ރާއްޖޭގެ ފަތުރުވެރިކަން ބެލްޖިއަމްގައި އިސްތިހާރުކޮށް އެސަރަހައްދުގައި ރާއްޖޭގެ މަގުބޫލުކަން އިތުރުކުރުމަށް ގިނަ މަސައްކަތްތަކެއް ކުރައްވަމުން ގެންދަވާކަމަށް ރާއްޖެއިން އީޔޫ އަދި ބެލްޖިއަމަށް ކަނޑައަޅުއްވާފައި ހުންނަވާ ސަފީރު ހަސަން ސޯބިރު ވިދާޅުވެއްޖެއެވެ.
ރާއްޖޭގެ ފަތުރުވެރިކަމަށް 50 އަހަރު ފުރުމުގެ މުނާސަބަތުގައި ލޯންޗުކޮށްފައިވާ ލޯގޯ ހިމަނައިގެން ޑިޒައިންކޮށްފައިވާ ސްޓޭމްޕް ލޯންޗުކުރުމަށް ބޭއްވި ހާއްސަ ހަފްލާގައި ސްޓޭމްޕް ލޯންޗުކޮށްދެއްވައި ވާހަކަދައްކަވަމުން ސަފީރު ވަނީ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ އެހީ އާއެކު ބްރަސްލްސް ޕްރެސް ކްލަބްގައި ރާއްޖޭގެ ފަތުރުވެރިކަން އިސްތިހާރުކުމަށް މަގުފަހިވެފައިވާކަން ހާމަކުރައްވާފައެވެ. އެގޮތުން ޕްރެސް ކްލަބް މެދުވެރިކޮށް ރާއްޖޭގެ ރީތިކަން ދައްކައިދޭ ޕޯސްޓަރ އެގްޒިބިޝަނެއް ބާއްވާނެ ކަމަށް ވިދާޅުވެފައެވެ.
އޭގެ އިތުރުން އިކޯ ޓޫރިޒަމް ހަފްތާގައި ރާއްޖެ އިސްތިހާރުކުރަން ހާއްސަ ހަފްލާއެއް ބާއްވާނެ ކަމަށާއި އެހަފްލާގައި ރާއްޖޭގެ ރީތިކަން ދައްކައިދޭ 30 މިނެޓުގެ ވީޑިއޯއެއް ދައްކާނެ ކަމަށް ސަފީރު ވިދާޅުވިއެވެ. އަދި އެމްއެމްޕީއާރްސީން ރާއްޖޭގެ ފަތުރުވެރިކަމާ ގުޅޭގޮތުން ތައްޔާރުކޮށްފައިވާ ސަރކިއުލަރތައް ނިއުސްލެޓަރގެ ގޮތުގައި ބްރަސްލްސް ޕްރެސް ކްލަބްގައި ޝާއިއުކުރަމުންދާނެ ކަމަށް ސަފީރު ވިދާޅުވިއެވެ. އަދި އެމްއެމްޕީއާރްސީން މި ފޯރުކޮށްދިން އެހީތެރިކަމުގެ ބޭނުން އެންމެ ފުރިހަމަގޮތުގައި ހިފާނެ ކަމުގެ ޔަގީންކަން ސަފީރު ވަނީ ދެއްވާފައެވެ.
ތައާރަފުކުރެވިގެން މިދިޔަ ސްޓޭމްޕަކީ ރާއްޖެ އިސްތިހާރުކުރުމަށް އެޅުނު އެއް ފިޔަވަޅުކަމަށާއި މިއާ ވިިދިގެން އިތުރު ގިނަ ހަރަކާތްތަކެއް ކުރިއަށް އޮތްތަނުގައި ކުރިއަށް ގެންދާނެ ކަމަށް ސަފީރު ވިދާޅުވިއެވެ. އަދި މި ސްޓޭމްޕާއެކު ބެލްޖިއަމްގެ އިތުރުން ނެދަލޭންޑްސް އާއި ލަގްޒަމްބާގުގައި ވެސް ރާއްޖެ އިސްތިހާރުކުރުމުގެ މަސައްކަތްކުރައްވާނެ ކަމަށް ވިދާޅުވިއެވެ.
