ދުނިޔޭގެ އެންމެ ބާރުގަދަ ގައުމަށް ބޮޑުހަނގުރާމައިގެ ތެރޭގައި ރާއްޖެއިން އެހީވުން
1943 ވަނަ އަހަރު ހާލުގައި ޖެހުނު އެމެރިކާގެ ސިފައިންގެ ބަޔަކު ރާއްޖެއިން ސަލާމަތްކޮށްދީފައިވޭ
ކޮޅުމަޑުލު ވަންބަދިފުށި: މިރަށުގައި އެމެރިކާ ސިފައިންގެ މަހާނަތަކެއް އެބަހުރި
ދިވެހިރާއްޖެއަށް 26 ޖުލައި 1965ގައި ޚާރިޖީ ފުރިހަމަ ސިޔާސީ މިނިވަންކަން ލިބުމާއެކު ހަމައެދުވަހު އިނގިރޭސިވިލާތާއި ސްރީލަންކާއާއި 2 ގައުމުން ދިވެހިރާއްޖެއާ ސިޔާސީ ގުޅުން ގާއިމުކުރިއެވެ.
އެހެން ގައުމުތަކާއި ދިވެހިރާއްޖެއާ ސިޔާސީ ގުޅުން ގާއިމުކުރެވުނީ 21 ސެޕްޓެންބަރު 1965ގައި ދިވެހިރާއްޖެ އ.ދ. މަޖިލީހުގެ މެންބަރު ގައުމަކަށްވެ 12 އޮކްޓޫބަރު 1965ގައި އ.ދ.ގެ މައިމަރުކަޒުގައި ދިވެހިރާއްޖޭގެ ގައުމީ ދިދަ ވިހުރުވޭން ފެށި، ބައިނަލްއަގުވާމީ ސަފުގައި މިނިވަން ގައުމެއްގެ ގޮތުގައި ދިވެހިރާއްޖެ ސާބިތުވުމަށް ފަހުގައެވެ.
މީގެ 50 އަހަރު ކުރިން 1965ން 1970ށް ދިވެހިރާއްޖެ ވަނީ 15 ގައުމާއި ސިޔާސީ ގުޅުން ގާއިމުކޮށްފައެވެ. ދުނިޔޭގެ އެންމެ ވަރުގަދަ ބާރުގަދަ ގައުމު އެމެރިކާއަކީ ދިވެހިރާއްޖެއާއި 5 ވަނައަށް (މިހާރުގެ ލިސްޓުގައިނަމަ 4 ވަނައަށް) ސިޔާސީ ގުޅުން ގާއިމުކުރި ގައުމެވެ. އެއީ 10 ނޮވެންބަރު 1965ގައެވެ.
އެމެރިކާއާއި ރާއްޖޭގެ ތާރީޚީ ގުޅުންތައް އޭގެ 20 އަހަރު ކުރިންވެސް ފާހަގަކުރެވިފައިވެއެވެ. އެގޮތުން ދިވެހިރާއްޖެއިން ވަނީ ދެވަނަ ބޮޑުހަނގުރާމައިގެ ތެރޭގައި 1943 ވަނަ އަހަރު ހާލުގައި ޖެހުނު އެމެރިކާގެ ސިފައިންގެ ބަޔަކަށް އެހީވެ ފުރާނަ ސަލާމަތްކޮށްދީފައެވެ. އިންޑިޔާ ކަނޑުގެ ތެރޭގައި ރާއްޖެއާ ގާތްގަޑަކަށް 200 މޭލު ބޭރުގައި އެމެރިކާގެ މަނަވަރު ޔޫއެސްއެސް ހެންރީ ނޮކްސްއަށް ޖަރުމަންވިލާތުގެ ސަބްމެރީނަކުން ހަމަލަދީ ފައްތައިލުމުން އޭގެތެރެއިން ބައެއް ފަޅުވެރިންނަށް ކޮޅުމަޑުލަށް އާދެވުނެވެ. ޒަޚަމްވި ފަޅުވެރިންނަށް ދިވެހި ބޭސްވެރިންގެ ބޭހުގެ ފަރުވާ ލިބުނެވެ. މަރުވި ބައެއް މީހުން ވަޅުލާފައިވަނީ ކޮޅުމަޑުލު ވަންބަދިފުށީގައެވެ. މިކަން ފާހަގަކުރައްވައި އެމެރިކާގެ އޭރުގެ ރައީސް ހެރީ ޓްރޫމަން، ދިވެހިރާއްޖެއަށް މެސެޖު ފޮނުއްވާފައިވެއެވެ.
ހަނދަށް ފުރަތަމަ ދިޔަ ޖައްވީ އުޅަނދުގައި 20 ޖުލައި 1969ގައި ދިވެހިރާއްޖޭގެ މެސެެޖެއް ހަނދަށް ގެންދެވުނުކަން ވެސް ތާރީޚީ ގޮތުން ފާހަގަކުރެވެއެވެ. ޖައްވީ އުޅަނދު އެޕޯލޯގައި ހަނދަށް މެސެޖެއް ގެންދަން ފުރުސަތު ލިބުނު މަދު ގައުމުތަކުގެ ތެރޭގައި ރާއްޖެ ހިމެނުނެވެ. އަދި އެއަހަރު ރާއްޖެއިން އެމެރިކާއަށް ކަނޑައެޅުއްވި ފުރަތަމަ ސަފީރު އަބްދުއްސައްތާރު މޫސާދީދީ، އެމެރިކާގެ ޖައްވީ އެޖެންސީ (ނާސާ)ގެ ވެރިޔާއާއި ބައްދަލު ކުރެއްވިއެވެ.
މިކަންކަމަކީ އެމެރިކާއާއި ދިވެހިރާއްޖޭގެ ގުޅުންތަކުގެ ތެރެއިން މިހާރުގެ ގިނަބަޔަކަށް އާންމުކޮށް އެނގިފައިނުވާ ތާރީޚީ ސަފުހާތަކެކެވެ.
