އައްޑޫ އަދި ފުވައްމުލައް ސިޓީ ނޭޗަރ ޕާކް ބެލެހެއްޓުމުގައި ހަރަކާތްތެރިވާ، މިނިސްޓްރީގެ މުވައްޒަފުން ސިޓީ ކައުންސިލަށް ބަދަލުކޮށްފި
މިއީ އައްޑޫ ސިޓީ ކައުންސިލް އަދި ފުވައްމުލައް ސިޓީ ކައުންސިލާއެކު މި މިނިސްޓްރީން ސޮއިކުރި އެއްބަސްވުމުގެ ދަށުން ގެނެވުނު ބަދަލެއް
އައްޑޫ ސިޓީ ނޭޗަރ ޕާކް
އައްޑޫ ސިޓީ އަދި ފުވައްމުލައް ސިޓީގެ ނޭޗަރ ޕާކް ބެލެހެއްޓުމުގެ ޢަމަލީ މަސައްކަތުގައި އެ ދެ ސިޓީގައި ހަރަކާތްތެރިވާ އެންވަޔަރަންމަންޓު މިނިސްޓްރީގެ މުވައްޒަފުންނަކީ، އެ ދެ ސިޓީގެ ކައުންސިލް އިދާރާގެ މުވައްޒަފުންގެ ގޮތުގައި ސިވިލް ސަރވިސް ކޮމިޝަނުން މިއަދު ކަނޑައަޅައިފިއެވެ.
މި ގެވުނު ބަދަލަކީ، ތިމާވެށީގެ ދުވަސް ކަމުގައިވާ 5 ޖޫންގައި، މިއަހަރު އައްޑޫ ސިޓީ ކައުންސިލް އަދި ފުވައްމުލައް ސިޓީ ކައުންސިލާއެކު މި މިނިސްޓްރީން ސޮއިކުރި އެއްބަސްވުމުގެ ދަށުން ގެނެވުނު ބަދަލެކެވެ.
މި ބަދަލުގެ ގެނައުމުގެ އެންމެ ބޮޑު ބޭނުމަކީ، ތިމާވެށީގެ ޤާނޫނުގެ ދަށުން ޙިމާޔަތްކޮށްފައިވާ ސަރަޙައްދުތައް ހިންގާ ބެލެހެއްޓުން ލާމަރުކަޒުކޮށް، އެ ސަރަޙައްދެއް ނިސްބަތްވާ ކައުންސިލުގެ ދައުރު މިކަމުގައި ފުޅާކޮށް، ސަރުކާރުގެ ލާމަރުކަޒީ ސިޔާސަތާ އެއްގޮތަށް މިނިސްޓްރީގެ މަސައްކަތްތައް ތަރުތީބުކުރުމެވެ.
މި ބަދަލުކުރެވުނު މުވައްޒަފުންގެ އިތުރުން، މިނިސްޓްރީއާއި އައްޑޫ އަދި ފުވައްމުލައް ސިޓީ ކައުންސިލާ ދެމެދު ވެފައިވާ އެއްބަސް ވުމުގެ ދަށުން، އެ ދެ ސިޓީގައި ޙިމާޔަތްކޮށްފައިވާ ސަރަޙައްދުން ލިބޭ މާލީ ފައިދާއާއި، ނޭޗަރ ޕާކް ހިންގުމަށް ޤާއިމްކޮށްފައިވާ އިމާރާތްތަކާއި އަދި އެންމެހާ މުދަލެއް ސިޓީ ކައުންސިލަށް ބަދަލުކުރުމުގެ މަސައްކަތްވެސް އެންވަޔަރަމަންޓް މިނިސްޓްރީން ދަނީ ކުރަމުންނެވެ.
