފޯރުކޮށްދެމުން އަންނަ އިރު، އެ މެމްބަރުންގެ ތެރޭގައި ބައިޑަން ވެރިކަމަށް އައުމާ ދެކޮޅަށް ވޯޓުދިން މެމްބަރުން ހިމެނިފައިވާތީ ޓޮޔޯޓާއަށް ވަނީ ފާޑުކިޔުންތައް އަމާޒުވެފައެވެ. އެގޮތުން އެކުންފުނިން ވަނީ ބައިޑަންގެ ވެރިކަމަށް ދެކޮޅުހެދި 38 މެމްބަރުންނަށް 56،000 ޑޮލަރުގެ ފައިސާގެ އެހީ ދީފައެވެ.
ޓޮޔޯޓާއިން ބުނީ އެކުންފުނިން މަސައްކަތްތައް ކުރަނީ ކުންފުނީގެ ސްޓޭކްހޯލްޑަރުންގެ ލަފަޔާ އެއްގޮތަށް ކަމަށާއި އެކުންފުނިން ކޮންގްރެސް މެމްބަރުންނަށް ފޯރުކޮށްދެމުން އަންނަ ޑޮނޭޝަންތައް ބައިޑަންގެ ވެރިކަމަށް ދެކޮޅުހެދި ކޮންގްރެސް މެމްބަރުންނަށް ނުދިނުމަށް ނިންމާފައިވާ ކަމަށެވެ.
އޭގެ އިތުރުން ޓޮޔޯޓާއިން ވަނީ މިއީ ވަކިބަޔަކަށް އެ ކުންފުނިން ސަޕޯޓުކުރުން ނޫންކަމަށާއި ކުންފުނީގެ ސަޕޯޓް، ޑިމޮކްރެޓުންނަށާއި ރިޕަބްލިކަންސްއަށް ވެސް އޮންނާނެ ކަމަށް ބުނެފައެވެ.
