ވެކްސިން ފުރިހަމަ ކުރި މީހުންނަށް ލަންކާއަށް ދެވޭނެ
ލަންކާއަކީ ދިވެހިން އެކި ބޭނުންތަކުގައި ދަތުރުކުރާ ގައުމެއް
ސްރީލަންކަން އެއަރލައިންގެ ބޯޓެއް
ވެކްސިންގެ ދެ ޑޯޒް ފުރިހަމަ ކުރި މީހުންނަށް ސްރިލަންކާ ހުޅުވާލައިފިއެވެ.
ވެކްސިންގެ ދެ ޑޯޒް ފުރިހަމަ ކޮށްފައިވާ މީހުންގެ ތެރެއިން ސްރިލަންކާއަށް ދަތުރުކުރާ މީހުންނަށް ލުއިތަކެއްދީ، އައު އުސޫލްތަކެއް އެ ގައުމުންވަނީ އާންމުކޮށްފައެވެ. އެ އުސޫލުގައި ބުނާގޮތުން ވެކްސިން ފުރިހަމަ ކޮށްފައިވާ މީހުންނަށް ދެން ކަރަންޓީން ވާކަށް ނުޖެހޭނެއެވެ. އެމީހުން ލަންކާއަށް އެތެރެވެ ކޮވިޑް ޓެސްޓެއް ހަދަން ޖެހޭނެއެވެ. އެ ޓެސްޓްގެ ނަތީޖާ ލިބި ނެގެޓިވް ވެއްޖެނަމަ ކަރަންޓީން ވާކަށްނުޖެހޭ ކަމަށް މިހާރުގެ އުސޫލުގައި ވެއެވެ.
އެހެންނަމަވެސް ލަންކާއަށް ދަތުރުކުރުމުގެ ކުރީން ހުއްދަ ހޯދަން ޖެހެއެވެ. އެގޮތުން އާންމު ބޭނުންތަކަށް ލަންކާއަށް ދަތުރުކުރާ މީހުން ހުއްދަ ހޯދަން ޖެހެނީ އެގައުމުގެ ފޮރިން މިނިސްޓްރީންނެވެ. ލަންކާގެ ހެލްތް މިނިސްޓްރީން ބުނެފައިވަނީ، އީމެއިލް މެދުވެރިކޮށް ހުއްދައަށް އެދެވޭނެ ކަމަށެވެ.
ލަންކާއަށްދާ ފަތުރުވެރިން ހުއްދަ ހޯދަން ޖެހޭނީ ޓޫރިޒަމް މިނިސްޓްރީގެ ރަސްމީ ވެބްސައިޓް މެދުވެރިކޮށެވެ.
އެހެންނަމަވެސް ދެކުނު އެމެރިކާ އާއި ދެކުނު އެފްރިކާގެ ގައުމުތަކުން ލަންކާއަށްދާ މީހުންނަށް މި ލުއިތަކެއް ނުލިބެއެވެ.
ލަންކާއަކީ ދިވެހިން އެކި ބޭނުންތަކުގައި ދަތުރުކުރާ ގައުމެކެވެ.
