އިންސާފު ލިބޭނެކަމަށް ދެކެން، ޚަރަދުކުރި މީހުންގެ މައުލޫމާތު ހޯދުމަށް ކުރެވިފައިވާ މަސައްކަތް މަދު: ނަޝީދު
ރައީސް ނަޝީދު ވިދާޅުވީ ތަހުގީގާ ގުޅޭ ސީދާ މައުލޫމާތު ލިބިވަޑައިނުގަންނަވާކަމަށް
ރައީސް މުހައްމަދު ނަޝީދު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު އަވަހާރަކޮށްލުމަށް ދެވުނު ހަމަލާގައި މިހާތަނަށް ކުރެވިފައިވާ މަސައްކަތްތަކާ ގުޅޭގޮތުން ލިބިވަޑައިގެންނެވި މައުލޫމާތުތަކުން ސާފުވެފައިވާ ކަމަކީ ހަމަލާއަށް ޚަރަދުކުރި މީހުން ހޯދުމަށް ކުރެވިފައިވާ މަސައްކަތް މަދުކަން ކަމަށް އެމަނިކުފާނު ވިދާޅުވެއްޖެއެވެ.
ހޯމަ ދުވަހުގެ ރޭ ކުރިއަށް ގެންދިޔަ އާސްކް ސްޕީކަރ ޕްރޮގްރާމްގައި، ތަހުގީގު ކުރިޔަށްދާ ގޮތާމެދު ހިތްހަމަޖެހޭތޯ އާންމުންގެ މީހަކު ކުރި ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ ތަހުގީގާ ގުޅޭ ސީދާ މައުލޫމާތު ލިބިވަޑައިނުގަންނަވާކަމަށެވެ. ނަމަވެސް އެމްޑީޕީގެ ފަރާތުންނާއި މަޖިލީހުގެ ނައިބު ރައީސްގެ ފަރާތުން މައުލޫމާތު ލިބިވަޑައިގަންނަވާފައިވާ ކަމަށް ވިދާޅުވިއެވެ.
ރައީސް ނަޝީދަށް އަމާޒުކޮށްދިން ހަމަލާގައި އެމަނިކުފާނަށް އިންސާފުލިބޭނެކަމަށް ގަބޫލުކުރައްވަންތޯ ކުރެވުނު ސުވާލުގެ ޖަވާބުގައި ވިދާޅުވީ އެމްޑީޕީން މަސައްކަތްކުރަމުން ދިޔައީ ޝަރުޢީ ނިޒާމު އިސްލާހުކުރުމުގެ މަސައްކަތް ފުޅާ ދާއިރާއެއްގައި ކުރިޔަށް ގެންދިޔުމަށްކަމަށެވެ. އަދި ފުލުހުންގެ ގާނޫނަށް ވެސް ބަދަލުތަކެއް ގެނެވިފައިވާކަމަށް ވިދާޅުވިއެވެ.
އެހެންކަމުން މިހާރު މިސްރާބު ޖަހާފައި މިވަނީ އިންސާފު ލިބޭނެ ގޮތްގޮތަށް ކަމަށް ވިދާޅުވިއެވެ.
ރައީސް ނަޝީދު ވިދާޅުވީ ހަމައެކަނި ފުލުހުން ހިންގާ ތަހުގީގެއްގެ ތެރެއިން ރަނގަޅު ނަތީޖާއެއް ނުނިކުންނާނެކަމަށެވެ. މިކަމަކީ ގައުމީ މައްސަލައެއްގެ ގޮތުގައި ބަލައިގެން ކުރިޔަށް ގެންދަންޖެހޭ ކަމަށް ވިދާޅުވިއެވެ.
ބޮމެއް ގޮއްވާލަން އުޅޭކަމަކަށާއި އެފަދަ ކަމެއް ކޮށްފާނެކަމަށް ހުދު އެމަނިކުފާނު ވެސް ހީފުޅުނުކުރައްވާ ކަމަށް ވިދާޅުވިއެވެ. ނަމަވެސް މިވަނީ ބޮމެއް ގޮއްވާލާފައިކަމަށާއި އެހެންކަމުން ދެން ކުރެވެން އޮތްކަމަކީ މިކަމުގައި ބައިވެރިވާ އެންމެން ވީހާވެސް އަވަހަށް ހިފައި ހައްޔަރުކުރުންކަމަށް ނަޝީދު ވިދާޅުވިއެވެ.
