އިތުރު އިސްލާހަކާއެކު އާމްދަނީން ޓެކްސް ނެގުމުގެ ބިލު، މުޅި މަޖިލީހުގެ ކޮމިޓީން ފާސްކޮށްފި
5 ޖުލައި 2021 | ހޯމަ 06:29އިސްލާހު ހުށަހެޅުއްވީ މިލަންދޫ ދާއިރާގެ މެމްބަރު އަލި ރިޒާ
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
އާމްދަނީން ޓެކްސް ނެގުމުގެ ބިލު އިޤްތިޞާދީ ކޮމިޓީން ދިރާސާކޮށް ނިންމި ގޮތުގެ ރިޕޯޓަށް ހުށަހެޅި އިތުރު އިސްލާހަކާއެކު މުޅި މަޖިލީހުގެ ކޮމިޓީން ބިލު ފާސްކޮށް ތަޅުމަށް ފޮނުވަން ނިންމައިފިއެވެ.
ހޯމަ ދުވަހު އޮތް މުޅި މަޖިލީހުގެ ކޮމިޓީއަށް ރިޕޯޓް ހުށަހަޅުވުމުން މިލަންދޫ ދާއިރާގެ މެމްބަރު އަލީ ރިޒާ ވަނީ އިތުރު އިސްލާހެއް ހުށަހަޅުއްވާފައެވެ. އަލީ ރިޒާ އިސްލާހު ހުޅަހެއްޅުއްވީ ބިލުގެ 36 ވަނަ މާއްދާއަށެވެ. އިސްލާހު ހުށަހަޅުއްވަމުން އަލީ ރިޒާ ވިދާޅުވީ އާމްދަނީން ޓެކްސް ނެގުމުގެ ގާނޫނުގެ 50 ވަނަ މާއްދާގެ ފަހަތަށް އަކުރެއް އިތުރު ކުރުމަށް ހުށަހަޅުއްވާ ކަމަށެވެ. އެގޮތުން އެ މާއްދާގެ (އ) ގައި ބުނެފައިވާ ގޮތުން ފައިސާ ލިބޭ ފަރާތުން ދައްކާފައިވާ ޓެކުހުގެ އަދަދަކީ އެފަރާތުން އެ ހިސާބުކުރާ މުއްދަތަށް ދައްކަންޖެހޭ ޖުމްލަ ޓެކުހުގެ އަދަދުން ކެނޑިދާނެ އަދަދެކެވެ.
އެ އިސްލާހު ބިލުގައި ހިމެނުމަށް މުޅި މަޖިލީހުގެ ކޮމިޓީގައި ވޯޓަށް އެއްސެވުމުން ވޯޓުގައި ބައިވެރިވެވަޑައިގެންނެވި 26 މެމްބަރުންގެ ތެރެއިން 25 މެމްބަރުން އިސްލާހަށް ތާއީދު ކުރެއްވިއެވެ. ވަކި ގޮތަކަށް ވޯޓު ނުދެއްވާ އެއް މެމްބަރަކު އިންނެވިއެވެ.
އިޤްތިޞާދީ ކޮމިޓީން ބިލު ދިރާސާ ކުރި ގޮތުގެ ރިޕޯޓަށް ހުށަހެޅި އިސްލާާހާއެކު ބިލު ފާސްކުރުުމަށް މަޖީލީހުގެ ތަޅުމަށް ފޮނުވުމަށް މުޅި ކޮމިޓީގައި ވޯޓަށް އެއްސެވުމުން ވޯޓުގައި ބައިވެރިވެވަޑައިގެންނެވި 28 މެމްބަރުންގެ ތެރެއިން 27 މެމްބަރުން ތާއީދު ކުރެއްވިއެވެ. ތާއީދު ނުކުރައްވާ އެއް މެމްބަރަކު އިންނެވިއެވެ.
