މާލެ ދެވޭނެ ތާރީޚެއް ނޭނގޭ، ރަނގަޅުވާން އަދި ދުވަސްތަކެއް ނަގާނެ: ނަޝީދު
އެމަނިކުފާނުގެ ހަށިކޮޅަށް 10 ރޭޒާ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވޭ
ރައީސް ނަޝީދަށް ލިބިވަޑައިގެންނެވި އަނިޔާތައް ހާމަކުރެއްވުމުގެ ގޮތުން އާންމުކުރެއްވި ފޮޓޯތަކެއް
މެއި މަހުގެ 6 ވަނަ ދުވަހުގެ ރޭ ރައީސް މުހައްމަދު ނަޝީދު އަވަހާރަކޮށްލުމަށް ދިން ހަމަލާގައި ލިބިވަޑައިގެންނެވި އަނިޔާތަކަށް ފަރުވާ ހޯއްދަވަމުން ގެންދަވާއިރު އަދިވެސް ހާލުކޮޅު ރަނގަޅުވާން ދުވަސްތަކެއް ނަގާނެކަމަށް ގަބޫލުފުޅު ކުރައްވާކަމަށް އެމަނިކުފާނު ވިދާޅުވެއްޖެއެވެ.
ރައީސް ނަޝީދަށް ލިބިވަޑައިގެންނެވި އަނިޔާތަކަށް އޭޑީކޭ ހޮސްޕިޓަލްގައި ވަނީ 16 ގަޑިއިރުގެ ދިގު އޮޕަރޭޝަނެއް ކުރިޔަށް ގެންގޮސްފައެވެ. އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާ ފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. އިތުރު ފަރުވާ ހޯއްދެވުމަށް ޖަރުމަނުވިލާތަށް ވަޑައިގެންނެވީ މެއި މަހުގެ 13 ވަނަ ދުވަހުއެވެ. އޭގެފަހުން ޖަރުމަނުވިލާތުގައިވެސް ވަނީ އިތުރު އޮޕަރޭޝަންތަކެއް ކުރައްވާފައެވެ. ފައިގެ އޮޕަރޭޝަނެއް ކުރައްވާފައިވާކަމަށް ރައީސް ނަޝީދުގެ އާއިލާއިން ވަނީ ބުނެފައެވެ. އެއަށްފަހު އިތުރު ފަރުވާ ހޯއްދެވުމަށް މިހާރު ހުންނެވީ އިނގިރޭސިވިލާތުގައެވެ. ޖުލައި މަހުގެ 2 ވަނަ ދުވަހު އިނގިރޭސިވިލާތަށް ވަޑައިގަންނަވާފައި މިވަނީ ޖަރުމަނުވިލާތުގައި މަސްދުވަހަށްވުރެ ގިނަ ދުވަހު ހުންނެވުމަށްފަހުއެވެ.
ހޯމަ ދުވަހުގެ ރޭ އޮތް އާސްކް ސްޕީކަރ ޕްރޮގްރާމްގައި، އެނބުރި މާލެ ވަޑައިގަންނަވާތީ ކޮންއިރަކުންތޯ އާންމުންގެ މީހަކު ކުރި ސުވާލަކަށް ޖަވާބު ދެއްވަމުން ވިދާޅުވީ ގިނަ ކަންކަން ރަނގަޅު ކަމަށެވެ. ނަމަވެސް އަދިވެސް ރަނގަޅަށް ހިނގައިނޫޅެވޭކަމަށާއި އިނގިލިތައް ހުންނަނީ އައްސިވެފައިކަމަށް ވިދާޅުވިއެވެ.
ހަމަލާއަށްފަހު ލިބިވަޑައިގެންނެވި އަނިޔާތަކާ ގުޅޭގޮތުން ތަފްސީލީ ގޮތެއްގައި ފުރަތަމަ ފަހަރަށް ރައީސް ނަޝީދު ވާހަކަދައްކަވާފައިވަނީ އެމްޑީޕީގެ އަހަރީ ދުވަހުއެވެ. އެއީ ޖޫން މަހުގެ 26 ވަނަ ދުވަހުގެ ރޭ ބޭއްވި އެމްޑީޕީގެ ކްލަބް ހައުސް ހަރުގެ ލޯންޗްކުރުމުގެ ރަސްމިއްޔާތުގައެވެ. އެރަސްމިއްޔާތުގައި ވާހަކަދައްކަވަމުން ވެސް ވިދާޅުވެފައިވަނީ އެތެރެހަށީގެ ހުރިހާ ގުނަވަނެއް ރަނގަޅުކަމަށާއި ނަމަވެސް އިނގިއްޔާއި ކަންފަތާއި ފައިގައި މައްސަލަ އުޅޭކަމަށް ނަޝީދު ވިދާޅުވިއެވެ. އަދި ކަނާތުގެ ތިން އިނގިއްޔެއް އައްސިވެފައި ހުންނަކަމަށް ނަޝީދު ވިދާޅުވިއެވެ.
އާސްކް ސްޕީކާރ ޕްރޮގްރާމްގައި ހާލުކޮޅާ ގުޅޭގޮތުން ވާހަކަދައްކަވަމުން ވިދާޅުވީ އެކަންކަން ރަނގަޅުވެ ހަމަޔަށް ހިނގާ އުޅެވެން ފެށުމުން މާލެ ވަޑައިގަންނަވާނެކަމަށެވެ. ނަމަވެސް މިހާރުގެ ހާލަތު ބަލާއިރު ކަންފަތް ވެސް ރަނގަޅުވާން ޖެހޭކަމަށް ވިދާޅުވިއެވެ.
އެމްޑީޕީގެ ކްލަބް ހައުސް ހަރުގެ ލޯންޗްކުރުމުގެ ރަސްމިއްޔާތުގައި ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ ވާތު ކަންފަތުގައި އަޑުއިވުމުގައި ދަތިތަކެއް އެބަހުރިކަމަށެވެ. ވާތު ކަންފަތުގެ ތޫލިއަށް ލިބިފައި ހުރި ގެއްލުމާ ގުޅިގެން އިތުރު އޮޕަރޭޝަނެއް ނޮވެމްބަރ މަހު ކުރައްވަން ޖެހިވަޑައިގަންނަވާކަމަށް ނަޝީދު ވިދާޅުވިއެވެ.
ވާތް ފަރާތުގެ ވަރަށް ގިނަ ތަންތަން ހުންނަނީ އައްސިވެފައި ކަމަށާއި އެ އައްސި ކަނޑައިގެން ދާން ދުވަސްތަކެއް ނަގާނެކަމަށެވެ. އަދި މަސައްކަތް ކުރައްވަމުން ގެންދަވަނީ ވީ އެންމެ އަވަހަކަށް ރާއްޖެ ވަޑައިގަތުމަށް ކަމަށް އެރޭ ވެސް ވިދާޅުވިއެވެ.