އަދި އެކަމާ ގުޅޭގޮތުން ބޭރުގެ ފަރާތްތަކުގެ ޓެކްނިކަލް އެހީތެރިކަން ހޯދުމަށް ކޮމިޝަނަރ އޮފް ޕޮލިސް މުހައްމަދު ހަމީދު އަރިހުގައި ދަންނަވާފައިވާނެ ކަމަށް ވިދާޅުވިއެވެ. އަދި ތަހުގީގުގައި އޮސްޓްރޭލިއާ އާއި އިނގިރޭސިވިލާތާއި އެހެނިހެން ސަރުކާރުތަކުގެ ވެސް އެހީތެރިކަން ހޯދަމުން ގެންދާކަން އެނގިވަޑައިގަންނަވާ ކަމަށް ވިދާޅުވިއެވެ.
ރައީސް ނަޝީދު ވިދާޅުވީ މިހަމަލާ ރޭވި މީހުންނާއި ޚަރަދު ކުރި މީހުން ނުހޯދޭނަމަ އެއޮތީ މިކަން ނުވެފައި ކަމަށެވެ.
ހަމަލާގެ ތަހުގީގުގެ ކަންކަން ކުރިޔަށްދާ ގޮތާ ގުޅޭގޮތުން ސީޕީ އާއި ޑިފެންސް މިނިސްޓަރަށް އިތުބާރު ކުރައްވަންތޯ އާންމުންގެ މީހަކު ކުރި ސުވާލަށް ޖަވާބު ދެއްވަމުން ވިދާޅުވީ ޑިފެންސް މިނިސްޓަރ މާރިޔާ އަހުމަދު ދީދީ އާ ގުޅޭގޮތުން އެއްޗެއް ވިދާޅުވާކަށް ނެތިންކަމަށެވެ. އަދި ސީޕީއާ ގުޅޭގޮތުން އެއްޗެއް ވިދާޅުވެވޭނީ ތަހުގީގު ނިމުނީމާ ކަމަށް ވިދާޅުވިއެވެ.
މީގެއިތުރުން ގިނަ ގައުމުތަކުގައި އޮންނަ ގޮތަށް ސެންޓްރަލް ސެކިޔުރިޓީ އެޖެންސީއެއް އޮންނަންޖެހޭކަމަށް ގަބޫލުކުރައްވާކަމަށް ވިދާޅުވިއެވެ. އެއީ މި ހާދިސާއަށް ބަލާއިރު ވެސް ބޮން ގޮއްވުމާ ގުޅޭ އިންޓެލް މައުލޫމާތު ފުލުހުންނަށް ލިބިފައިނުވާކަމަށް ބުނެފައިވާއިރު ހަމަލާއާ ގުޅުންހުރި އެކަކީ ފުލުހުންގެ ވަޒީފާގައި ކުރިން ހުރި މީހެއްކަމަށް ވިދާޅުވިއެވެ.
ރައީސް ނަޝީދު ވަނީ މި ހަމަލާއަކީ ސަރުކާރުގެ ބައިވެރިވުމެއް އޮވެގެން ވަކިން ޚާއްސަކޮށް ޑިފެންސް މިނިސްޓަރާ ގުޅުވާ ދެކެވޭ ވާހަކަތަކާ ގުޅިގެން ކުރެވުނު ސުވާލުތަކަށް ޖަވާބު ދެއްވަމުން، އެ ހަމަލާއަކީ އެފަދަ ގޮތަކަށް ދެވުނު ހަމަލާއެއްކަމަށް އެއްގޮތަކަށް ވެސް ގަބޫލުނުކުރައްވާކަމަށް ވިދާޅުވެފައެވެ.
ޑިފެންސް މިނިސްޓަރު ވެސް އެހެން މިނިސްޓަރަކު ވެސް އަދި ރައީސުލްޖުމްހޫރިއްޔާ ވެސް އެމަނިކުފާނަށް ގެއްލުމެއްދޭން އުޅުއްވާނެކަމަށް ގަބޫލުނުކުރައްވާކަމަށް ވިދާޅުވިއެވެ.
ރައީސް ނަޝީދަށް ދެވުނު ހަމަލާއާ ގުޅިގެން އެމަނިކުފާނަށް އަރުވަމުން ގެންދިޔަ ސެކިޔުރިޓީ ފެއިލްވި ގޮތުގެ އިންކުއަރީއެއް ރައްޔިތުންގެ މަޖިލީހުގެ 241 ކޮމިޓީން އަންނަނީ ކުރިޔަށް ގެންދަމުންނެވެ. އެ އިންކުއަރީގެ މަސައްކަތް މި މަހުގެ 8 ވަނަ ދުވަހު ނިމޭނެކަމަށް ކޮމިޓީގެ މުގައްރިރު ވަނީ ވިދާޅުވެފައެވެ. އަދި ފުލުހުން ކުރިޔަށްގެންދާ ތަހުގީގު މި މަސްތެރޭގައި ނިމޭނެކަމަށް ޕީޖީ ހުސައިން ޝަމީމް ވަނީ ވިދާޅުވެފައެވެ.