ރާއްޖޭގެ ފަތުރުވެރިކަން މިހާރު ކުރިމަތިލާފައި މިވަނީ ފާއިތުވެގެން މި ދިޔަ އަހަރުތަކުގައި ދުވަހަކު ވެސް ކުރިމަތިލާފައި ނުވާ ކަންތައްތަކަކާ ކަމަށާއި، ގޮންޖެހުންތަކާއި އެކުވެސް މިނިސްޓަރ މައުސޫމާއި ސިނާއަތުގެ ބައިވެރިން ކާމިޔާބު މަސައްކަތްތަކެއް ކުރަމުންދާ ކަމަށް ސަފީރު ފާހަގަކުރެއްވިއެވެ. އަދި އެމްއެމްޕީއާރްސީ އިން ރާއްޖޭގެ ފަތުރުވެރިކަން އިސްތިހާރުކުރުމަށް ކުރަމުންދާ ގިނަ މަސައްކަތްތަކުގެ ތެރެއިން ބެލްޖިއަމްގައި ފަތުރުވެރިކަން އިސްތިހާރުކުރުމަށް ކުރަމުންދާ މަސައްކަތްތަކަށް ސަފީރު ވަނީ ޝުކުރު އަދާކުރައްވާފައެވެ.
އޭގެ އިތުރުން ރާއްޖޭގެ ފޮރިން ޑިޕްލޮމަސީ މިހާރު ބައްޓަންވެފައި ވަނީ ކޮމާޝަލް ޑިޕްލޮމަސީގެ މައްޗަށް ކަމަށާއި އެކި ގައުމުތަކުގައި ގާއިމުކޮށްފައިވާ އެމްބަސީތަކުން ރާއްޖެއާ ދޭދޭ ގައުމުތަކާއެކު އޮންނަ ގުޅުން ހަރުދަނާކުރުމަށް ކުރާ މަސައްކަތްތަކުގެ ތެރޭގައި ރާއްޖޭގެ ކޮމާޝަލް ޑިޕްލޮމަސީ ޕްރޮމޯޓްކޮށް ރާއްޖޭގައި ކުރެވޭ އިންވެސްޓްމެންޓްތައް އިތުރުކޮށް ފަތުރުވެރިކަން އިސްތިހާރުކުރުމުގެ މަސައްކަތްކުރުމަށް ފޮރިން މިނިސްޓަރ އަބްދުﷲ ޝާހިދު ވަރަށް ބޮޑަށް ބާރުއަޅުއްވާކަމަށް ސަފީރު ވިދާޅުވިއެވެ.
މިހަފްލާގާއި ބެނަލުކްސް - މޯލްޑިވްސް ފްރެންޑްޝިޕް ސޮސައިޓީގެ ރައީސް ޖެރާޑް އުއިޓިން ވާހަކަދައްކަވާފައި ވާއިރު، އުއިޓިން ވަނީ މި ސްޓޭމްޕަކީ ރާއްޖެއާ ބެނެލުކްސްގެ ގައުމުތަކުގެ ދެމެދު އޮތް ގުޅުމުގެ ރަމްޒެއްކަމަށް ވިދާޅުވެފައެވެ. ކުރިއަށް އޮތްތާގައި ވެސް ރާއްޖެއާ ބެނެލުކްސްގެ ގައުމުތަކާ ދެމެދު އޮތް ގުޅުން އިތުރަށް ވަރުގަދަކުރުމަށް އިތުރު މަސައްކަތްތަކެއް ކުރުމަށް ބެނަލުކްސް - މޯލްޑިވްސް ފްރެންޑްޝިޕް ސޮސައިޓީން ތައްޔާރަށް އޮތްކަމަށް ވެސް އުއިޓިން ވިދާޅުވިއެވެ.
