ނަފުރަތުގެ ބިލާއެކު ހިސާން މަރަން ގޮވިއިރުވެސް އޭޖީ ނޫނީ އެހެން އެއްވެސް ބޭފުޅަކު ހިސާން ދިފާއުކޮށެއް ނުދެއްވާ: އީވާ
8 ޖުލައި 2021 | ބުރާސްފަތި 10:57މި ބިލަކީ ސަރުކާރުގެ ފަރާތުން ހުށަހެޅި ބިލެއްކަން ފާހަގަކުރައްވާ އީވާ ވިދާޅުވީ ބިލަށް ކޮމިޓީން ގެނައި އިސްލާހަށް އަނެއްކާވެސް އިސްލާހު ހުށަހެޅުއްވީ ސަރުކާރުގެ ފަރާތުންކަމަށް
ރައްޔިތުންގެ މަޖިލީހުގެ ނައިބު ރައީސް އީވާ އަބްދުﷲ
އާންމު ތަނެއްގައި މުސްލިމަކު ކާފަރެއްގެ ގޮތުގައި ސިފަކުރުމަކީ ކުށެއް ކަމަށް ކަނޑައެޅުމަށް ޤާނޫނުލް ޢުޤޫބާތަށް ސަރުކާރުގެ ފަރާތުން ތުޅާދޫ ދާއިރާގެ މެމްބަރ ހިސާން ހުސައިން ބިލް ހުށަހެޅުއްވުމާއެކު ހިސާން އަށް ކުރިމަތިވެވަޑައިގެންނެވި ނުރައްކަލާ ގުޅިގެން ސަރުކާރުގެ ފަރާތުން އެޓަރނީ ޖެނެރަލް ފިޔަވައި އެހެން އެއްވެސް ބޭފުޅަކު އެކަމަނާ ދިފާއުނުކުރައްވާކަމަށް މަޖިލީހުގެ ނައިބު ރައީސް އީވާ އަބްދުﷲ ވިދާޅުވެއްޖެއެވެ.
މިހާރު ކުރިޔަށްދާ ރައްޔިތުންގެ މަޖިލީހުގެ ޖަލްސާގައި މި ބިލްގެ ކޮމިޓީ ރިޕޯޓަށް ބަހުސްކުރަމުންދާއިރު މި ބިލް އަނބުރާ ކޮމިޓީއަށް ފޮނުވާލުމަށް އެމްޑީޕީގެ ޕާލަމަންޓްރީ ގްރޫޕުން ވަނީ ނިންމާފައެވެ. މި ބިލް މަޖިލީހަށް ހުށަހަޅައިގެން ސަކަރާތެއްގެ ގޮތުގައި މިކަން ނަންގަވާކަމަށް ވިދާޅުވެ މަޑުއްވަރީ ދާއިރާގެ މެމްބަރ ޕީއެންސީ މެމްބަރ އާދަމް ޝަރީފް ވިދާޅުވުމުން އެކަމާ ގުޅޭގޮތުން ވާހަކަދައްކަވަމުން އީވާ ވިދާޅުވީ މި ބިލަކީ ސާމާސާއެއް ވެސް ނޫންކަމަށާއި އަދި ސަކަރާތެއް ވެސް ނޫންކަމަށެވެ. މި ބިލަކީ ސަރުކާރުގެ ފަރާތުން ހުށަހެޅި ބިލެއްކަން ފާހަގަކުރައްވާ އީވާ ވިދާޅުވީ ބިލަށް ކޮމިޓީން ގެނައި އިސްލާހަށް އަނެއްކާވެސް އިސްލާހު ހުށަހެޅުއްވީ ސަރުކާރުގެ ފަރާތުންކަމަށެވެ. އީވާ އެ އިޝާރާތް ކުރައްވަނީ ދާންދޫ ދާއިރާގެ މެމްބަރ ޔައުގޫބް އަބްދުﷲ މިބިލްގެ ކޮމިޓީ ރިޕޯޓަށް ހުށަހެޅުއްވި އިސްލާހަށެވެ. ޔައުގޫބް ހުށަހެޅުއްވި އިސްލާހުގައި ވަނީ ކުރިން ހިސާން ހުށަހެޅުއްވި އިސްލާހަށް އެއްކޮށް އިސްލާހެއް ހުށަހަޅުއްވާފައެވެ.
އީވާ ވިދާޅުވީ ސަރުކާރުން އަނެއްކާވެސް އިސްލާހެއް ހުށަހަޅުއްވާ މި ބިލްގެ މަހުފޫމް އެއްކޮށް ބަދަލުކުރެއްވީ ކަމަށެވެ. އަދި އެމްޑީޕީގެ ޕީޖީން މި ބިލް އަނބުރާ ކޮމިޓީއަށް ފޮނުވުމަށް ފާސްކުރުމުން ހާސިލްމިވީ އެންމެ ކަމެއްކަމަށް އީވާ ވިދާޅުވިއެވެ. އެއީ ހިސާން ނުރައްކަލާއި މަރުގެތުންފަތް މައްޗަށް ހުށަހެޅުންކަމަށް އީވާ ވިދާޅުވިއެވެ.
އީވާ ވިދާޅުވީ ހިތާމައަކީ ބަސްބުނާ މީހުންނަށް މިހެން ކަންތައްކުރާތީ ކަމަށާއި އަމިއްލަ ޕީޖީ ގްރޫޕްގެ ތެރެއިން މިކަން މިގޮތަށް ކުރާތީކަމަށެވެ. އަދި މިބިލް ރައްޔިތުންގެ މަޖިލީހަށް އައިސްފައިވަނީ އޭޖީން ރައީސް އޮފީހަށް ހުށަހެޅުމަށްފަހު ރައީސް އޮފީހުގެ މަޝްވަރާގެ މަތިންކަމަށެވެ. އަދި ސަރުކާރުން މަޖިލީހަށް ބިލެއް ހުށަހަޅާކަމަށްވާނަމަ އެބިލް ހުށަހަޅާނީ އެމްޑީޕީ ޕީޖީ ގްރޫޕަށް ކަމަށާއި ބިލް މަޖިލީހަށް އަންނަނީ އޭގެފަހުން ކަމަށް އީވާ ވިދާޅުވިއެވެ.
މި ބިލް ކޮމިޓީއަށް އަނބުރާ ފޮނުވާލުމަށް ބައެއް މެމްބަރުން ގޮވާލެއްވިއިރު އަނެއް ބައި މެމްބަރުން ވަނީ ބިލް މަޖިލީހުން ބޭރުކޮށްލުމަށް ގޮވާލައްވާފައެވެ.
ނަފުރަތުގެ ބިލާމެދު ޚިޔާލުތަފާތުވުންތައް އުފެދިފައިވާއިރު މި ބިލްގެ ކޮމިޓީ މަރުހަލާގައިވަނީ ކަމާބެހޭ ފަރާތްތަކުގެ ޚިޔާލު ހޯދާ އެކަންކަމަަށް ރިއާޔަތްކޮށްފައެވެ.
