ރިސޯޓު މުވައްޒަފުން ދެ ޑޯޒް ޖެހުމުން ކަރަންޓީންވާން ނުޖެހޭ ގޮތަށް ނިންމައިފި

ރިސޯޓު މުވައްޒަފުން ދެ ޑޯޒް ޖެހުމުން ކަރަންޓީންވާން ނުޖެހޭ ގޮތަށް ނިންމައިފިއެވެ.

މިކަން ހާމަކުރައްވާ ބުދަ ދުވަހު ޓޫރިޒަމް މިނިސްޓަރ ޑރ. އަބްދުﷲ މައުސޫމް ކުރެއްވި ޓުވީޓެއްގައި ވިދާޅުވީ ރިސޯޓު މުވައްޒަފުން ވެކްސިން ފުރިހަމަކޮށް 14 ދުވަސްވުމުން ޕީސީއާރް ޓެސްޓުން ފާސްވެގެން ކަރަންޓީންވާން ނުޖެހި (މޮނިޓަރިންގގައި އޮންނަ ރިސޯޓު/ރަށް ފިޔަވައި) ރަށަށް ދެވޭގޮތަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ނިންމެވީތީ އުފާކުރައްވާ ކަމަށެވެ. އަދި ތަފުސީލު އެޗުޕީއޭއިން ލިބުމުން މިނިސްޓްރީން ރިސޯޓުތަކަށް އަންގާނެ ކަމަށް ވެސް މިނިސްޓަރ ވިދާޅުވިއެވެ.

މިނިސްޓަރ މައުސޫމް މިފަދައިން ވިދާޅުވެފައިވާއިރު ރިސޯޓް މުވައްޒަފުން ޗުއްޓީ ނަގައިގެން އާއިލާ ކައިރިއަށް ރަށަށް ދާއިރު، ކަރަންޓީން ވާންޖެހޭ މުއްދަތު ޗުއްޓީގައި ނުހިމެނުމަށް ވެސް ވަނީ މީގެ ކުރިން އެދިވަޑައިގަންފައެވެ. ބައެއް ރިސޯޓްތައް އޮޕަރޭޓް ކުރަމުންދަނީ ވަރަށް މަދު މުވައްޒަފުން ތަކަކާ އެކުގައިކަން ފާހަގަކުރައްވައި މިނިސްޓަރު ވިދާޅުވީ، ރިސޯޓް މުވައްޒަފުން ވަމުން އަންނަ ގުރުބާނީގެ އަގު އިންޑަސްޓްރީގެ ބޭފުޅުން ވަރަށް ރަނގަޅަށް ދެއްވާނެ ކަމަށް އުންމީދުކުރައްވާ ކަމަށާއި، އަދި ކަރަންޓީންގެ މުއްދަތު ޗުއްޓީގެ ތެރޭގައި ނުހިމަނައި އެކަން ފަހިކޮށްދޭނެ ކަމަށް އުންމީދު ކުރައްވާ ކަމަށެވެ.

މިނިސްޓަރު މައުސޫމް ވިދާޅުވީ މިއަދުވެސް އެންމެ ގިނައިން ލިބޭ ޝަކުވާއަކީ ރިސޯޓްތަކުގައި މަސައްކަތްކުރާ މުވައްޒަފުން ރަށަށް ގޮސް ކަރަންޓީންވާން ޖެހޭ ކަމުގެ ޝަކުވާ ކަމަށެވެ.

ރިސޯޓު މުވައްޒަފުން ދެ ޑޯޒް ޖެހުމުން ކަރަންޓީންވާން ނުޖެހޭ ގޮތަށް ނިންމާފައިވާއިރު ކޮވިޑް-19 ޖެހުނުތާ ދެ މަސް ނުވާނަމަ ކަރަންޓީންވުމަކާ ނުލައި ރަށަށް ދެވޭ ގޮތް ވެސް އެޗްޕީއޭ އިން ވަނީ ކަނޑައަޅާފައެވެ. ކޮވިޑް-19 ޖެހި ރަނގަޅުވެފައިވާ މީހުންނަށް، 60 ދުވަހުގެ ތެރޭގައި، ކަރަންޓީން ވުމަކާ ނުލައި އެއްރަށުން އަނެއް ރަށަށް ދަތުރުކުރުމުގެ ފުރުސަތު ލިބޭނެ ކަމަށެވެ.

ކަރަންޓީންވުމަކާ ނުލައި ރަށަށް ދެވުނު ނަމަވެސް ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކާއި އުސޫލުތަކާ އެއްގޮތަށް އަމަލުކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ވަނީ އިލްތިމާސްކޮށްފައެވެ. އާއްމު އުސޫލުން ނަމަ މާލެ ސަރަހައްދުން ދަތުރުކުރާ ކޮންމެ މީހަކު ވެސް 14 ދުވަހަށް ކަރަންޓީންވާން ޖެހެއެވެ. ނަމަވެސް ބައެއް ރަށްރަށުގައި ކަރަންޓީންވާ މީހުން އުސޫލާ ޚިލާފުވުމާގުޅިގެން ފިޔަވަޅު އަޅާފައިވެއެވެ.