އާމްދަނީން ޓެކްސް ނެގުމުގެ ގާނޫނަށް އިސްލާހު ގެނައުމުގެ ބޭނުމެއްކަމަށް ބިލުގައި ބުނެފައިވަނީ، ޓެކްސް ނެގޭ އުޖޫރައިގެ ތެރެއިން އިސްތިސްނާ ބާވަތްތައް އިސްތިސްނާ ކުރުމާއި، ވަޒަންވެރިވެފައިނުވާ ފަރާތްތަކަށް ދައްކަންޖެހޭ ބޭންކް ކޮމިޝަން، އިންޓަރ ކަނެކްޝަން ޗާރޖް، އަދި ރިއިޝުއަރެންސް ޕްރިމިއަމް އިންދަ ޓެކްސް ދެއްކުމުން އިސްތިސްނާ ކުރުމާއި، ޓެކްސް ނަގަން ފެށިފަހުން ގާނޫނު ތަންފީޒު ކުރުމުގައި ހުރި ދަތިތައް ހައްލު ކުރުމާއި، އާމްދަނީން ޓެކްސް ނެގުމުގެ ނިޒާމް އިތުރަށް ހަރުދަނާ ކުރުމާއި، ގާނޫނު ތަންފީޒުކުރުމުގައި ހުރި ދަތިތައް ހައްލުކުރުމަށް ގާނޫނަށް އިސްލާހު ގެނައުމެވެ.
ބިލުގައި ހިމެނޭ މައިގަނޑު ބައިތަކުގެ ތެރޭގައި، ޓެކްސް ނެގޭނެ ކަންކަމުގެ ތެރެއަށް، ގާނޫނާ ޚިލާފަށް ލިބޭ މުދަލާއި ފައިސާއާއި، ހޯދި ގޮތް ނޭނގޭ މުދަލާއި ފައިސާ، އިންވެސްޓްމެންޓް، އަދި އެންމެހައި މުދާ ހިމަނައި އިތުރު ކުރުން ހިމެނެއެވެ. އަދި ބައިނަލްއަގުވާމީ ދަތުރުފަތުރުގައި ކަނޑު ބޯޓް ނުވަތަ މަތިންދާ ބޯޓް އޮޕަރޭޓްކުރާ، ރާއްޖޭގައި ވަޒަންވެރިވެފައިނުވާ ފަރާތްތަކުގެ ތެރެއިން ރާއްޖެއިން ފުރައިގެންދާ އުޅަނދަކުން ޓެކްސް ނަގާނީ އެފަރާތެއްގެ ދާއިމީ މަރުކަޒެއް ރާއްޖޭގައި ހުރި ފަރާތެއް ކަމުގައި ކަނޑައެޅުން ވެސް ހިމެނެއެވެ.
އާމްދަނީން ޓެކްސް ނެގޭނެ ހަރަކާތްތަކުގެތެރޭގައި، ރާއްޖޭގައި ފޯރުކޮށްދޭ ޚިދުމަތްތަކަށް ލިބޭ ކޮމިޝަން، ރާއްޖޭގައި މުނިފޫހި ފިލުވައިދޭ މީހުންގެ އާމްދަނީ އާއި، ރިސާރޗްތަކަށް ލިބޭ އާމްދަނީ އާއި، ރާއްޖޭގައި ވަޒަންވެރިވެފައިނުވާ ކޮންޓްރެކްޓަރަކަށް ލިބޭ އާމްދަނީ ހިމެނުމަށް ހުށަހަޅާފައިވެއެވެ.
އިސްތިސްނާ ބާވަތްތަކުގެ އާމްދަނީގެ ތެރެއިން އެހެނިހެން އެއްވެސް ގާނޫނެއްގެ ދަށުން ނަގާ ޓެކްސް ހިމެނުމާއި، ރައީސާއި ނައިބު ރައީސްގެ މުސާރައާއި އެހެނިހެން އިނާޔަތްތަކާއި، ރައީސް ދިރިއުޅުއްވާ ގެކޮޅާއި، އެގެކޮޅަށް ހިނގާ ޚަރަދާއި، ރައީސަށް ޚާއްސަ ރަށާއި، ނައިބްރައީސަށް ޚާއްސަ ގެކޮޅަށް ހިނގާނެ ޚަރަދު ޓެކްސް ހިސާބު ކުރުމުގައި އިސްތިސްނާ ކުރުމަށް ވެސް ވަނީ ހުށަހަޅާފައެވެ.
އުމްރާނީ ވަސީލަތްތައް ތަރައްގީކުުރުމަށް ކުރާ މަސައްކަތްތަކާ ގުޅޭ ވިޔަފާރިތަަކަށް ލިބޭ އާމްދަނީ، އިކޮނޮމިކް މިނިސްޓަރުގެ ލަފާގެ މަތިން ގާނޫނުގެ ދަށުން ޓެކްސް ނެގުން ފަސް އަހަރުގެ މުއްދަތަކަށް އިސްތިސްނާކުރުމުގެ ބާރު ރައީސަށް ލިބި ދިނުން ހިމެނެއެވެ.
