އިމްރާން ޚާން ވަނީ ޕާކިސްތާން ރައްޔިތުންގެ ދިރިއުޅުން ހަލާކުކޮށްލާފައި – ޝަބާޒް ޝަރީފް
6 ޖުލައި 2021 | އަންގާރަ 09:47ކޮރަޕްޝަނުގެ މައްސަލަ ދުވަހެއް ދުވަހަކަށް އަންނަނީ ބޮޑުވަމުން
ޕާކިސްތާނުގެ އިދިކޮޅު ލީޑަރު ޝަބާޒް ޝަރީފް
ޕާކިސްތާނުގެ ބޮޑުވަޒީރު އިމްރާން ޚާން ވަނީ އެގައުމުގެ ރައްޔިތުންގެ ދިރިއުޅުން ހަލާކުކޮށްލާފައި ކަމަށް އިދިކޮޅު ލީޑަރު ޝަބާޒް ޝަރީފް ވިދާޅުވެއްޖެއެވެ.
މީޑިއާއަކަށް ދިން އިންޓަރވިއުއެއްގައި އިދިކޮޅު ލީޑަރު ޝަބާޒް ވިދާޅުވީ އިމްރާން ޚާން ބޮޑުވަޒީރުކަމާއި ހަވާލުވެވަޑައިގަތީ ހުވާކުރައްވާތާ 90 ދުވަހުގެ ތެރޭގައި ގައުމުގައި ހުރި ކޮރަޕްޝަނުގެ މައްސަލަތަކަށް ހައްލު ހޯއްދަވައިދެއްވާނެ ކަމަށް ވިދާޅުވުމަށްފަހުގައި ކަމަށެވެ. އެހެންނަމަވެސް މިއަދާ ހަމައަށް ވެސް އެއިން ކަމަކަށް ހައްލު ހޯއްދަވައި ދެވިފައިނުވާ ކަމަށާއި، އޭގެ ބަދަލުގައި އެ މައްސަލަތައް ބޮޑުވެފައިވާ ކަމަށެވެ.
ޝަބާޒް ވިދާޅުވީ ޕާކިސްތާނު އަނދަވަޅަކަށް ވެއްޓެމުން އަންނަ ކަމަށާއި، ގައުމުގެ އިންފްލޭޝަނަށް އެކަނި ބަލާލިކަމުގައި ވިޔަސް އެކަން އެނގޭ ކަމަށެވެ. އަދި ދުވަހެއް ދުވަހަކަށް ފަގީރުން ގިނަވާ ކަމަށާއި، ހަމަނުޖެހުމާއި ޓެރަރިސްޓުން އިންތިހާ ދަރަޖައަށް އިތުރުވަމުން އަންނަ ކަމަށެވެ. މީގެ އިތުރުން ގައުމުތަކުން ބޮޑެތި ލޯނުތައް ނަގާފައިވާ ކަމަށާއި، ހާއްސަކޮށް ޗައިނާއަށް ބަރޯސާވެފައި އޮތް އޮތުން ނިމުމަކަށް ގެންނަންޖެހޭ ކަމަށް ޝަބާޒް ވިދާޅުވިއެވެ.
ޝަބާޒް މިހެން ވިދާޅުވެފައިވާއިރު، ޗައިނާއަތުން ޕާކިސްތާނުން ބޮޑެތި ލޯނުތައް ނަގަމުން އައުމާ ގުޅިގެން އިންޑިއާގެ އިތުރުން އަވަށްޓެރި ގައުމުތަކުގެ ފާޑުކިޔުން ޕާކިސްތާނަށް ވަނީ އަމާޒުވެފައެވެ.
